खुमा अर्यालले दाङमा बनाइरहेको अस्पतालको लागत साढे २ अर्बबाट बढ्यो, कात्तिकबाट सञ्चालनमा आउने

काठमाडौं । दाङको घोराही उपमहानगरपालिका ३ गोग्लीमा बन्दै गरेको सञ्जिवनी इन्सिट्यूट अफ एड्भान्स स्टडिस एन्ड टिचिङ हस्पिटल आगामी कात्तिकबाट सञ्चालनमा आउने भएको छ ।

कम्पनीले आगामी कात्तिकबाट एक सय शय्याको सुविधासहित अस्पताल सञ्चालनमा ल्याउने भएको हो ।

कम्पनीले घोराहीमा ५ सय शय्याको सुविधासहितको अस्पताल बनाइरहेको छ ।

कम्पनीले पहिलो चरणमा ३ सय शय्याको सुविधाका साथ अस्पताल सञ्चालनमा ल्याउने जनाएको छ । तर, त्यसमध्ये पनि आगामी कात्तिकबाट सामान्य रुपमा अस्पताल सञ्चालनमा ल्याउने तयारी गरेको हो ।

कम्पनीले नर्सिङ र पारामेडिकल कोर्सको सुविधासँगै सेवा दिने जनाएको छ । हाल अस्पतालको निर्माण कार्य सम्पन्न हुन लागेको रेटिङमा उल्लेख छ ।

कम्पनीले आगामी सन् २०२६ को अन्त्यसम्ममा अस्पताल पूर्णरुपमा सञ्चालनमा ल्याउने जनाएको छ ।

कम्पनीले अस्पताल निर्माणका लागि दीर्घकालीन तथा अल्पकालीन कर्जाका लागि १ अर्ब ७२ करोड रुपैयाँको रेटिङ गराएको छ ।

कम्पनीले दीर्घकालीन कर्जाका लागि १ अर्ब ६९ करोड ५० लाख रुपैयाँ र अल्पकालीन कर्जाका लागि २ करोड ५० लाख रुपैयाँको रेटिङ गराएको हो ।

कम्पनीकाअनुसार हाल अस्पताल निर्माणको ६७ प्रतिशत काम सम्पन्न भएको छ भने ४७ प्रतिशत आर्थिक प्रगति भएको छ ।

कम्पनीले उक्त अस्पताल २ अर्ब ४२ करोड २० लाख रुपैयाँ लगानीमा निर्माण हुने अनुमान गरेको थियो । तर, भवन निर्माणका लागि आवश्यक थप उपकरण र ब्याजको दायित्व बढ्दा अनुमानित लागतभन्दा बढी खर्च हुने उल्लेख गरेको छ ।

अस्पताल निर्माणको लागत बढेसँगै लगानीकर्ताले २८ प्रतिशत इक्विटी थप गरेको कम्पनीको भनाइ छ । अस्पतालको प्रतिशय्या सञ्चालन पुँजी ८० लाभखभन्दा कम रहेको जनाइएको छ ।

अस्पताल निर्माणका लगानीकर्ता विगत लामो समयदेखि मेडिकल क्षेत्रमा कार्यरत छन् । अस्पतालको सञ्चालक अध्यक्ष मेडिकल व्यवसायी खुमाप्रसाद अर्याल हुन् ।

अस्पताल सञ्चालनमा आएपछि विशेषज्ञ चिकित्सा अन्तरगत कार्डियोलोजी, गैस्ट्रोएन्टरोलोजी, युरोलोजी, एमआरआई लागायतका विभिन्न पच्चिस भन्दा बढी र विशिष्टकृत सेवा अन्तरगत पन्ध्र वटा सेवा उपलब्ध हुने जनाइएको छ ।

खुमा अर्यालले पौने २ अर्ब लगानीमा हेटौंडा बनाए दाना उद्योग

अस्पतालमा १४ बटा मोडुलर शल्यक्रिया कक्षहरु, आइसीयु, एसआइसीयु, एनआइसीयु, पीआइसीयु लगायतका सुविधा पनि रहने छ । यी सुविधा भएपछि जटील प्रकृतिका प्रसुति तथा अन्य सल्यक्रियाका लागि काठमाडौं वा अन्यत्र जानु पर्ने अवस्था अन्त्य हुने दाबी कम्पनीको छ ।

रोल्पा, प्युठान, सल्यान, रुकुम, दांग, अर्घाखाँची, बाँके र कपिलवस्तु गरी आठ जिल्लाबाट दैनिक करिब ७ सय जनाको प्रवाह हुने अनुमान गरिएको छ ।

अस्पताल आफ्नै स्वामित्वको ३ बिघा १५ कट्टा ७.९१९ घुर जग्गामा निर्माण भइरहेको हो ।

डेढ अर्ब लगानी थपेर क्यान्सर उपचारको सेवा विस्तार गर्दै खुमा अर्याल, एकै वर्ष पौने २ अर्बको व्यापार