जासुसीको आरोपमा अमेरिकी विद्वानलाई चीनले गर्यो पक्राउ

एजेन्सी । चीनको परराष्ट्र मन्त्रालयले शुक्रबार म्यानमारमा केन्द्रित थिंक–ट्यांकको नेतृत्व गर्ने अमेरिकी नागरिक मिन जिनलाई जासुसी र चिनियाँ राष्ट्रिय सुरक्षा खतरामा पारेको आशंकामा पक्राउ गरिएको पुष्टि गरेको छ ।

‘जासुसी र चीनको राष्ट्रिय सुरक्षालाई खतरामा पारेको आशंकामा मिन जिनलाई सम्बन्धित अधिकारीहरूले कानुन बमोजिम आपराधिक हिरासतमा राखेको बुझिएको छ,’ परराष्ट्र मन्त्रालयका प्रवक्ता लिन जियानले नियमित पत्रकार सम्मेलनमा बताए ।

चीनले दक्षिणी चिनियाँ सहर क्वाङचाउस्थित अमेरिकी महावाणिज्य दूतावासलाई पक्राउबारे जानकारी गराएको उनले थपे ।

इन्स्टिच्युट फर स्ट्राटेजी एन्ड पोलिसी (आईएसपी) म्यानमारका कार्यकारी निर्देशक मिन जिन दक्षिण–पश्चिम चीनको कुन्मिङमा विमानबाट ओर्लिएपछि उनलाई नियन्त्रणमा लिइएको यस मामिलाका जानकार तीन व्यक्तिले बताएका छन् ।

विषयको संवेदनशीलताका कारण उनीहरू सबैले नाम नखुलाउन आग्रह गरे ।

‘मिन जिनलाई करिब दुई हप्ताअघि कुन्मिङ विमानस्थलबाट पक्राउ गरिएको थियो,’ तीमध्ये एक व्यक्तिले थप विवरण दिन अस्वीकार गर्दै भने ।

अमेरिकी राष्ट्रपति डोनल्ड ट्रम्पको गत महिनाको बेइजिङ भ्रमणपछि अमेरिका र चीनले आफ्नो बिग्रिएको द्विपक्षीय सम्बन्धलाई स्थिर बनाउन काम गरिरहेका बेला यो गिरफ्तारी भएको हो ।

म्यानमारको सन् १९८८ को लोकतन्त्र आन्दोलनमा सहभागी पूर्व विद्यार्थी कार्यकर्ता मिन जिनले युनिभर्सिटी अफ क्यालिफोर्निया, बर्कलेमा राजनीतिशास्त्र पढेका थिए ।

उनले आईएसपी स्थापना गर्न पनि मद्दत गरेका थिए जुन सुरुमा म्यानमारभित्रै थियो तर सन् २०२१ को कु (सैन्य विद्रोह) पछि विदेश सरेको थियो । उक्त समयमा सेनाले नोबेल शान्ति पुरस्कार विजेता आङ सान सुकीको लोकतान्त्रिक रूपमा निर्वाचित सरकारलाई अपदस्थ गरेको थियो ।

सो सैन्य विद्रोहले म्यानमारलाई लामो गृहयुद्धमा धकेलिदियो जहाँ सेना र लोकतन्त्र पक्षधर सशस्त्र समूहहरू तथा स्थापित जातीय सेनाहरू बीच द्वन्द्व चलिरहेको छ । मिन जिनको आईएसपीले यो द्वन्द्वलाई नजिकबाट नियालिरहेको छ ।

यस थिंकट्यांकका हालैका प्रकाशनहरूले सैन्य–नियोजित निर्वाचनपछि जुन्ता प्रमुख मिन आङ ह्लाइङले राष्ट्रपतिको रूपमा पदभार ग्रहण गरेपछिको म्यानमारको राजनीतिक सङ्क्रमण र देशको खस्कँदो अर्थतन्त्रमा ध्यान केन्द्रित गरेका छन् ।

चीनले म्यानमारको नयाँ प्रशासनलाई सार्वजनिक रूपमा समर्थन गरेको छ जसले सुकीको राजनीतिक दल लगायत देशका मुख्य विपक्षी समूहहरूलाई बाहिर राखेर गरिएको र व्यापक आलोचना गरिएको मतदानपछि कार्यभार सम्हालेको थियो ।