एजेन्सी । फ्रान्सका विश्वकप प्रतिद्वन्द्वीहरू उनीहरूको घातक फिनिसिङबाट मात्र डराउनुपर्ने होइन । यो असाधारण प्रतिभाशाली ‘लेस ब्लुज’ (फ्रान्सेली टोली) को जोस र एकताले पनि प्रतियोगितामा बाँकी रहेका टोलीहरूलाई चिन्तित तुल्याउनुपर्छ । र यो मंगलबार स्वीडेनविरुद्धको ३-० को सानदार जितका क्रममा स्पष्ट देखिएको थियो ।
किलियन एमबाप्पेको उत्कृष्ट गोलपछि, फ्रान्सका लागि सबैभन्दा धेरै गोल गर्ने खेलाडी सिधै आफ्नो बेन्चतिर दौडिएर डिडियर डेसच्याम्प्सलाई अँगालो हाले ।
मुख्य प्रशिक्षक डेसच्याम्प्स आफ्नी आमाको अन्त्येष्टिमा सहभागी हुन फ्रान्स गएर फर्केपछि पहिलो पटक ‘डगआउट’मा देखिएका थिए। यो एक हृदयस्पर्शी क्षण थियो ।
त्यसपछि एमबाप्पे र डेसच्याम्प्ससँग टोलीका अन्य सदस्यहरू पनि मिसिए । सबैले मिलेर सामूहिक अँगालो हाले ।
केही भावनात्मक दिनहरूपछि, न्यू जर्सीको चर्को गर्मीमा आफ्नो टोलीले उत्कृष्ट प्रदर्शन गर्दै शनिबार, जुलाई ४ मा फिलाडेल्फियामा पाराग्वेसँग अन्तिम १६ को भिडन्त पक्का गरेपछि डेसच्याम्प्सको अनुहारमा मुस्कान फर्किएको थियो ।
‘यो समूह एकजुट छ र म यहाँ नहुँदा पनि उनीहरूले राम्रो नतिजा निकाले,’ खेलपछि डेसच्याम्प्सले भने,’यो समूहको टिम भावनाले मात्र खेल जिताउँदैन । तर मलाई थाहा छ यदि यो भएन भने, तपाईं खेल हार्न सक्नुहुन्छ। सामूहिक शक्ति सबैभन्दा माथि हुन्छ।’
मिडफिल्डर ओरेलियन चुवामेनीले थपे, ‘हामीलाई थाहा छ प्रशिक्षक धेरै पीडाबाट गुज्रिरहनुभएको छ, हामी उहाँलाई सकेसम्म खुसी बनाउन आफ्नो तर्फबाट सबै थोक दिने प्रयास गरिरहेका छौं ।’
ब्राडली बारकोलाले गोल गर्दै अग्रता २-० बनाए र पछि एमबाप्पेले आफ्नो व्यक्तिगत दोस्रो गोल थप्दै गोल्डेन बुटको दौडमा अर्जेन्टिनाका लियोनेल मेस्सीसँगै ६ गोल पुर्याए । ‘यस्तो क्षमतालाई कसैले रोक्न सक्दैन,’ इंग्ल्याण्डका पूर्व स्ट्राइकर इयान राइटले आईटीभी स्पोर्ट्सलाई भने,’मैले अहिलेसम्म विश्वकप प्रतियोगितामा देखेका टोलीहरूमध्ये फ्रान्स सबैभन्दा प्रवल दाबेदार मध्ये एक हो ।’
राइटका आर्सनलका पूर्वसहकर्मी र १९९८ को विश्वकप विजेता प्याट्रिक भिएराले थपे, ‘उनीहरूले सबैलाई देखाए कि उनीहरू नै हराउनुपर्ने मुख्य टोली हुन् ।’
उनी गलत थिएनन् ।
एमबाप्पेको उत्कृष्ट फिनिसिङका साथै, माइकल ओलिसेले थप दुई असिस्ट गरेर यस प्रतियोगितामा आफ्नो असिस्ट संख्या पाँच पुर्याए ।
यससँगै फ्रान्स लगातार पाँच विश्वकप खेलमा तीन वा सोभन्दा बढी गोल गर्ने पहिलो टोली बन्यो ।
यो एक उत्साहजनक प्रदर्शन थियो जसले रंगशालाभित्र रहेका ८०,००० भाग्यमानी प्रशंसकहरूलाई यो सोच्न बाध्य बनायो, के फ्रान्सको यो २०२६ को टोलीलाई रोक्न कोही सक्षम छ ?
