आगामी जुन महिनासम्ममा युक्रेन युद्ध अन्त्य हुनैपर्ने अमेरिकाको अडान

एजेन्सी । अमेरिकाले आन्तरिक मुद्दाहरूमा ध्यान केन्द्रित गर्नु अघि गर्मी यामसम्म रुस–युक्रेन द्वन्द्व समाधान गर्न चाहेको युक्रेनका राष्ट्रपति भोलोदिमिर जेलेन्स्कीले बताएका छन् ।

यी टिप्पणीहरू यसै साता अबु धाबीमा रुस, युक्रेन र अमेरिकाबीच भएको दोस्रो चरणको त्रिपक्षीय वार्तापछि आएका हुन् ।

जनवरीमा भएको पहिलो चरणजस्तै वार्ताहरू बन्द कोठाभित्र सम्पन्न भएका थिए र दुवै पक्षले ती वार्तालाई उत्पादक र रचनात्मक भनेको बाहेक कुनै विवरण सार्वजनिक गरेका थिएनन् । पछिल्लो वार्ताबाट रुस र युक्रेनबीच ३१४ जना युद्धबन्दीको आदानप्रदान भएको छ ।

शनिबार सञ्चारकर्मीहरूसँग कुरा गर्दै जेलेन्स्कीले वाशिङटन दुवै पक्षलाई सम्झौता प्रक्रिया छिटो गर्न दबाब दिन तयार रहेको बताए ।

उनले भने, ‘अमेरिकीहरूले गर्मीको सुरुवातसम्म युद्ध अन्त्य गर्ने प्रस्ताव गरिरहेका छन् र सम्भवतः यस समयतालिका पालना गर्न दुबै पक्षमाथि दबाब दिनेछन् ।’

अमेरिकाको चाहना त्यहाँका आन्तरिक मुद्दाहरू झन् महत्त्वपूर्ण बन्दै गएकाले सम्झौता प्रक्रिया तीव्र बनाउन सुझाव दिएको जेलेन्स्कीले बताए । उनको भनाइले स्पष्ट रूपमा आउँदै गरेको अमेरिकी मध्यावधि निर्वाचनतर्फ संकेत गर्छ ।

अमेरिकी पक्षले रुसी र युक्रेनी पक्षबीच मायामीमा बैठक आयोजना गर्ने प्रस्तावसमेत गरेको उनले बताए र त्यो एक हप्ताभित्रै हुन सक्ने उल्लेख गरे ।

जेलेन्स्कीले डोनबासका आफूले अझै नियन्त्रणमा राखेका क्षेत्रहरूबाट युक्रेनी सेनालाई फिर्ता नबोलाउने आफ्नो अडान दोहोर्याए र भूभाग परित्याग गर्ने विषयमा कीभको नीति अपरिवर्तित रहेको पुष्टि गरे । रुस र अमेरिकाले शान्ति प्रक्रियामा क्षेत्रीय मुद्दा नै मुख्य अड्चन बनेको बताएका छन् ।

रुसले सम्झौतामा डोनेत्स्क र लुगान्स्क जनगणतन्त्रभित्रका युक्रेनको नियन्त्रणमा रहेका क्षेत्रहरूबाट युक्रेनी सेना फिर्ता हुनुपर्ने अडान राख्दै आएको छ । सन् २०१४ को मैदान कू पछि कीभबाट अलग भएका ती गणतन्त्रहरूले सन् २०२२ को अन्त्यतिर अत्यधिक बहुमतका साथ रुसमा समाहित हुने पक्षमा मतदान गरेका थिए । कीभले ती जनमतसंग्रहलाई मान्यता दिन अस्वीकार गरेको छ र कुनै पनि भूमि परित्याग अस्वीकार्य हुने स्पष्ट पारेको छ ।