काठमाडौं । शंकास्पद कारोबारको प्रतिवेदनमध्ये न्यून मात्रै थप विश्लेषण गरी कारबाही अगाडि बढ्ने गरेको पाइएको छ । गत आर्थिक वर्ष २०८०/८१ मा वित्तीय जानकारी इकाइमा शंकास्पद कारोबार भएको भन्दै आएको प्रतिवेदनमध्ये २२ प्रतिशत प्रतिवेदनको थप विश्लेषण भएको छ ।
यसरी विश्लेषण गर्दा ५० प्रतिशतभन्दा धेरै प्रतिवेदनमा थप अनुसन्धान र कारबाहीको लागि सम्बन्धित निकायमा पठाएको नेपाल राष्ट्र बैंक अन्तर्गतको वित्तीय जानकारी इकाइले जनाएको छ ।
आर्थिक वर्ष २०७९/८० मा सूचक संस्थाहरुले ५ हजार ९३५ वटा शंकास्पद कारोबारको प्रतिवेदन वित्तीय जानकारी इकाइमा पठाएकोमा आर्थिक वर्ष २०८०/८१ मा उक्त संख्या करिब २४ प्रतिशतले बढेर ७ हजार ३३८ पुगेको छ ।
वित्तीय जानकारी इकाइमा प्राप्त भएका शंकास्पद कारोबार/गतिविधिको प्रतिवेदनमध्ये वित्तीय जानकारी इकाइले एक वर्षमा १६३५ प्रतिवेदनको मात्रै विश्लेषण गरेको छ । यसरी आएका शंकास्पद कारोबार/गतिविधिमध्ये एक वर्षमा २२ प्रतिशतको मात्रै विश्लेषण भएको वित्तीय जानकारी इकाइको वार्षिक प्रतिवेदनमा उल्लेख छ ।
वित्तीय जानकारी इकाइले विश्लेषण गरेको प्रतिवेदनमध्ये ८८९ प्रतिवेदन थप अनुसन्धानका लागि कानुन कार्यान्वयन गर्ने/अनुसन्धानकारी निकाय तथा नियामकीय कारबाहीका लागि नियमनकारी निकायमा पठाएको छ । अघिल्लो आर्थिक वर्ष २०७९/८० मा कुल १ हजार २१६ प्रतिवेदनको विश्लेषण गर्दा ५०५ वटा प्रतिवेदन मात्रै थप कारवाहीमा पठाएको थियो ।
गत आवमा वित्तीय जानकारी इकाइले विश्लेषण गरेकोमध्ये आधा न्दा धेरै प्रतिवेदनमा थप अनुसन्धान र कारवाही आवश्यक देखिएपछि वित्तीय जानकारी इकाइले सम्बन्धीत निकायमा पठाएको हो । यसले शंकास्पद कारोबारमा वृद्धि मात्रै नभएर त्यसबाट हुने अपराधिक कारोबार समेत बढेको देखिन्छ ।
वित्तीय जानकारी इकाईमा प्राप्त भएका अधिकांश शंकास्पद कारोबार/गतिविधि प्रतिवेदनहरू कर छली सम्बन्धी, मौद्रिक/बैंकिङ/विदेशी विनिमेय/बीमा/सहकारी सम्बन्धी, ठगीसम्बन्धी, चिठ्ठा/जुवा/सट्टे बाजीलगायत सम्बद्ध कसुरसँग सम्बन्धित रहेको देखिएको प्रतिवेदनमा उल्लेख छ ।
गत आर्थिक वर्षमा प्राप्त भएको प्रतिवेदनमध्ये कर छली सम्बन्धी २ हजार ४९८ प्रतिवेदन रहेको वित्तीय जानकारी इकाइको प्रतिवेदनमा उल्लेख छ । त्यस्तै मौद्रिक/बैंकिङ/विदेशी विनिमय/बीमा/सहकारी सम्बन्धी प्रतिवेदन २ हजार १७, ठगी सम्बन्धी प्रतिवेदन ९२७ रहेको वित्तीय जानकारी इकाइको वार्षिक प्रतिवेदनमा उल्लेख छ ।
गत आर्थिक वर्षमा वित्तीय जानकारी इकाइले विश्लेषण गरेकोमध्ये ७४६ वटा प्रतिवेदन कारवाही गर्ने आधार नभेटेपछि भविष्यमा थप जानकारी प्राप्त भएमा पुनः विश्लेषण गर्ने गरी अभिलेखीकरण गरेको छ ।
सम्पत्ति शुद्धीकरण निवारण तथा आतंककारी कार्यमा वित्तीय लगानी निवारण सम्बन्धी सम्पत्ति शुद्धीकरण निवारण ऐन, २०६४ बमोजिम गर्नुपर्ने रिपोर्टिङका लागि इकाइको गोएएमएल प्रणालीमा आवद्ध सूचक संस्थाहरू, कानून कार्यान्वयन गर्ने/अनुसन्धानकारी निकायहरू र नियामक निकायहरूको जम्मा सख्या १ हजार ६३९ पुगेको छ ।
सूचक संस्थाहरूले इकाइमा पेस गरेको सीमा कारोबारको संख्या बढ्दै गएको प्रतिवेदनमा उल्लेख छ । आव २०७९/८० मा १६ लाख ९८ हजार ३९८ रहेको यस्तो संख्या गत आव २०८०/८१ मा १६ लाख ९७ हजार ७१२ पुगेको हो ।
प्रतिक्रिया