काठमाडौं । नेपालमा वाणिज्य बैंकको प्रमुख कार्यकारी अधिकृत अर्थात् सीईओ पद चानचुने ओहोदा होइन । नेपाल राष्ट्र बैंकबाट ‘क’ वर्गको इजाजतप्राप्त यी बैंकका सीईओ ‘ग्याल्मर जब’मध्ये एक हो । बैंकमा काम गर्ने सबैको सीईओसम्म बन्ने हुटहुटी हुन्छ ।
खर्ब बढी निक्षेप परिचालन गरी सोही बराबरको कर्जा प्रवाहको जिम्मेवारी बहन गर्ने सीईओले अर्बौं रुपैयाँ बराबरको पुँजीवापत लगानीकर्तालाई प्रतिफल दिनुपर्ने म्यान्डेट लिएका हुन्छन् । यतिको जिम्मेवारी अनि करोडभन्दा बढी तलब, भत्ता, सेवा र सुविधा। केन्द्रीय बैंकसँग नियमित संसर्ग र जताततै नाम । सीईओ पदको चार्म छुट्टै छ ।
राम्रो पोशाकमा सुसज्जित भएर सयौं कर्मचारी नेतृत्व गर्ने र यस्तो काम गर्दा पाइने सम्मान तथा मानले सीईओ जीवन निकै आकर्षक रहेको बुझाई आम मानिसमा छ ।
बाहिरबाट हेर्दा सीईओको जीवन क्या शानको देखिएला । बैंकले नै धेरैजसो आवश्यकता पूरा गरिदिएको हुन्छ । गाली गर्नेहरुले सीईओलाई कराडौं तलब खाने भनेर तथानाम गाली पनि गर्छन् ।
१० वर्षअघि र अहिलेको तुलना गर्ने हो भने सीईओको तलब भत्तामा सबैको आँखा पर्छ । १० वर्षअघि कुनै बैंकको सीईओले वार्षिक १ करोड ९० लाख रुपैयाँ तलब खान्थे । अर्थात् महिनाको करिब १६ लाख रुपैयाँ । आव २०७०/७१ मा एनआईसी एशिया बैंकको सीईओको तलब थियो, त्यो ।
अहिले स्थिति फेरिएको छ तर सीईओको तलब भत्ता घटेको भने छैन । अहिले त एउटै बैंकको सीईओले मासिक ७१ लाख रुपैयाँसम्म तलब खान्छन् भन्दा तपाईंलाई अचम्म लाग्न सक्छ । हो, स्ट्यान्डर्ड चार्टर्ड बैंकका सीईओलाई बैंकले गत आर्थिक वर्ष अर्थात् आव २०८०/८१ मा ८ करोड ५१ लाख ९८ हजार ९ सय ९१ रुपैयाँ भुक्तानी गरेको छ । अर्थात्, महिनाको करिब ७१ लाख रुपैयाँ । अमेरिकी डलरमा हिसाब गर्दा मासिक करिब ५१ हजार ।
सञ्चालनमा रहेका १७ निजी क्षेत्रको लगानी रहेको बैंकका प्रमुख कार्यकारी अधिकृतले प्राप्त गर्ने तलब १० वर्षमा करिब तेब्बर बनेको छ । अर्थात्, तलब वृद्धिदर वार्षिक औसत २० प्रतिशतले भएको देखिन्छ ।
यसबीचमा धेरै बैंकहरु मर्जरमा गए । हाल सञ्चालनमा रहेका ग्लोबल आईएमई, कुमारी, हिमालयन, लक्ष्मी सनराइज, नबिल, प्रभु र एनआईएमबी त्यतिबेला एकभन्दा बढी बैंक गाभिएर बनेकाले तलब वृद्धिदर तथ्यांकमा देखिएको भन्दा कम हुनसक्छ ।
कतिको शानदार हो सीईओको तलब ?
