एजेन्सी । फुटबल जगतले एउटा यस्तो भिडन्त देख्न लागेको छ जसको प्रतीक्षा सबैले गरिरहेका थिए ।
मंगलबार डल्लासमा फ्रान्स र स्पेनबीच एउटा अत्यन्तै रोमाञ्चक प्रतिस्पर्धा हुनेछ, जहाँ विश्वकप फाइनलको यात्रा दाउमा छ ।
२०१८ को च्याम्पियन फ्रान्स लगातार तेस्रो पटक फाइनलमा पुग्ने लक्ष्यमा छ भने २०१० को विजेता स्पेन विश्व र युरोपेली दुवै उपाधि एकैसाथ कब्जा गर्ने चौथो टोली बन्ने दाउमा छ ।
दुवै टोली प्रतिभाले भरिएका छन्, तर सबैको नजर किलियन एमबाप्पे र लामिन यामलमा हुनेछ ।
एमबाप्पेले सन् २०१८ को विश्वकपमा विश्वभर आफ्नो पहिचान बनाएका थिए जहाँ उनले अर्जेन्टिना विरुद्धको अन्तिम १६ को खेलमा दुई गोल गर्दै लियोनल मेस्सीको टोलीलाई घर पठाउन र फ्रान्सलाई च्याम्पियन बनाउन मद्दत गरेका थिए ।
इतिहासकै महान खेलाडीमध्ये एक (मेस्सी) लाई छायामा पार्नु नै फुटबल जगतमा नयाँ पुस्ताको आगमनको संकेत थियो तर अहिले फेरि एक नयाँ ‘ग्लोबल स्टार’ उदाएका छन् ।
आठ वर्षपछि, १९ वर्षीय लामिन यामलले त्यही कुरा दोहोर्याउन खोज्दैछन् जुन एमबाप्पेले मेस्सीसँग गरेका थिए ।
एमबाप्पे: रेकर्ड तोड्ने मेसिन
अहिलेको समयमा एमबाप्पेलाई विश्वकै उत्कृष्ट खेलाडी मान्न गाह्रो छैन । गत सिजन रियल मड्रिडका लागि ४४ खेलमा ४२ गोल गर्दै उनी ला लिगा र च्याम्पियन्स लिग दुवैमा शीर्ष स्कोरर बनेका थिए । यस विश्वकपमा पनि ८ गोलका साथ उनी मेस्सीसँगै गोल्डेन बुटको दौडमा अगाडि छन् ।
विश्वकपको इतिहासमा सर्वाधिक गोल गर्ने मामलामा उनी १९ गोलका साथ मिरोस्लाभ क्लोज (१६) लाई उछिन्दै मेस्सी (२०) पछि दोस्रो स्थानमा छन् । यति धेरै सफलताका बाबजुद रियल मड्रिडमा दुई सिजन बिताउँदा पनि उनले त्यहाँ अहिलेसम्म कुनै ठूलो ट्रफी जित्न सकेका छैनन् जुन उनको करियरमा एउटा सानो दाग जस्तै बनेको छ।
२७ वर्षीय फ्रान्सेली कप्तान अहिले १०४ खेलमा ६४ गोलका साथ फ्रान्सका सर्वकालीन महान गोलकर्ता बनिसकेका छन् । फुटबल विज्ञहरूका अनुसार उनी जिदान र प्लाटिनीलाई पनि उछिन्दै फ्रान्सको इतिहासकै महान खेलाडी बन्ने बाटोमा छन् ।
‘आगामी १५ वर्ष लामिन यामलको हुनेछ’
लामिन यामल सोमबार मात्र १९ वर्षका भए, तर उनी अहिले नै विश्वकै उत्कृष्ट युवा फरवार्ड बनिसकेका छन् । बार्सिलोनाबाट चर्चामा आएका उनले युरो २०२४ मा स्पेनलाई जिताउन मुख्य भूमिका खेलेका थिए।
यद्यपि, यो विश्वकपमा उनको प्रदर्शन एमबाप्पे वा बेलिङ्घम जस्तो चम्किलो देखिएको छैन । चोटका कारण उनको लय केही सुस्त छ। तर स्पेनका प्रशिक्षक लुइस डे ला फुएन्टे भन्छन्, ‘उनलाई शान्त भएर फुटबलको आनन्द लिन दिनुहोस्, उनको ठूलो दिन आउन बाँकी नै छ ।’
बार्सिलोनाका पूर्व प्रशिक्षक जाभीका अनुसार यामलमा सानै उमेरमा नेतृत्व गर्ने क्षमता छ, जुन क्षमता मेस्सी, म्याराडोना र पेले जस्ता खेलाडीमा मात्र देखिएको थियो ।
तुलना र इतिहास
गोलको मामलामा यस गर्मीमा एमबाप्पेले यामललाई धेरै पछाडि पारेका छन् । एमबाप्पेले ३० प्रहारमा ८ गोल गरेका छन् भने यामलले २३ प्रहारमा मात्र १ गोल । तर, ड्रिब्लिङ र रक्षात्मक खेल (डिफेन्स) मा भने यामल अगाडि छन् ।
इतिहास हेर्ने हो भने, पछिल्ला भेटहरूमा स्पेन हाबी देखिएको छ। युरो २०२४ को सेमिफाइनलमा स्पेनले फ्रान्सलाई २-१ ले हराउँदा यामलले उत्कृष्ट गोल गरेका थिए । गत वर्षको नेसन्स लिगमा पनि स्पेन ५-४ ले विजयी भएको थियो । एमबाप्पे र यामलबीच भएका पछिल्ला १० भेटमा ८ पटक यामलको टोली विजयी भएको छ, यद्यपि ती खेलहरूमा एमबाप्पेले ९ गोल र यामलले ६ गोल गरेका छन् ।
यो प्रतिद्वन्द्विताको नयाँ अध्याय निकै महत्वपूर्ण छ-किनभने यो खेल जित्ने टोलीले नै जुलाई १९ मा न्यु जर्सीमा हुने विश्वकपको उपाधि उचाल्ने अपेक्षा गरिएको छ ।
प्रतिक्रिया