चितवनमा युवकमाथि कुटपिट गर्ने प्रहरी निलम्बित

काठमाडौं । चितवनमा युवकलाई कुटपिट गर्ने प्रहरी निलम्बित भएका छन् ।

भरतपुर महानगरपालिकाको बाइपास सडकखण्डमा सवारी जाँचका क्रममा युवकमाथि बुटले निर्घाट कुटपिट गरिएको भिडियो सामाजिक सञ्जालमा भइरल भएको थियो ।

कुटपिट गर्ने प्रहरीलाई निलम्बन गरी थप कारबाही प्रक्रिया अघि बढाइएको हो ।

चेकिङमा खटिएका प्रहरीले युवकलाई ‘माथिको पावर देखाएको’ भन्दै लात्तीले हानेको भिडियोमा देखिएको थियो । त्यसपछि प्रहरीले उनलाई कारबाहीका लागि छानबिन समिति बनाएको छ ।

छानबिनका लागि डीएसपी ज्ञानकुमार महतोको नेतृत्वमा तीन सदस्यीय छानबिन समिति गठन गरिएको छ ।

प्रहरीले सडकमा युवकलाई कुटपिट गरेको भिडियो सार्वजनिक भएपछि वक्तव्य जारी गर्दै प्रहरी प्रधान कार्यालयले संलग्न कर्मचारीलाई कारबाही प्रक्रिया अघि बढाइएको जानकारी गराएको हो ।