आम नेपालीले वार्षिक औसत १४०० अमेरिकी डलर अर्थात् करिब २ लाख रुपैयाँ कमाउँदा सीईओ औसत करिब ३ करोड रुपैयाँ छ । भन्नुको अर्थ १५० गुणा बढी ।
तथ्यांकमा शानदार देखिने सीईओ तलब भत्ता व्यवहारमा पनि शानदार नै हो त ? वा १० वर्षमा जुन दरले तलब वृद्धि भयो, त्यो बढेको काम कारबाही र थपिएको दायित्व मुताविक छ कि छैन ? यो आलेखमा हामी यीनै प्रश्नको जवाफ खोज्दै छौं ।
वाणिज्य बैंकका सीईओले वार्षिक न्यूनतम १ करोड १९ लाख देखि ८ करोड ५२ लाख रुपैयाँसम्म तलब, भत्ता, सेवा सुविधा पाउँछन् । यतिका तलब पाउनेले गर्ने काम पनि चानचुने छैन ।
निक्षेप संकलन र कर्जा प्रवाहको उचित तालमेलबाट नाफा निकालेर सेयरधनीलाई प्रतिफल दिनुपर्छ । कर्मचारीहरुको नेतृत्व गर्नुपर्छ, उनीहरुलाई बोनस तथा सेवा सुविधाको निर्णय पनि गर्नैपर्छ । राम्रो नराम्रो कामको जस अपजस छ छँदैछ ।
१० वर्षको अवधिमा बैंकका सीईओहरुको तलब औसतमा १९२ प्रतिशतले बढेको छ ।
यो अवधिमा सबैभन्दा बढी प्रभु बैंकका सीईओको तलब ११ गुणाले बढेको छ । १० वर्षअघि प्रभु बैंकले सीईओलाई मासिक २ लाख ८२ हजार १६६ रुपैयाँ दिने गरेको थियो । अहिले यो रकम बढेर मासिक ३२ लाख ८६ हजार रुपैयाँ पुगेको छ ।
स्टयान्डर्ड चार्टर्ड बैंकले १० वर्षअघि सीईओलाई मासिक ११ लाख ९१ हजार ६६६ रुपैयाँ तलब भत्ता दिने गरेको थियो । यो रकम बढेर ७० लाख ९९ हजार ९१६ रुपैयाँ पुगेको छ । यो अवधिमा सीईओको तलब भत्ता ६ गुणाले बढेको हो ।
यस्तै १० वर्षअघि एभरेष्ट बैंकका सीईओको तलब भत्ता मासिक ६ लाख ८ हजार ३३३ रुपैयाँ थियो । अहिले १०.१ गुणाले बढेर ६१ लाख ३८ हजार ७५० रुपैयाँ पुगेको छ । गत आव दिएको यो रकम सीईओसहित उच्च व्यवस्थापन समूहको हो ।
१० वर्षको अवधिमा एनआईसी एशिया बैंकका सीईओको तलब भत्ता १.९ गुणाले बढेर मासिक २९ लाख ६५ हजार ५९९ रुपैयाँ पुगेको छ । जुन १० वर्षअघि १५ लाख ८३ हजार ३३३ रुपैयाँ रहेको थियो ।
१० वर्षअघि नेपाल इन्भेष्टमेन्ट बैंकले सीईओलाई दिने तलब भत्ता १३ लाख ८ हजार ३३३ रुपैयाँ रहेको थियो । अहिले नेपाल बैंकका सीईओको तलब भत्ता २ गुणाले बढेर २५ लाख ५२ हजार ८३३ रुपैयाँ पुगेको थियो ।
१० वर्षको अवधिमा कुमारी बैंकले सीईओको तलब भत्ता मासिक ५ लाख ७५ हजार रुपैयाँबाट बढाएर २२ लाख १३ हजार ३१९ रुपैयाँ पुर्याइएको छ ।
१० वर्षको अवधिमा नबिल बैंकले सीईओको तलब २.२ गुणाले बढेएर मासिक १९ लाख ६७ हजार १४९ रुपैयाँ पुगेको छ । १० वर्षअघि ८ लाख ८३ हजार ३३३ रुपैयाँ रहेको थियो ।
ग्लोबल आइएमई बैंकका सीईओको तलब भत्ता १० वर्षअघि मासिक ८ लाख १२ हजार ५०० रुपैयाँ थियो । अहिले २.३ गुणाले बढेर १८ लाख ४७ हजार १५४ रुपैयाँ पुगेको छ ।
१० वर्षअघि सीईओलाई ७ लाख २५ हजार रुपैयाँ तलब भत्ता दिएको हिमालयन बैंकले अहिले २.५ गुणाले बढाएर मासिक १७ लाख ९१ हजार ८६१ रुपैयाँ पुगेको छ ।
हाल एसबीआई बैंकका सीईओको तलब भत्ता मासिक १७ लाख ३ हजार ८८३ रुपैयाँ रहेको छ । १० वर्षअघि ३ लाख ९१ हजार ६६६ रुपैयाँ रहेको थियो । यो अवधिमा सीईओको तलब ४.४ गुणाले बढेको छ ।