विश्वकप नकआउट चरणमा सबैभन्दा धेरै गोल गर्ने खेलाडीहरू
| खेलाडी | खेल संख्या | गोल |
|---|---|---|
| किलियन एम्बाप्पे | ९ | १० |
| लियोनिदास | ५ | ८ |
| रोनाल्डो नाजारियो | १० | ८ |
| ओल्डरिच नेजेड्ली | ६ | ७ |
| पेले | ६ | ७ |
| जस्ट फन्टेन | ३ | ७ |
| वाभा | ५ | ७ |
‘मैले योभन्दा राम्रो टोली देखेको छैन’
कतारमा भएको फाइनलमा अर्जेन्टिना विरुद्ध पेनाल्टी सुटआउटमा हार बेहोरेको चार वर्षपछि, ‘लेस ब्लुज’ त्यो गल्ती सुधार्न र यस पटक उपाधि जित्न कटिबद्ध देखिएका छन् ।
उनीहरूले स्वीडेनविरुद्ध २५ पटक प्रहार गर्दै धेरै अवसरहरू गुमाए – जुन १९९८ पछिको एउटै विश्वकप खेलमा उनीहरूको सबैभन्दा धेरै प्रहार हो ।
तैपनि फ्रान्सले अमेरिकामा भएका चार खेलमा १३ गोल गरिसकेको छ र उनीहरूको व्यक्तिगत तथ्याङ्क फरक स्तरको छ ।
बालोन डी’ओर विजेता ओस्मान डेम्बेलेको छ गोलमा संलग्नता (चार गोल, दुई असिस्ट) रहेको छ, माइकल ओलिसेले पाँच असिस्ट गरेका छन् र उनले एक अद्भूत एक्रोब्याटिक प्रहार मार्फत बललाई पोस्टमा ठोक्काएका थिए ।
तर एमबाप्पेको रूपमा उनीहरूसँग एक यस्तो खेलाडी छ जो आफ्नो करियरको उत्कृष्ट लयमा छ र उनले आफू किन विश्वकै उत्कृष्ट फिनिसरमध्ये एक हो भन्ने प्रमाणित गरिरहेका छन् ।
प्रतियोगिताको सर्वाधिक गोलकर्तालाई दिइने गोल्डेन बुटको दौडमा उनी बराबरीमा मात्र छैनन्, रियल म्याड्रिडका यी फरवार्डको अब १८ विश्वकप गोल पुगेको छ । उनी प्रतियोगिताको इतिहासमा सबैभन्दा धेरै गोल गर्ने मेस्सीभन्दा मात्र एक गोलले पछि छन् ।
फ्रान्सका कप्तानले सात फरक विश्वकप खेलहरूमा दुई वा सोभन्दा बढी गोल गरेका छन्, जुन अन्य कुनै पनि खेलाडीको तुलनामा तीन पटक बढी हो ।
‘हामीले फ्रान्सबाट जे देख्यौं त्यो सटिकता र विनाशकारी थियो,’ इंग्ल्याण्डका पूर्व फुल-ब्याक ग्यारी नेभिलले आईटीभी स्पोर्ट्सलाई भने, ‘खेल सुरु गर्ने ती चार अग्रपंक्तिका खेलाडीहरू [एमबाप्पे, डेम्बेले, ओलिसे र बारकोला] ले प्रतियोगिताका प्रत्येक डिफेन्डरका लागि डरलाग्दो सपना पैदा गर्नेछन् र साँचो भन्नुपर्दा उनीहरूलाई कसरी रोक्ने मलाई थाहा छैन । उनीहरू एक स्तर माथि छन् । ब्राजिलले अन्तिम मिनेटमा जित्यो, जर्मनी र नेदरल्याण्ड्स बाहिरिए । फ्रान्सले यस चरणमा अन्य सबैलाई देखाउँदैछ कि कसरी खेल्नुपर्छ ।’
‘बाँकी टोलीहरू उनीहरूलाई हेर्दै सोचिरहेका छन्, ‘हामीले पुग्नुपर्ने स्तर यही हो’उनले भने ।
स्वीडेनका प्रशिक्षक ग्राहम पोटरले समेत फ्रान्सेली टोलीसँग हारेर बाहिरिनु कुनै अपमान नभएको स्वीकारे । ‘मैले योभन्दा राम्रो टोली देखेको छैन,’ उनले भने ।
‘सुपरस्टारहरूले भरिएको टोली’
ओलिसेले आफ्नो फुटबल यात्रा ६ वर्षको उमेरमा हेज एन्ड यडिङ युनाइटेडबाट सुरु गरेका थिए ।
