च्याटजीपीटीमा एक अर्ब डलर लगानी किन गर्दैछ डिज्नी ?

एजेन्सी । मनोरञ्जन कम्पनी डिज्नीले कृत्रिम बुद्धिमत्ता (एआई) कम्पनी ओपनएआईमा १ अर्ब डलरको स्वपुँजी हिस्सा (इक्विटी स्टेक) लिने भएको छ ।

साथै, दुई कम्पनीबीच एउटा सम्झौता भएको छ जसअन्तर्गत डिज्नीका प्रसिद्ध पात्रहरूलाई ओपनएआईको भिडियो निर्माण गर्ने प्लेटफर्म सोरामा प्रयोग गर्न पाइनेछ ।

डिज्नीको यो लगानी सोराका लागि पहिलो यस्तो ठूलो इजाजतपत्र सम्झौता हो ।

यस सम्झौताअनुसार, ओपनएआईको छोटो भिडियो बनाउने सामाजिक सञ्जाल सोराका प्रयोगकर्ताहरूले २०० भन्दा बढी डिज्नी एनिमेटेड पात्रहरू प्रयोग गरेर भिडियो बनाउन पाउनेछन् ।

ती पात्रहरूमा मिकी र मिनी माउस, एरियल, बेल र सिन्ड्रेला जस्ता डिज्नीका राजकुमारीहरू तथा फ्रोजन, मोआना र टोय स्टोरीका पात्रहरू समावेश छन् । मार्भलका ब्ल्याक प्यान्थर र लुकासफिल्मका स्टार वार्सका पात्र योडालाई पनि यसमा समेटिएको छ । यद्यपि, यस सम्झौतामा कलाकारहरूको अनुहार वा आवाजको प्रयोग भने समावेश छैन ।

ओपनएआईको लोकप्रिय च्याटबोट च्याटजीपीटीका प्रयोगकर्ताहरूले पनि अब डिज्नीका पात्रहरू प्रयोग गरेर चित्रहरू निर्माण गर्नका लागि कमान्ड दिन सक्नेछन् ।

डिज्नीका सीईओ रोबर्ट ए. इगरले एक विज्ञप्तिमा भनेका छन्, ‘आर्टिफिसियल इन्टेलिजेन्सको तीव्र प्रगति हाम्रो उद्योगका लागि एक महत्त्वपूर्ण क्षण हो । ओपनएआईसँगको यस सहकार्यमार्फत हामी जेनेरेटिभ एआई प्रयोग गरेर हाम्रा कथाहरूको पहुँचलाई जिम्मेवार ढंगले विस्तार गर्नेछौं र साथसाथै सिर्जनाकर्ता र उनीहरूका कार्यहरूको सम्मान र सुरक्षा पनि गर्नेछौं ।’

प्रतिलिपि अधिकार उल्लंघन र सर्कुलर डिलका कारण एआई बबल फुट्ने डर बढेको भन्दै आलोचना खेपिरहेको ओपनएआईले यो सम्झौताबाट रचनात्मक समुदाय र एआई कसरी मिलेर अघि बढ्न सक्छन् भन्ने देखाएको बताएको छ ।

ओपनएआईका सहसंस्थापक तथा सीईओ साम अल्टम्यानले भने, ‘डिज्नी कथावाचनको विश्वव्यापी मानक हो । सोरा र च्याटजीपीटीमार्फत मानिसहरूलाई उत्कृष्ट सामग्री सिर्जना गर्ने र अनुभव गर्ने नयाँ तरिका प्रदान गर्न पाउँदा हामी उत्साहित छौं ।’

घोषणाको केही समयपछि इगर र अल्टम्यानले सीएनबीसीसँग कुरा गर्दै यस सम्झौताले सर्जकहरूलाई कुनै पनि हिसाबले खतरा नपुर्याउने दाबी गरे । इगरले भने, ‘यसको विपरीत, मलाई लाग्छ यसले उनीहरूलाई सम्मान गर्छ किनकि यसमा इजाजतपत्र शुल्क जोडिएको छ ।’ ओपनएआईले यी पात्रहरूको प्रयोगका लागि निश्चित सुरक्षाका उपायहरू राख्ने कुरामा डिज्नी विश्वस्त रहेको पनि उनले बताए ।

इगरका अनुसार, यो तीन वर्षे सम्झौताको सुरुवाती चरणमा केही हदसम्म विशिष्टता रहनेछ । अन्य कम्पनीसँग पनि यस्तै सम्झौता हुने सम्भावनाबारे सोधिएको प्रश्नमा अल्टम्यानले भविष्यमा जे पनि हुन सक्ने बताए ।

डिज्नीले यसअघि आफ्नो बौद्धिक सम्पत्ति अनुमति बिना प्रयोग गरेको भन्दै एआई कम्पनीहरूविरुद्ध कडा कदम चाल्दै आएको छ । गत साता मात्रै डिज्नीले गुगललाई आफ्ना सामग्रीको प्रयोग रोक्न भन्दै कानूनी चेतावनी पठाएको छ ।

उक्त पत्रमा गुगलका एआई उत्पादनहरू भियो र नानो बनानाले प्रयोगकर्ताहरूलाई डिज्नीका पात्रहरू चित्रण गर्ने भिडियो र तस्बिर बनाउन दिएर ठूलो मात्रामा प्रतिलिपि अधिकार उल्लंघन गरिरहेको दाबी गरिएको छ । पत्रमा गुगलले यस्तो उल्लंघन रोक्न कुनै पनि प्राविधिक उपाय लागू नगरेको आरोप लगाइएको छ ।

जवाफमा गुगलका प्रवक्ताले डिज्नीसँग आफ्नो पुरानो र आपसी हितको सम्बन्ध रहेको र यसबारे छलफल जारी राख्ने बताएका छन् ।

डिज्नीले यसअघि मेटा र क्यारेक्टर एआईलाई पनि यस्तै चेतावनी पठाइसकेको छ । गत जुन महिनामा डिज्नी र युनिभर्सलले एआई फोटो जेनरेशन कम्पनी मिडजर्नीविरुद्ध प्रतिलिपि अधिकार कानून उल्लंघन गरेको भन्दै मुद्दा दायर गरेका थिए ।