काठमाडौं । यसैबीच अमेरिकी राष्ट्रपति डोनाल्ड ट्रम्पले भेनेजुएलाका राष्ट्रपति मादुरो र उनकी पत्नीलाई पक्राउ गरी अमेरिकाको कब्जामा राखेको दाबी गरेका छन्।
सामाजिक सञ्जाल ‘ट्रुथ सोशल’ मा पोस्ट गर्दै ट्रम्पले भनेका छन्,‘ ‘संयुक्त राज्य अमेरिकाले भेनेजुएला र यसका नेता, राष्ट्रपति निकोलस मदुरो विरुद्ध ठूलो मात्रामा हमला सफलतापूर्वक गरेको छ, जसलाई उनकी श्रीमतीसहित पक्राउ गरी देशबाट निकालिएको छ।’
यसैबीच अमेरिकाले भेनेजुएलाको राजधानीमा आक्रमण गरेको छ।
बढ्दो तनावका बीच अमेरिकाले भेनेजुएलाको राजधानीस्थित सैनिक क्षेत्रहरूमा आक्रमण गरेको हो।
प्रत्यक्षदर्शीहरूका अनुसार शहरको बीचभागमा रहेको सैन्य हवाई अड्डा ‘ला कार्लोटा’ र मुख्य सैन्य अड्डा ‘फुएर्ते तिउना’मा आक्रमण गरिएको हो।
यी दुवै स्थानमा भएको भनिएका धमाकाका भिडियोहरू सामाजिक सञ्जालमा सार्वजनिक भएका छन्।
बीबीसीका अनुसार शनिबार बिहान सबेरै काराकासको आकाशमा धमाका र विमान उडेको गतिविधिबारे ट्रम्प प्रशासनका अधिकारीहरूलाई जानकारी रहेको जनाएको छ।
यो घटनाक्रम अमेरिकी राष्ट्रपति डोनाल्ड ट्रम्प प्रशासनले भेनेजुएलाका राष्ट्रपति निकोलस मादुरोमाथि केही सातादेखि बढाउँदै आएको दबाबपछि देखिएको हो।
अमेरिकी राष्ट्रपति ट्रम्पले मादुरो अमेरिकाभित्र लागूऔषध तस्करी र आपराधिक गतिविधिमा संलग्न रहेको आरोप लगाउँदै आएका छन्।
अमेरिकी अधिकारीहरूले सीबीएस न्युजलाई दिएको जानकारीअनुसार राष्ट्रपति ट्रम्पले भेनेजुएलाभित्रका सैन्य ठिकानासहित विभिन्न स्थानमा आक्रमणको आदेश दिएका छन्।
यसैबीच भेनेजुएलाका राष्ट्रपति निकोलस मादुरोले देशभर राष्ट्रिय आपतकाल घोषणा गरेका गरेका थिए । उनले अमेरिकी आक्रमणको कडा निन्दा गर्दै यसलाई भेनेजुएलाको तेल र खनिज स्रोतमा कब्जा जमाउने प्रयासको रूपमा व्याख्या गरेका छन्।
सरकारी विज्ञप्तिमा राजधानी काराकासमा भएका आक्रमणहरूको उद्देश्य ‘भेनेजुएलाका रणनीतिक स्रोत, विशेषगरी तेल र खनिजमा नियन्त्रण जमाउनु’ र ‘देशको राजनीतिक स्वतन्त्रतालाई बलपूर्वक कमजोर पार्नु’ रहेको उल्लेख गरिएको छ।
राष्ट्रपति मादुरोले ‘सम्पूर्ण देशमा बाह्य उथलपुथलको अवस्था’ घोषणा गर्ने आदेशमा हस्ताक्षर गर्दै त्यसलाई तुरुन्त कार्यान्वयन गर्न निर्देशन दिएका छन्। साथै, सबै राष्ट्रिय रक्षा योजनाहरू ‘उचित समय र उपयुक्त परिस्थितिमा’ लागू गर्न आदेश दिएका छन्।
सन् १९८९ मा सैन्य नेता म्यानुएल नोरिएगालाई पदच्युत गर्न पानामामा आक्रमण गरेपछि अमेरिकाले ल्याटिन अमेरिकी क्षेत्रमा त्यस्तो प्रत्यक्ष हस्तक्षेप गरेको थिएन ।
प्रतिक्रिया