एजेन्सी । फिफा विश्वकप २०२६ को पहिलो सेमिफाइनलमा आज फ्रान्स र स्पेन आमनेसामने हुँदैछन् ।
यो खेल केवल फाइनल प्रवेशका लागि हुने प्रतिस्पर्धा मात्र नभइ विश्व फुटबलका दुई फरक पुस्ताका उत्कृष्ट खेलाडीबीचको भिडन्तको रुपमा हेरिएको छ ।
एकातिर विश्व फुटबलमा आफूलाई सुपरस्टारका रूपमा स्थापित गरिसकेका फ्रान्सका किलियन एम्बाप्पे छन् भने अर्कोतिर किशोर उमेरमै विश्वलाई आफ्नो प्रतिभाले चकित बनाइरहेका स्पेनका लामिन यामाल । त्यसैले आजको खेलमा सबैको नजर यी दुई खेलाडीमाथि रहनेछ।
एम्बाप्पे फ्रान्सका सबैभन्दा भरोसायोग्य खेलाडी हुन्। उनको गति, गोल गर्ने क्षमता र ठूला खेलमा उत्कृष्ट प्रदर्शन गर्ने बानीले फ्रान्सलाई धेरै पटक जित दिलाएको छ ।
सन् २०१८ मा विश्वकप जितेका एम्बाप्पे अहिले फेरि टोलीलाई विश्वकपको उपाधिनजिक पुर्याउने अभियानमा छन् । यस संस्करणमा पनि उनले विपक्षी रक्षापंक्तिलाई लगातार दबाबमा राख्दै निर्णायक भूमिका खेलेका छन् । कुनै पनि क्षण खेलको नतिजा बदल्न सक्ने क्षमता भएकाले स्पेनका लागि सबैभन्दा ठूलो चुनौती पनि एम्बाप्पे नै हुन् ।
अर्कोतर्फ, स्पेनका लामिन यामाल अहिले विश्व फुटबलका सबैभन्दा चर्चित युवा खेलाडी बनेका छन् । कम उमेरमै उनले देखाएको आत्मविश्वास, उत्कृष्ट ड्रिब्लिङ, बल नियन्त्रण र सटिक पासले स्पेनको खेललाई नयाँ ऊर्जा दिएको छ । यामाल मैदानमा निडर भएर खेल्छन् । उनी एक्लैले विपक्षी रक्षकलाई छक्याएर अवसर सिर्जना गर्न सक्छन् । यही कारण अहिले स्पेनका समर्थकको सबैभन्दा ठूलो आशा पनि यामाल बनेका छन् ।
विश्व फुटबलमा अहिले धेरैले एम्बाप्पेलाई वर्तमानका सुपरस्टार र यामाललाई भविष्यका सुपरस्टारका रूपमा तुलना गर्न थालेका छन्। तर यामालले आफू भविष्यको होइन, वर्तमानकै खेलाडी भएको सन्देश यस विश्वकपमा लगातार दिएका छन् । हरेक खेलमा उनले आफ्नो प्रभाव देखाएका छन् र टोलीलाई जिततर्फ डोर्याएका छन्।
यी दुई खेलाडीबीचको प्रतिस्पर्धा नयाँ भने होइन । क्लब फुटबलमा बार्सिलोना र रियल मड्रिडबाट खेल्दा उनीहरू एकअर्काको सामना गरिसकेका छन् । अन्तर्राष्ट्रिय फुटबलमा पनि स्पेन र फ्रान्सबीच पछिल्ला केही खेल निकै प्रतिस्पर्धात्मक भएका छन् । युरो २०२४ को सेमिफाइनलमा यामालले गरेको शानदार गोलले स्पेनलाई फाइनल पुर्याउन मद्दत गरेको थियो । त्यसपछि नेसन्स लिगमा पनि स्पेनले फ्रान्सलाई पराजित गरेको थियो । त्यसैले आजको खेलमा फ्रान्स पुरानो हारको बदला लिन चाहन्छ भने स्पेन आफ्नो लय कायम राख्न चाहन्छ ।
रणनीतिक रूपमा हेर्दा फ्रान्सको मुख्य योजना एम्बाप्पेको गतिलाई उपयोग गर्दै छिटो काउन्टर अट्याक गर्ने हुनेछ । मिडफिल्डबाट बल जित्नेबित्तिकै एम्बाप्पेलाई खाली ठाउँमा पास दिने रणनीति फ्रान्सले अपनाउन सक्छ । स्पेन भने आफ्नो पुरानै शैलीमा बल आफ्नो नियन्त्रणमा राख्दै छोटो–छोटो पासमार्फत खेल अघि बढाउने प्रयास गर्नेछ। यामाल, विलियम्स, पेड्री, मेरिनो जस्ता खेलाडीको तालमेल स्पेनका लागि निर्णायक हुन सक्छ ।
यद्यपि, यो खेल केवल एम्बाप्पे र यामालमा मात्र सीमित हुनेछैन। फ्रान्ससँग अनुभवी खेलाडीको समूह छ भने स्पेनसँग सामूहिक खेलको उत्कृष्ट शैली छ। सानो गल्तीले पनि खेलको नतिजा बदल्न सक्ने भएकाले दुवै टोली निकै सतर्क रहनेछन्। तर समर्थकका लागि सबैभन्दा ठूलो उत्सुकता भने एम्बाप्पेले आफ्नो गति देखाउँछन् कि यामालले आफ्नो जादु देखाउँछन् भन्ने नै हुनेछ।
विश्वकपको सेमिफाइनल सधैं खेलाडीलाई इतिहास लेख्ने अवसर दिने मञ्च हो। एम्बाप्पेका लागि यो आफ्नो महानताको अर्को प्रमाण पेश गर्ने मौका हो भने यामालका लागि विश्व फुटबलको नयाँ अनुहारका रूपमा आफूलाई अझ मजबुत बनाउने अवसर हो।
आज राति एम्बाप्पेको अनुभवले बाजी मार्छ वा यामालको युवा जोशले अर्को इतिहास रच्छ, त्यसको उत्तर मैदानले दिनेछ। तर एउटा कुरा निश्चित छ- फ्रान्स र स्पेनबीचको यो सेमिफाइनल विश्वकप २०२६ का सबैभन्दा रोमाञ्चक खेलमध्ये एक हुनेछ। यो खेलले केवल एउटा टोलीलाई फाइनलमा पुर्याउने छैन, विश्व फुटबलमा अर्को यादगार कथा पनि लेख्नेछ ।
प्रतिक्रिया