१० वर्षअघि लक्ष्मी सनराइन बैंकले सीईओलाई १० लाख ८३ हजार ३३३ रुपैयाँ रहेको थियो । अहिले १.५ गुणाले बढेर १६ लाख २३ हजार ६६७ रुपैयाँ पुगेको छ ।
१० वर्षअघि माछापुच्छ्रे बैंकले सीईओलाई मासिक ६ लाख २९ हजार १६६ रुपैयाँ तलब दिएको थियो । अहिले २.५ गुणाले बढेर १५ लाख ५६ हजार ७५० रुपैयाँ पुगेको छ ।
सिद्धार्थ बैंकले १० वर्षअघि सीईओलाई महिनामा ७ लाख तलब भत्ता दिएकोमा अहिले २ गुणाले बढाएर १४ लाख १९ हजार ३९९ रुपैयाँ पुर्याएको छ ।
सिटिजन्स बैंकका सीईओको तलब भत्ता १० वर्षअघि मासिक ६ लाख ५० हजार थियो । अहिले २.१ गुणाले बढेर १३ लाख ७७ हजार ६६७ रुपैयाँ रहेको छ । प्राइम बैंकका सीईओको तलब भत्ता १० वर्षअघि ९ लाख ६६ हजार ६६६ रुपैयाँ मासिक रहेकामा १० वर्षमा १.४ गुणाले बढेर १३ लाख ६६ हजार ३५२ रुपैयाँ पुगेको छ ।
यस्तै १० वर्षअघि सानिमा बैंकले सीईओलाई ७ लाख ६२ हजार ६२० रुपैयाँ तलब भत्ता दिएकोमा अहिले १.३ गुणाले बढेर मासिक ९ लाख ९४ हजार ६६७ रुपैयाँ पुगेको छ ।
जति बढ्यो नाफा, त्यति नै बढ्यो तलब
विगत १० वर्षमा बैंकहरुले सीईओलाई गरेको लगानी, आर्जन गरेको नाफा, परिचालन गरेको निक्षेप र प्रवाह गरेको कर्जालाई पनि हेरौं ।
आर्थिक वर्ष २०७०/७१ को तुलनामा २०८०/८१ मा आइपुग्दा १७ वटा निजी क्षेत्रका बैंकले परिचालन गरेको निक्षेप ६.३ गुणाले बढेको छ भने प्रवाह गरेको कर्जा ६.८ गुणाले बढेको छ । यो अवधिमा बैंकहरुले आर्जन गरेको नाफा २.९ गुणाले बढेको छ । यो १० वर्षको अधिमा बैंकले सीईओलाई दिएको तलब, भत्ता २.९ गुणाले बढेको छ ।
अब हेरौ, बैंकले सीईओलाई गरेको लगानीअनुसार निक्षेप परिचालन, कर्जा प्रवाह र नाफा आर्जन भएको छ कि छैन ?
पछिल्लो १० वर्षमा वाणिज्य बैंकहरुले सीईओमा जसरी लगानी बढाउँदै गएका छन्, त्यसको परिणाम पनि सोही अनुसार नै देखिएको छ ।
आर्थिक वर्ष २०७०/७१ र २०८०/८१ को तुलना गर्दा यस्तो तथ्य अघि सरेको छ ।
१० वर्षअघि सीईओमा बैंकले १ रुपैयाँ खर्च गर्दा ८८ रुपैयाँ १५ पैसा खुद नाफा आर्जन गर्दथे । गत आवको तथ्य केलाउँदा बैंकहरुले सीईओलाई १ रुपैयाँ खर्च गर्दा बैंकले ८८ रुपैयाँ २५ पैसा नाफा कमाएको छ ।
१० वर्षअघि सीईओलाई १ रुपैयाँ खर्च गर्दा नबिल बैंकले सर्वाधिक २१९ रुपैयाँ खुद नाफा आर्जन गर्दथ्यो भने एनएमबि बैंकले सबैभन्दा कम २९ रुपैयाँ कमाउँथ्यो । अहिले सीईओमा गरेको प्रतिरुपैयाँ खर्चबाट ग्लोबल आईएमई बैंकले सर्वाधिक २७७ रुपैयाँ कमाउँदा कुमारी बैंकले सबैभन्दा कम कुमारी बैंकले १७ पैसामात्र कमाएको छ ।
यता सीईओले जुन दरमा निक्षेप र कर्जा ह्यान्डल गर्छन् सोहीअनुसार तलब भने नबढेको देखिएको छ ।
१० वर्षअघि बैंकले १ रुपैयाँ खर्च गर्दा सीईओले ४ हजार ३९६ रुपैयाँ बराबरको निक्षेप परिचालन गरी ३ हजार ३२१ रुपैयाँ बराबरको कर्जा प्रवाह गर्दथे । गत आव प्रतिरुपैयाँ सीईओ खर्च ९ हजार ५३० रुपैयाँ र ७ हजार ७१४ रुपैयाँ कर्जा ह्यान्डल भएको छ ।
यसले सीईओमा खर्च तेब्बरले बढ्दा पनि सीईओमा कामको भार निकै बढीले विस्तार भएको देखाउँछ ।
१० वर्षअघि तलबका हिसाबले सबैभन्दा बढी निक्षेप नेपाल एसबीआई बैंकका सीईओले ह्यान्डल गर्थे ।
सीईओमा १ रूपैयाँ खर्च गर्दा कुन बैंकले कति नाफा कमाउँछ ?