१८ वर्षपछि, क्रिस्टल प्यालेसका यी पूर्व खेलाडीले विश्वको सबैभन्दा ठूलो मञ्चमा आफू कति उत्कृष्ट प्रतिभा हुन् भनेर देखाइरहेका छन् ।
ह्यामरस्मिथमा नाइजेरियन बुबा र फ्रान्सेली-अल्जेरियन आमाबाट जन्मिएका ओलिसे सन् १९९४ पछिको एउटै विश्वकप प्रतियोगितामा पाँच वा सोभन्दा बढी असिस्ट गर्ने पहिलो खेलाडी हुन् ।
‘माइकलले उच्च स्तरको फुटबल खेलिरहेका छन्,’ डेसच्याम्प्सले थपे, ‘उनी टोलीभित्र एक प्रमुख प्रभावशाली खेलाडी हुन् र स्ट्राइकर र डिफेन्स बीचको कडी हुन् । उनी अलि अन्तर्मुखी स्वभावका छन्, तर मैदानमा भने त्यस्तो छैनन्।’
यो फ्रान्सेली टोलीले प्रत्येक पटक खेल्दा नयाँ रेकर्डहरू बनाइरहेको छ।
अमेरिकामा डेम्बेले र एमबाप्पेले मिलेर छ गोल गरेका छन् – डेम्बेलेबाट एमबाप्पेका लागि चार असिस्ट र एमबाप्पेबाट डेम्बेलेका लागि दुई असिस्ट भएको छ ।
यो सन् १९६६ यताको प्रतियोगितामा कुनै पनि अन्य जोडीको तुलनामा सबैभन्दा धेरै हो । ‘उनीहरूको अग्रपंक्तिमा सुपरस्टारहरूले भरिएको टोली छ,’ स्कटल्याण्डका पूर्व स्ट्राइकर एली म्याककोइस्टले आईटीभी स्पोर्ट्सलाई भने, ‘यसको अर्को कुनै व्याख्या छैन। उनीहरू दाबेदार हुन्, दाबेदारहरू सधैं जित्दैनन्, तर उनीहरू कुनै कारणले दाबेदार बनेका हुन् र त्यो हामीले आज देख्यौं ।’
एउटै विश्वकपमा ५ वा सोभन्दा बढी असिस्ट गर्ने खेलाडीहरू
| खेलाडी | टोली | वर्ष | असिस्ट |
|---|---|---|---|
| पेले | ब्राजिल | १९७० | ६ |
| रोबर्ट गाडोचा | पोल्याण्ड | १९७४ | ५ |
| पिएरे लिटबार्स्की | जर्मनी | १९८२ | ५ |
| डिएगो म्याराडोना | अर्जेन्टिना | १९८६ | ५ |
| थोमस हास्लर | जर्मनी | १९९४ | ५ |
| माइकल ओलिसे | फ्रान्स | २०२६ | ५ |
‘कृपया, बिस्तारै जानुहोस्’
यदि फ्रान्सले पाँचौं जित निकाल्दै पाराग्वेलाई हरायो भने, उनीहरूले बिहीबार, जुलाई ९ मा बोस्टन स्टेडियममा हुने क्वार्टरफाइनलमा सह-आयोजक क्यानाडा र मोरक्कोबीचको विजेतासँग सामना गर्नेछन् । तर, डेसच्याम्प्स भने धेरै टाढाको सोच्न चाहँदैनन् ।
‘कृपया, बिस्तारै जानुहोस्,’ उनको टोलीले उपाधि जित्न सक्छ कि सक्दैन भनेर सोधिएको प्रश्नमा उनले खेलपछिको पत्रकार सम्मेलनमा भने,’सुधारका लागि सधैं ठाउँ हुन्छ र सबै कुरा सधैं उत्कृष्ट हुनुपर्छ भन्ने छैन । हामी अन्तिम १६ मा पुगेका छौं । त्यसको कदर गरौं । हामीबाट के अपेक्षा गरिएको छ भन्ने हामीलाई थाहा छ । सुरुका १५ मिनेट अलि सुस्त भए पनि हामीले जे गर्नुपर्ने थियो, त्यही गर्यौं । पहिलो हाफमा हामी अझ बढी प्रभावकारी हुन सक्थ्यौं । हामी अन्तिम १६ मा पुगेका छौं, तर यो केवल अन्तिम १६ मात्र हो । हामीले शान्त रहनुपर्छ ।’
बीबीसीबाट
प्रतिक्रिया