काठमाडौं । गत शुक्रबार काठमाडौंमा आतंक मच्चाएर फरार भएका दुर्गा प्रसाईं पर्साको ठोरी हुँदै भारत भागेको खुलेको छ ।
कान्ति लोकपथको बाटो हुँदै चितवन र पर्साको ठोरी हुँदै शुक्रबार मध्यरातमा भारत पुगेको अनुसन्धानमा संलग्न एक अधिकारीले क्लिकमान्डुलाईं जानकारी दिए ।
‘प्रसाईं शुक्रबार रातारात ठोरी हुँदै भारत छिरेको अनुसन्धानका क्रममा देखिएको छ,’ अनुसन्धानमा संलग्न ती प्रहरी अधिकृतले क्लिकमान्डुसँग भने- ‘हामीले भारतीय प्रहरीलाई प्रसाईंलाई पक्राउका लागि सहजीकरण गर्नका लागि कुराकानी भइरहेको छ ।’
प्रहरीको केन्द्रीय अनुसन्धान ब्युरो (सीआर्ईबी)को टोलीले भारतीय प्रहरीसँग समन्वय थालेको उनले बताए । तर सोमबार बिहान झापा आएको भन्ने अपुस्ट सूचना पनि प्रहरीलाई प्राप्त भएको उनले जानकारी दिए ।
‘भारतमै पक्राउ पर्ने देखेपछि सोमबार बिहान प्रसाईं गृहजिल्ला झापा प्रवेश गरेको भन्ने सूचना आएको छ, अहिलेसम्म पुष्टि भइसकेको छैन, हामी अनुसन्धान गरिरहेका छौं,’ प्रहरीका ती अधिकारीले भने, ‘केही समय लाग्ला तर उनी पक्राउ पर्छन् । कानूनी दायरामा ल्याएरै छाड्छौं ।’
तर, राजा फर्काउने आन्दोलनका कमान्डर प्रसाईंले चैत १७ (आइतबार) दिउँसो भिडियो सन्देश जारी गर्दै आफू काठमाडौंको एक मन्दिरमा सुरक्षित रहेको दाबी गरेका थिए ।
‘काठमाडौंमै छु भनेर भिडियो सन्देशमार्फत् ध्यान अन्यत्र मोड्न खोजेको देखिन्छ,’ प्रहरी स्रोतले भन्यो- ‘उनले भारतमा पुगेर भिडियो सन्देश जारी गर्दै काठमाडौंमै भएको भन्दै गलत दाबी गरेका छन् ।’
प्रसाईंले नेतृत्व गरेको प्रदर्शन अराजक बनेको थियो । अराजक समूहले निजी तथा सार्वजनिक सम्पत्ति, विभिन्न पार्टी कार्यालय, मिडिया हाउसमा आग्जनी र तोडफोड गरेको थियो भने भाटभाटेनीमा लुटपाट मच्चाएको थियो ।
आन्दोलन अराजक बनेपछि भिडियो खिचिरहेका एक पत्रकारसहित २ जनाको मृत्यू भएको छ भने सयौंको संख्यामा घाइते भएका छन् । कमान्डर प्रसाईंले प्रहरी साङ्लोलाई आफैंले चलाएको गाडीले पेलेर निषेधीत क्षेत्र तोड्दा पनि प्रहरीले बल प्रयोग गरेको थिएन ।
हिंसात्म प्रदर्शन गरेर बितन्डा मच्चाएका प्रसाईं आन्दोलनस्थल तिनकुनेबाट भागेर ललितपुरको इमाडोलस्थित आफ्ना गुरु पुस्कर खतिवडाको घर पुगेका थिए । त्यहाँबाट फलफूल खाएर राति नै भारत भागेका हुन् ।
गृहमन्त्री रमेश लेखकले शुक्रबार तीनकुनेमा घटेको जघन्य हिंसामा संलग्नहरु सरकारले कडाभन्दा कडा कारबाही गर्ने बताएका छन् ।
‘मान्छेलाई घरभित्र राखेर बाहिरबाट आगो लगाएर मान्छे पोल्ने पनि कुनै राजनीतिक आन्दोलन हुन्छ ?’ गृहमन्त्री लेखकले क्लिकमान्डुसँग भने,- ‘जघन्य र गम्भीर अपराधिक घटनामा संलग्नहरुलाई तुरुन्तै पक्राउ गर्न सुरु गरिसकिएको छ ।’
प्रसाईं भागे पनि प्रहरीले प्रदर्शनमा सहभागी राष्ट्रिय प्रजातन्त्र पार्टी (राप्रपा)का वरिष्ठ उपाध्यक्ष रवीन्द्र मिश्र र पार्टी महामन्त्री एवं सांसद धवलशमशेर जबरालाई सोही राति पक्राउ गरेको थियो ।
मिश्र र जबरासहित ११ जनाविरुद्ध राज्यविरुद्धको कसुर, संगठित र उपद्रव कसुरमा मुद्दा चलाइएको छ । मिश्र र जबरासँग ४१ जनालाई प्रहरीले पक्राउ गरी अनुसन्धान गरिरहेको छ । कमान्डर भनिएका प्रसाईं भने अझै फरार छन् ।
प्रतिक्रिया