एजेन्सी । अमेरिकाका राष्ट्रपति डोनल्ड ट्रम्पले अमेरिकालाई उत्तर अमेरिकी व्यापार सम्झौताबाट बाहिर निकाल्ने विषयमा गोप्य रूपमा विचार गरिरहेको ब्लुमबर्ग सञ्चारमाध्यमले समाचार प्रकाशन गरेको छ ।
क्यानडा र मेक्सिकोसँगको समीक्षा वार्ता जारी रहँदा यसले सम्झौताको भविष्यमा नयाँ अनिश्चितता पैदा गरेको छ ।
स्रोतका अनुसार, ट्रम्पले आफ्ना सहयोगीहरूलाई आफू किन यस सम्झौताबाट बाहिरिनु हुँदैन भनी सोधेका छन् । यो सम्झौता उनले आफ्नो पहिलो कार्यकालमा हस्ताक्षर गरेका थिए । तर, उनले अहिलेसम्म बाहिरिने कुनै ठोस निर्णय वा संकेत भने दिएका छैनन् ।
यो छलफल जुलाई १ मा हुने क्यानडा–अमेरिका–मेक्सिको सम्झौताको अनिवार्य समीक्षा भन्दा अगाडि आएको हो ।
कुनै पनि तत्काल कदम चालिने कुरा अपरिपक्व छ र ट्रम्पको औपचारिक घोषणा बिना यस्ता कुराहरू अनुमान मात्र हुन् भनी ह्वाइट हाउसका एक अधिकारीले बताएका छन् ।
ती अधिकारीले ब्लुमबर्गलाई भने, ‘राष्ट्रपति आफैंले घोषणा नगरेसम्म सम्भावित कदमबारे गरिने कुनै पनि छलफल आधारहीन अनुमान मात्र हो ।’
प्रशासनले आफ्ना विकल्पहरू खुला राखेको र सन् २०१९ का शर्तहरूमा कुनै परिवर्तन नगरी सम्झौता नवीकरण गर्न इच्छुक नरहेको अर्का एक अधिकारीले बताए ।
अमेरिकी व्यापार प्रतिनिधि जेमिसन ग्रीरको कार्यालयका एक अधिकारीले बताएअनुसार, बिना कुनै परिवर्तन सम्झौतालाई रबर–स्ट्याम्प (आँखा चिम्लेर स्वीकृत) गरेर लम्ब्याउनु राष्ट्रिय हितमा छैन र वार्ताहरू विद्यमान चासोहरूलाई सम्बोधन गर्नमा केन्द्रित हुनेछन् ।
प्रशासनले क्यानडा र मेक्सिकोसँग छुट्टाछुट्टै वार्ता गर्ने योजना बनाएको ग्रीरले बताए । उनले ओटावा (क्यानडा) सँगको सम्बन्ध बढी तनावपूर्ण रहेको बताए ।
ग्रीरले फक्स बिजनेससँग भने, ‘सामान्यतया भन्नुपर्दा यी वार्ताहरू द्विपक्षीय र छुट्टाछुट्टै रूपमा अगाडि बढ्नेछन् । क्यानडासँगको वार्ता अझ चुनौतीपूर्ण छ ।’
मेक्सिकाकी राष्ट्रपति क्लाउडिया सेनबाउमले अमेरिका बाहिरिने सम्भावनालाई खारेज गरेकी छन् । उनले आधिकारिक छलफलहरूमा यो विषय नउठेको बताएकी छन् ।
‘हामीलाई यसमा विश्वास छैन र फोन वार्ताहरूमा पनि यस्तो कुरा कहिल्यै भनिएको छैन,’ उनले भनिन् ।
क्यानडाका प्रधानमन्त्री मार्क कार्नीले आफूले ट्रम्पसँग सकारात्मक कुराकानी गरेको र त्यसमा सीयूएसएमए समीक्षाबारे पनि छलफल भएको बताए । क्यानडाको व्यापार मन्त्रालयले यसबारे थप टिप्पणी गर्न अस्वीकार गरेको छ ।
सीयूएसएमएले झण्डै २० खर्ब अमेरिकी डलर बराबरको वस्तु र सेवालाई ओगटेको छ र यो उत्तर अमेरिकी व्यापारको मेरुदण्ड हो । अमेरिका यसबाट बाहिरिएमा क्यानडा र मेक्सिकोको निर्यातमा उच्च भन्सार शुल्क लाग्न सक्छ र आपूर्ति शृंखला प्रभावित हुन सक्छ ।
नवीकरण भएमा यो सम्झौता अर्को १६ वर्षसम्म लागू रहनेछ । भएन भने यसले सन् २०३६ मा समाप्त नभएसम्म वार्षिक समीक्षाको प्रक्रिया सुरु गर्न सक्छ । कुनै पनि देशले ६ महिनाको सूचना दिएर सम्झौताबाट बाहिरिन सक्छ ।
व्यापारिक समूह र सांसदहरूले सम्झौता रद्द गर्ने कदमको विरोध गर्ने अपेक्षा गरिएको छ । उच्च भन्सारले मुद्रास्फीति बढाउन सक्छ र उपभोक्ताहरूको लागत वृद्धि गर्न सक्छ भनी उनीहरूले चेतावनी दिएका छन् ।
ट्रम्पले प्रायः आफ्ना सहयोगीहरूसँग नीतिगत विकल्पहरूको परीक्षण गर्ने गर्छन् र विगतका वार्ताहरूमा सहुलियत प्राप्त गर्न सम्झौताबाट बाहिरिने धम्कीलाई लिभरेजका रूपमा प्रयोग गर्दै आएका छन् ।
हालै उनले क्यानडा र मेक्सिकोमाथि दबाब बढाएका छन् जसमा उच्च भन्सार शुल्क लगाउने र पूर्वाधार आयोजनाहरूमा प्रतिबन्ध लगाउने धम्कीहरू समावेश छन् ।
सन् २०२० मा ट्रम्पले कडा नियम, उच्च अमेरिकी सामग्रीको आवश्यकता र आवधिक समीक्षाको प्रावधान राख्न दबाब दिएपछि सीयूएसएमएले उत्तर अमेरिकी स्वतन्त्र व्यापार सम्झौतालाई प्रतिस्थापन गरेको थियो ।
उनले वर्तमान सम्झौताको वार्ता आफैंले गरेका थिए । ट्रम्पले बारम्बार उत्तर अमेरिकी व्यापार सम्बन्धको आलोचना गर्दै आएका छन् र विकल्पको रूपमा द्विपक्षीय सम्झौताहरूको सुझाव दिएका छन् ।
बाहिरिने कुनै पनि औपचारिक कदम सम्भवतः वार्तामा आफ्नो पकड बलियो बनाउन प्रयोग गरिनेछ । तर, ट्रम्पले वास्तवमै यसलाई कार्यान्वयन गर्न खोजेका हुन् वा होइनन् भन्ने स्पष्ट छैन ।
प्रतिक्रिया