नबिल बैंकले आव २०७०/७१ मा सीईओमा १ रुपैयाँ खर्च गर्दा २१८.८३ रुपैयाँ नाफा कमाएको थियो । गत आवमा यस्तो नाफा २६२.५२ रुपैयाँ रहेको छ । बैंकले सीईओमा बढाएको सेवा सुविधा उत्पादक बनेको देखिन्छ । यसबीचमा नबिल बैंकले नेपाल बंगलादेश बैंकलाई प्राप्ति गरेको छ ।
एभरेष्ट बैंकले १० वर्षअघि सीईओमा गरेको प्रतिरुपैयाँ खर्चले २०१.५२ रुपैयाँ नाफा हुन्थ्यो । अहिले सीईओमा १ रुपैयाँ खर्च गर्दा बैंकले ५०.२७ रुपैयाँमात्र कमाउँछ ।
आव २०७०/७१ मा सीईओलाई १ रुपैयाँ खर्च गर्दा एनएमबि बैंकले सबैभन्दा कम २८.९७ रुपैयाँ नाफा कमाउँथ्यो । अर्थात् सीईओमा गरेको लगानीमध्ये सबैभन्दा कम उत्पादक थियो । गत आवको असार मसान्तको तथ्यांक हेर्दा सीईओलाई १ रुपैयाँ खर्च गर्दा बैंकले ९२.९० रुपैयाँ नाफा आर्जन गरेको छ ।
१० वर्षको अवधिलाई हेर्दा माछापुच्छ्रे बैंकले आव २०७०/७१ मा सीईओलाई १ रुपैयाँ खर्च गर्दा ६० रुपैयाँ २२ पैसा नाफा कमाएको थियो । गत आवको असार मसान्तसम्म यस्तो नाफा ५५ रुपैयाँ ९५ पैसा छ ।
यस्तै सिटिजन्स बैंकले आव २०७०/७१ मा सीईओका लागि १ रुपैयाँ खर्च गर्दा ६३ रुपैयाँ ८६ पैसा नाफा आर्जन गरेको थियो । गत आवकमा बैैंकले सीईओलाई १ रुपैयाँ खर्च गर्दा ७९ रुपैयाँ ८७ पैसा नाफा कमाएको छ ।
एनआईसी एशिया बैंकले आव २०७०/७१ मा सीईओलाई १ रुपैयाँ खर्च गर्दा ४३.७७ रुपैयाँ नाफा आएको थियो । गत आवको सोही अवधिमा आइपुग्दा बैंकले सीईओलाई १ रुपैयाँ खर्च गर्दा १९.७१ रुपैयाँ मात्रै नाफा आर्जन गरेको छ । नाफाको हिसाब गर्दा बैंकको नाफा पनि १० वर्ष अघिको तुलनामा कम भएको छ ।
आव २०७०/७१ मा ग्लोबल आइएमई बैंकले सीईओका लागि १ रुपैयाँ खर्च गर्दा ९९.९० रुपैयाँ नाफा आर्जन गरेको थियो । गत आवको सोही अवधिमा बैंकले सीईओलाई १ रुपैयाँ खर्च गर्दा २७६.८९ रुपैयाँ नाफा आर्जन गरेको छ । वाणिज्य बैंकहरुमध्ये ग्लोबल आईएमईले सीईओमा गरेको लगानी सबैभन्दा उत्पादक हो । १० वर्षको अवधिमा बैंकको नाफा ६.३ गुणाले बढेको छ । यसबीचमा ग्लोबलमा जनता र बैंक अफ काठमाण्डू बैंक समाहित भएका छन् ।
गत आवमा नेपाल एसबीआई बैंकले सीईओलाई १ रुपैयाँ लगानी गर्दा बैंकले ९७.८१ रुपैयाँ नाफा कमाएको छ । तर आव २०७०/७१ मा यस्तो नाफा १९६.३८ रुपैयाँ थियो । सीईओलाई दिएको सेवासुविधा बैंकका लागि लाभदायक बनेको देखिँदैन ।
