नेपाली आकाशमा ४१ हेलिकप्टर दुर्घटना, ९८ जनाको ज्यान गयो

क्लिकमान्डु
प्रकाशित मिति : August 7, 2024

348

काठमाडौं । नेपाली आकाशमा हालसम्म ४१ वटा हेलिकप्टर दुर्घटना भएका छन् । बुधबार नुवकोटमा भएको एयर डाइनेस्टीको हेलिकप्टर दुर्घटनामा ५ जनाले ज्यान गुमाए । यसअघि सोलुखुम्बुको नाम्चेमा मनाङ एयरको हेलिकप्टर दुर्घटनामा एक जना पाइलटको ज्यान गएको थियो ।

नेपाल नागरिक उड्डयन प्राधिकरणले सार्वजनिक गरेको सन् २०२३ को जुलाई ११ सम्मको तथ्यांक अनुसार त्यस अवधिसम्म ३९ वटा दुर्घटना भएका थिए । प्राधिकरणले तथ्यांक अद्यावधिक गरेपछि गत २७ असोज २०८० मा मनाङ एयरको हेलिकप्टर दुर्घटना भएको थियो भने बुधबार भएको हवाई दुर्घटनाले नेपाली आकासमा हुने दुर्घटनाको दर बढाएको छ ।

पछिल्लो समय ९ साउनमा सौर्य एयरलाइन्सको दुर्घटनामा भएको दुई साता नबित्दै भएको अर्को हवाई दुर्घटनाले नेपाली हवाई क्षेत्रलाई युरोपेली युनियन (ईयू)को सुरक्षा सुची (कालोसूची)लाई थप समय लम्बाउने भएको छ ।

हवाई दुर्घटना बढेकै कारण नेपालको उड्डयन सुरक्षामा सुधार हुन नसकेको भन्दै ईयूको कालोसूचीमा नेपाली वायुसेवा सन् २०१३ देखि पर्दै आएको छ ।

हालसम्म भएका ४१ वटा हवाई दुर्घटनामध्ये १८ वटा दुर्घटनामा मानवीय क्षति भएको छैन भने बाँकी २३ दुर्घटनामा मात्रै ९८ जनाले ज्यान गुमाएको उड्डयन प्राधिकरणले सार्वजनिक गरेको तथ्यांकमा उल्लेख छ ।

नागरिक उड्ययन प्राधिकरणको तथ्यांक अनुसार २७ डिसेम्बर १९७९ मा लेटाङमा भीभीआईपी हेलिकप्टर दुर्घटना हुँदा ६ जनाले ज्यान गुमाएका थिए । पछिल्लो पटक मनाङ एयरको हेलिकप्टर सोलुखुम्बुमा दुर्घटना भएको थियो । ११ जुलाई २०२३ मा भएको उक्त दुर्घटनामा ६ जनाले ज्यान गुमाएका थिए ।\