एजेन्सी । उत्तर कोरियाका सर्वोच्च नेता नेता किम जोङ उनले आफ्नी छोरीलाई उत्तराधिकारीका रूपमा स्थापित गर्न कदम चालिरहेको देखिएको छ ।
उनले नीतिगत मामिलाहरूमा राय–सुझाव दिन थालेका संकेतहरू देखिएको दक्षिण कोरियाली सांसदहरूले एक गुप्तचर निकायको ब्रिफिङलाई उद्धृत गर्दै बिहीबार बताएका छन् ।
दक्षिण कोरियाको राष्ट्रिय गुप्तचर निकायले किम जु ए नाम गरेको विश्वास गरिने ती छोरी सत्तारूढ वर्कर्स पार्टीको आगामी बैठकमा सहभागी हुन्छिन् कि हुन्नन् र उनलाई त्यहाँ कसरी प्रस्तुत गरिन्छ (जस्तैः उनले कुनै आधिकारिक पद पाउँछिन् कि पाउन्नन्) भन्ने कुरालाई नजिकबाट नियाल्ने सांसदहरूले बताए ।
‘विगतमा एनआईएसले किम जु एलाई उत्तराधिकारीका रूपमा अध्ययनरत भनेर वर्णन गरेको थियो, तर आज प्रयोग गरिएको शब्द उनलाई आन्तरिक रूपमा नियुक्त उत्तराधिकारीको चरणमा राखिएको भन्ने थियो,’ एनआईएसको गोप्य ब्रिफिङपछि सांसद ली सेओङ–क्वेनले पत्रकारहरूलाई बताए ।
अहिले १३–१४ वर्षको उमेरमा रहेको विश्वास गरिने जु एलाई उत्तर कोरियाको सरकारी सञ्चारमाध्यममा बुवासँगै हतियार परियोजनाहरूको निरीक्षण लगायतका स्थलगत मार्गदर्शनहरूमा प्रमुखताका साथ देखाइँदै आएको छ । विश्लेषकहरूका अनुसार, उनलाई देशको चौथो पुस्ताको नेताको रूपमा तयार पारिँदैछ ।
सार्वजनिक कार्यक्रमहरूमा उनले निर्वाह गरिरहेको भूमिकाले उनले नीतिगत सल्लाह दिन थालेको र उनलाई वास्तविक रूपमा दोस्रो सर्वोच्च नेताको रूपमा व्यवहार गरिरहेको संकेत गर्ने एनआईएसको ठहर छ, ली र अर्का सांसद पार्क सुन–वोनले बताए ।
उत्तर कोरियाले फेब्रुअरीको अन्त्यमा वर्कर्स पार्टीको नवौं महाधिवेशनको उद्घाटन बैठक आयोजना गर्ने घोषणा गरेको छ । विश्लेषकहरूका अनुसार, यस कार्यक्रमले अर्थतन्त्र, वैदेशिक मामिला र रक्षा क्षेत्रमा आगामी वर्षहरूका लागि प्रमुख नीतिगत लक्ष्यहरू सार्वजनिक गर्नेछ ।
पार्क र लीका अनुसार, नेता किम जोङ उनले एउटा ठूलो पनडुब्बीको विकासको निर्देशन दिइरहेका छन् जुन १० वटासम्म पनडुब्बीबाट प्रहार गरिने ब्यालिस्टिक मिसाइल बोक्न सक्षम हुन सक्छ । यसको ८७ सय टनको तौललाई हेर्दा यो आणविक रिएक्टरबाट चल्ने गरी डिजाइन गरिएको हुन सक्ने उनीहरूले बताए ।
यद्यपि, यो वास्तवमै आणविक शक्तिबाट चल्नेछ वा डिजाइन गरिएबमोजिम सञ्चालनमा आउन सक्षम हुनेछ भन्ने कुरा अझै स्पष्ट नरहेको सांसदहरूले गुप्तचर निकायको विश्लेषणलाई उद्धृत गर्दै बताए ।
प्रतिक्रिया