१० वर्षअघि कुमारी बैंकले सीईओमा १ रुपैयाँ लगानी गर्दा ४९.५२ रुपैयाँ नाफा कमाएको थियो । गत आवमा बैंकले सीईओलाई १ रुपैयाँ लगानी गर्दा १ रुपैयाँ पनि नाफा कमाउन सकेको छैन । सीईओमा प्रतिरुपैयाँ खर्चवापत १७ पैसा मात्रै नाफा भएको छ।
आव २०७०/७१ को तुलनामा कुमारीका सीईओको तलब ३.८ गुणाले बढेको छ भने निक्षेप १२.७, कर्जा १२.९ गुुणाले बढ्दा नाफा भने निकै खुम्चिएको तथ्याङ्कले देखाएको छ ।
सानिमा बैंकले सीईओमाथी गरेको लगानीको प्रतिफल निकै राम्रोसँग लिएको छ । आव २०७०/७१ मा १ रुपैयाँ सीईओलाई लगानी गर्दा ४६.७२ रुपैयाँ नाफा कमाएको थियो । आव २०८०/८१ को असार मसान्तसम्मा १ रुपैयाँ लगानी गर्दा २००.८५ रुपैयाँ नाफा कमाएको छ ।
यस्तै हिमालयन बैंकले आव २०७०/७१ मा सीईओलाई १ रुपैयाँ लगानी गर्दा ११०.२४ रुपैयाँ नाफा कमाएको थियो । गत आव २०८०/८१ को असार मसान्तमा आइपुुग्दा यस्तो नाफा ५७.५९ रुपैयाँमा सिमित भएको छ ।
सिद्धार्थ बैंकले आव २०७०/७१ मा सीईओलाई १ रुपैयाँ लगानी गर्दा ८४.०७ रुपैयाँ नाफा कमाएको थियो । गत आव २०८०/८१ को असार मसान्तमा आइपुुग्दा यस्तो नाफा १८०.८३ रुपैयाँ रहेको छ ।
लक्ष्मी सनराइज बैंकले आव २०७०/७१ मा सीईओलाई १ रुपैयाँ खर्च गर्दा ३६.५३ रुपैयाँ नाफा कमाएको थियो । गत आव २०८०/८१ को असार मसान्तमा आइपुुग्दा यस्तो नाफा १४९.८९ रुपैयाँ रहेको छ ।
आव २०७०/७१ मा स्टयान्डर्ड चार्टर्ड बैंकले सीईओलाई १ रुपैयाँ लगानी गर्दा ९३.४७ रुपैयाँ नाफा कमाएको थियो । गत आव २०८०/८१ को असार मसान्तमा आइपुुग्दा यस्तो नाफा ३८.४४ रुपैयाँमा सिमित भएको छ ।
१० वर्षअघि प्रभु बैंकले सीईओलाई १ रुपैयाँ लगानी गर्दा १५९.५४ रुपैयाँ नाफा कमाएको थियो । गत आवको असार मसान्तसम्म बैंकले सीईओलाई १ रुपैयाँ लगानीवापत १२.९३ रुपैयाँ नाफा कमाएको छ ।
१० वर्षअघि प्राइम बैंकले सीईओलाई १ रुपैयाँ खर्च गर्दा ४७.७१ रुपैयाँ नाफा कमाएको थियो । गत आवको असार मसान्तसम्म बैंकले सीईओलाई १ रुपैयाँ लगानी गर्दा २१३.९५ रुपैयाँमा नाफा कमाएको छ ।
१० वर्षअघि नेपाल इन्भेष्टमेन्ट मेगा बैंकले सीईओलाई १ रुपैयाँ लगानी गर्दा १२३.५४ रुपैयाँ नाफा कमाएको थियो । गत आवको असार मसान्तसम्म बैंकले सीईओलाई १ रुपैयाँ लगानी गर्दा १३४.१३ रुपैयाँ रहेको छ ।
सीईओमा १ रुपैयाँ खर्च गर्दा कुन बैंकले कति निक्षेप ह्यान्डल गरे ?
