एनआइसी एशिया, सानिमा, प्रभु, सेञ्चुरी र सिभिलसहित १५ बैंकको मुद्दति निक्षेप बढ्यो (सूचिसहित)

काठमाडौं । एनआइसी एशिया, सानिमा, प्रभु, सेञ्चुरी र सिभिलसहित १५ बैंकले मुद्दति निक्षेप बढाएका छन् ।

नविल, इन्भेष्टमेन्ट र स्ट्यान्डर्ड चार्टर्डसहित १३ बैंकको मुद्दति निक्षेप घटेको बेला एनआइसी एशिया, सानिमा, प्रभु, सेञ्चुरी र सिभिललगायतका १५ बैंकले भने बढाएका हुन् ।

नविल, इन्भेष्टमेन्ट र स्ट्यान्डर्ड चार्टर्डसहित १३ बैंकको मुद्दति निक्षेप घट्दो (सूचिसहित)

आक्रमक बजार विस्तार गरिरहेको एनआइसी एशिया बैंकले एक महिनाको अवधिमै सबैभन्दा धेरै ५१ करोड ८१ लाख रुपैयाँले अर्थात् ७.५३ प्रतिशतले मुद्दति निक्षेप बढाएको छ । बैंकको यो वृद्धिदर गत फागुन महिनाको तुलनामा चैत महिनाको हो ।

०७५ फागुन महिनामा एनआइसी एशिया बैंकले ६ अर्ब ८८ करोड ४९ लाख रुपैयाँ मुद्दति निक्षेप संकलन गरेकोमा चैत महिनामा ७ अर्ब ४० करोड ३१ लाख रुपैयाँ संकलन गरेको छ ।

त्यसैतरी, फागुनको भन्दा चैत महिनामा सानिमा बैंकले २.३२ प्रतिशतले अर्थात् ९ करोड ५४ लाख ४ हजार रुपैयाँले बढी मुद्दति निक्षेप संकलन गरेको छ । फागुनमा ४ अर्ब ११ करोड ८० लाख रुपैयाँ मुद्दति निक्षेप संकलन गरेको सानिमाले चैतमा ४ अर्ब २१ करोड ३४ लाख रुपैयाँ संकलन गरेको छ ।

त्यसैगरी, प्रभु बैंकले फागुनको तुलनामा चैत महिनामा १.४२ प्रतिशत अर्थात् ५ करोड ८८ लाख ८० हजार रुपैयाँले बढी मुद्दति निक्षेप संकलन गरेको छ । फागुनमा ४ अर्ब १५ करोड ८९ लाख रुपैयाँ मुद्दति निक्षेप संकलन गरेको प्रभुले चैतमा ४ अर्ब २१ करोड ७८ लाख रुपैयाँ संकलन गरेको छ ।

त्यसैगरी, एक महिनाको अवधिमा सेञ्चुरी बैंकले ५ करोड ८८ लाख ८० हजार रुपैयाँ अर्थात् १.४२ प्रतिशतले मुद्दति निक्षेप बढाएको छ । फागुनमा ३ अर्ब ४३ करोड रुपैयाँ मुद्दति निक्षेप संकलन गरेको सेञ्चुरीले चैतमा ३ अर्ब ४८ करोड ८२ लाख रुपैयाँ संकलग गरेको छ ।

त्यस्तै, नेपाल बैंकले एक महिनाको अवधिमा ५ करोड ७ लाख ६४ हजार रुपैयाँ अर्थात् २.३२ प्रतिशतले मुद्दति निक्षेप बढाएको छ । बैंकले फागुनमा २ अर्ब १२ करोड ८८ लाख रुपैयाँ मुद्दति निक्षेप संकलन गरेको थियो भने चैतमा २ अर्ब २३ करोड ९६ लाख रुपैयाँ संकलन गरेको छ ।

त्यसैगरी, सिभिल बैंकले एक महिनाको अवधिमा १.२८ प्रतिशत अर्थात् २ करोड ९९ लाख रुपैयाँले मुद्दति निक्षेप बढाएको छ । फागुनमा २ अर्ब ३४ करोड रुपैयाँ मुद्दति निक्षेप संकलन गरेको सिभिलले चैतमा २ अर्ब ३७ करोड रुपैयाँ संकलन गरेको छ ।

त्यस्तै, नेपाल एसबिआइ बैंकले एक महिनाको अवधिमा ०.७७ प्रतिशत अर्थात् ४ करोड १५ लाख रुपैयाँले मुद्दति निक्षेप बढाएको छ भने एभरेष्ट बैंकले एक महिनाको अवधिमा ०.४७ प्रतिशत अर्थात् २ करोड ५८ लाख ३६ हजार रुपैयाँले मुद्दति निक्षेप बढाएको छ ।

त्यसैगरी, लक्ष्मी बैंकले ०.६१ प्रतिशत अर्थात् २ करोड ३५ लाख ५८ हजार रुपैयाँ, राष्ट्रिय वाणिज्य बैंकले २ करोड ३० लाख ३३ हजार रुपैयाँ अर्थात् ०.९८ प्रतिशतले मुद्दति निक्षेप बढाएको छ ।

त्यस्तै, एनसीसी बैंकले ०.७४ प्रतिशत अर्थात् २ करोड १३ लाख ७३ हजार र सिटिजन्स बैंकले ०.४० अर्थात् १ करोड ७२ लाख २० हजार रुपैयाँले मुद्दति निक्षेप बढाएको छ ।

त्यसैगरी, नेपाल बंगलादेश बैंकले ०.५४ प्रतिशत अर्थात् १ करोड ५४ लाख ७२ हजार रुपैयाँले बढाएको छ भने हिमालयन बैंकले ०.२७ प्रतिशत अर्थात् १ करोड ३१ लाख २२ हजार रुपैयाँले बढाएको छ ।

फागुको तुलनामा चैतमा मुद्दति निक्षेप सबैभन्दा कम बढाउने बैंकमा ग्लोबल आइएमइ बैंक हो । ग्लोबलले फागुको भन्दा चैतमा ०.२ प्रतिशत अर्थात् ८ लाख ८५ हजार रुपैयाँ मात्रै मुद्दति निक्षेप बढाएको छ । ०७५ फागुनमा ग्लोबलले ५ अर्ब ७३ करोड २२ लाख रुपैयाँ मुद्दति निक्षेप संकलन गरोकोमा चैतमा ५ अर्ब ७३ करोड ३० लाख ८५ हजार रुपैयाँ मात्रै मुद्दति निक्षेप संकलन गरेको छ ।

२८ वटा वाणिज्य बैंकहरुमध्ये १३ वटाको मुद्दति निक्षेप यो अवधिमा घटेको छ । सबैभन्दा बढी स्ट्यान्डर्ड चार्टड बैंकको घटेको छ । फागुनको तुलनामा चैतमा यो बैंकको १३.५२ प्रतिशत अर्थात् २९ करोड ८० लाख ८० हजार रुपैयाँले घटेको हो ।