बैंकहरुले प्रमुख कार्यकारी अधिकृतमा १ रुपैयाँ खर्च गर्दा उनले कति रुपैयाँबराबरको निक्षेप र कर्जा ह्यान्डल गर्छन् भन्ने हिसाबले सीईओको कार्यकुशलता (इफिसियन्सी) मापन हुन्छ । कार्यकुशलताका आधारमा १० वर्षअघि नेपाल एसबिआई बैंकको सीईओ अग्रस्थानमा थिए, वर्तमान दिनमा भने नबिल बैंकको सीईको सबैभन्दा अगाडि छन् । यसैगरी १० वर्षअघि एनएमबि बैंकका सीईओले तलबका आधारमा सबैभन्दा कम निक्षेप कर्जा ह्यान्डल गर्दथे । आजको दिनमा एक रुपैयाँ तलब पाउँदा सबैभन्दा कम निक्षेप कर्जा ह्यान्डल गर्ने सीईओ स्ट्यान्डर्ड चार्टर्डका हुन् ।
माछापुच्छ्रे बैंकले आव २०७०/७१ मा सीईओलाई ७५ लाख ५० हजार रुपैयाँ खर्च गर्दा ३७ अर्ब १३ करोड २१ लाख रुपैयाँ निक्षेप परिचालन गरेको थियो । अर्थात् बैंकले सीईओमा १ रुपैयाँ खर्च गर्दा सीईओले ४ हजार ९१८ रुपैयाँ बराबरको निक्षेप ह्यान्डल गरेका थिए । गत आवमा यस्तो निक्षेप ह्यान्डल गर्ने क्षमता ८ हजार ६३६ रुपैयाँ पुगेको छ । यो अवधिमा निक्षेप ह्याण्डले गर्ने क्षमता करिब दोब्बरले नै बढेको हो ।
यस्तै सिटिजन्स बैंकले आव २०७०/७१ मा सीईओका लागि १ रुपैयाँ खर्चबराबर ३ हजार ५८५ रुपैयाँ ८६ पैसा निक्षेप परिचालन गरेको थियो । गत आवमा बैंकले सीईओलाई १ रुपैयाँ खर्च गर्दा ११ हजार ५९४ रुपैयाँ १६ पैसा निक्षेप परिचालन गरेको छ ।
आव २०७०/७१ मा एनआईसी एशिया बैंकले सीईओलाई १ रुपैयाँ खर्च गर्दा २ हजार ३६७.५९ रुपैयाँ निक्षेप परिचालन गरेको थियो । गत आवमा बैंकले सीईओलाई १ रुपैयाँ खर्च गर्दा निक्षेप परिचालन बढेर १० हजार १३१.०९ रुपैयाँ पुगेको छ ।
आव २०७०/७१ मा ग्लोबल आइएमई बैंकले सीईओका लागि १ रुपैयाँ खर्च गर्दा ५ हजार ३६३.२९ रुपैयाँ निक्षेप परिचालन गरेको बैंकले गत आवमा सीईओलाई प्रतिरुपैयाँ खर्चबराबर २२ हजार ७७७.८१ रुपैयाँ निक्षेप परिचालन गरेको छ ।
गत आवको असार मसान्तमा नेपाल एसबिआई बैंकले सीईओलाई १ रुपैयाँ लगानी गर्दा ८ हजार ५७९.३१ रुपैयाँ निक्षेप परिचालन गरेको थियो । तर आव २०७०/७१ मा ११ हजार ५९४.२५ रुपैयाँ निक्षेप परिचालन गरेको थियो । १० वर्षअघि अघि यो अवधिमा बैंकले सीईओलाई गरेको लगानी हेर्दा निक्षेप परिचालनको हिस्सा घटेको छ ।
१० वर्षअघि कुमारी बैंकले सीईओलाई १ रुपैयाँ लगानी गर्दा ३ हजार ९९६.८७ रुपैयाँ निक्षेप परिचालन गरेको थियो । गत आवको असार मसान्तसम्म बैंकले सीईओलाई १ रुपैयाँ लगानी गर्दा १३ हजार २०६.२७ रुपैयाँ निक्षेप परिचालन गरेको छ ।
आव २०७०/७१ मा सीईओलाई १ रुपैयाँ खर्च गर्दा एनएमबि बैंकले १ हजार ९१४.२६ रुपैयाँ निक्षेप परिचालन गरेको थियो । गत आवको असार मसान्तसम्म १ रुपैयाँ खर्च गर्दा ९ हजार ४००.५७ रुपैयाँ निक्षेप परिचालन गरेको छ ।
सानिमा बैंकले सीईओमाथी गरेको लगानी निक्षेप तर्फ हेर्दा निकै प्रगति देखिएको छ । आव २०७०/७१ मा १ रुपैयाँ सीईओलाई लगानी गर्दा २ हजार ७१८.०२ रुपैयाँ निक्षेप परिचालन गरेको बैंकले आव २०८०/८१ को असार मसान्तसम्मा १ रुपैयाँ लगानी गर्दा १६ हजारु ७०४.०२ रुपैयाँ निक्षेप परिचालन गरेको छ ।
यस्तै हिमालयन बैंकले आव २०७०/७१ मा सीईओलाई १ रुपैयाँ लगानी गर्दा ७ हजार ९२०.९२ रुपैयाँ निक्षेप परिचालन गरेकोमा गत आव २०८०/८१ को असार मसान्तमा आइपुुग्दा १३ हजार ८४६.१९ रुपैयाँ निक्षेप परिचालन गरेको हो ।
सिद्धार्थ बैंकले आव २०७०/७१ मा सीईओलाई १ रुपैयाँ लगानी गर्दा ४ हजार २१५.३२ रुपैयाँ निक्षेप परिचालन गरेको थियो । गत आव २०८०/८१ को असार मसान्तमा आइपुुग्दा यस्तो निक्षेप १४ हजार ३७८.७४ रुपैयाँ पुगेको छ ।
लक्ष्मी सनराइज बैंकले आव २०७०/७१ मा सीईओलाई १ रुपैयाँ लगानी गर्दा २ हजार ३४८.३४८.४३ रुपैयाँ निक्षेप परिचालन गरेको थियो । गत आव २०८०/८१ को असार मसान्तमा आइपुुग्दा यस्तो निक्षेप बढेर १६ हजार ८८२.१३ रुपैयाँ रहेको छ ।
आव २०७०/७१ मा स्टयान्डर्ड चार्टर्ड बैंकले सीईओलाई १ रुपैयाँ लगानी गर्दा ३ हजार २३७ रुपैयाँ निक्षेप परिचालन गरेको थियो । गत आव २०८०/८१ को असार मसान्तमा आइपुुग्दा १ हजार ३४७.७४ रुपैयाँमा सिमित भएको छ ।
नबिल बैंकले आव २०७०/७१ मा सीईओलाई १ रुपैयाँ लगानी गर्दा ७ हजार ११२.२६ रुपैयाँ निक्षेप परिचालन गरेको थियो । गत आवको असार मसान्तसम्म १९ हजार ८५८.९१ रुपैयाँ पुगेको छ ।
१० वर्षअघि प्रभु बैंकका सीईओले १ रुपैयाँ तलब पाउँदा ९ हजार ७९३.३६ रुपैयाँ निक्षेप परिचालन गरेको थियो । गत आवको असार मसान्तसम्म बैंकले सीईओलाई १ रुपैयाँ लगानी गर्दा परिचालन हुने निक्षेप घटेर ७ हजार ९१८.१७ रुपैयाँ कायम भएको छ ।
१० वर्षअघि एभरेष्ट बैंकले सीईओलाई १ रुपैयाँ लगानी गर्दा ८ हजार ५०७.९६ रुपैयाँ निक्षेप परिचालन गरेको थियो । जुन गत आवको असार मसान्तसम्म बैंकले सीईओलाई १ रुपैयाँ लगानी गर्दा ३ हजार १६८.२४ रुपैयाँमा सिमित भएको छ ।
१० वर्षअघि प्राइम बैंकले सीईओलाई १ रुपैयाँ लगानी गर्दा २ हजार ९३४.९४ रुपैयाँ निक्षेप परिचालन गर्दा गत आवको असार मसान्तसम्म बैंकले सीईओलाई १ रुपैयाँ लगानी गर्दा १३ हजार १४३.८८ रुपैयाँमा निक्षेप परिचालन गरेको थियो ।
१० वर्षअघि नेपाल इन्भेष्टमेन्ट मेगा बैंकले सीईओलाई १ रुपैयाँ लगानी गर्दा ४ हजार ७०२.६१ रुपैयाँ निक्षेप परिचालन गरेको बैंकले गत आवको असार मसान्तसम्म सीईओलाई १ रुपैयाँ लगानी गर्दा १३ हजार २७९.६९ रुपैयाँ निक्षेप परिचालन गरेको छ ।
कर्जातर्फ हेर्दा माछापुच्छ्रे बैंकले आव २०७०/७१ मा सीईओलाई १ रुपैयाँ खर्च गर्दा ३ हजार ९१२.७७ रुपैयाँ कर्जा प्रवाह गरेको थियो । गत आवको असार मसान्तसम्ममा ७ हजार ५८.२७ रुपैयाँ पुगेको छ ।
यस्तै सिटिजन्स बैंकले आव २०७०/७१ मा सीईओका लागि १ रुपैयाँ खर्च गर्दा २ हजार ९७० रुपैयाँ ९८ पैसा कर्जा प्रवाह गरेको थियो । गत आवको सोही अवधिमा बैैंकले सीईओलाई १ रुपैयाँ खर्च गर्दा ९ हजार ५३२ रुपैयाँ २६ पैसा कर्जा प्रवाह गरेको छ ।
आव २०७०/७१ मा एनआईसी एशिया बैंकले सीईओलाई १ रुपैयाँ खर्च गर्दा १ हजार ९६३.४७ रुपैयाँ कर्जा प्रावह गरेको थियो । गत आवको सोही अवधिमा आइपुग्दा बैंकले सीईओलाई १ रुपैयाँ खर्च गर्दा कर्जा प्रवाह बढेर ८ हजार १७.८६ रुपैयाँ पुगेको छ ।
आव २०७०/७१ मा ग्लोबल आइएमई बैंकले सीईओका लागि १ रुपैयाँ खर्च गर्दा ४ हजार २८४.८९ रुपैयाँ कर्जा प्रवाह गरेको थियो । गत आवको सोही अवधिमा सीईओलाई १ रुपैयाँ खर्च गर्दा १७ हजार २६९.२४ रुपैयाँ कर्जा प्रवाह गरेको छ ।
गत आवको असार मसान्तमा एसबिआई बैंकले सीईओलाई १ रुपैयाँ लगानी गर्दा ६ हजार ५०३.२० रुपैयाँ कर्जा प्रवाह गरेको थियो । तर आव २०७०/७१ मा ७ हजार ५०६.२९ रुपैयाँ कर्जा प्रवाह गरेको थियो ।
१० वर्षअघि कुमारी बैंकले सीईओलाई १ रुपैयाँ लगानी गर्दा ३ हजार ३०५.५८ रुपैयाँ कर्जा प्रवाह गरेको थियो । गत आवको असार मसान्तसम्म बैंकले सीईओलाई १ रुपैयाँ लगानी गर्दा ११ हजार ४७.३१ रुपैयाँ कर्जा प्रवाह गरेको छ ।
आव २०७०/७१ मा सीईओलाई १ रुपैयाँ खर्च गर्दा एनएमबि बैंकले १ हजार ४४६.४१ रुपैयाँ कर्जा प्रवाह गरेको थियो । गत आवको असार मसान्तसम्म सीईओलाई १ रुपैयाँ खर्च गर्दा ८ हजार ४६९.३३ रुपैयाँ कर्जा प्रवाह गरेको छ ।
सानिमा बैंकले १० वर्ष अघि सीईओलाई १ रुपैयाँ लगानी गर्दा २ हजार २२६.०४ रुपैयाँ कर्जा प्रवाह गरेको थियो । बैंकले आव २०८०/८१ को असार मसान्तसम्मा १ रुपैयाँ लगानी गर्दा १३ हजार ८१८.९१ रुपैयाँ कर्जा प्रवाह गरेको छ ।
यस्तै हिमालयन बैंकले आव २०७०/७१ मा सीईओलाई १ रुपैयाँ लगानी गर्दा ५ हजार ८१०.११ रुपैयाँ कर्जा प्रवाह गरेकोमा गत आव २०८०/८१ को असार मसान्तमा आइपुग्दा ११ हजार ४९२.२० रुपैयाँ कर्जा प्रवाह गरेको हो ।
सिद्धार्थ बैंकले आव २०७०/७१ मा सीईओलाई १ रुपैयाँ लगानी गर्दा ३ हजार ३३१.६३ रुपैयाँ कर्जा प्रवाह गरेकोे थियो । गत आव २०८०/८१ को असार मसान्तमा आइपुुग्दा यस्तो कर्जा ११ हजार ९४९.८९ रुपैयाँ पुगेको छ ।
लक्ष्मी सनराइज बैंकले आव २०७०/७१ मा सीईओलाई १ रुपैयाँ लगानी गर्दा १ हजार ७५४.२२ रुपैयाँ कर्जा प्रवाह गरेको थियो । गत आव २०८०/८१ को असार मसान्तमा आइपुुग्दा यस्तो कर्जा प्रवाह १३ हजार ३२३.४८ रुपैयाँ रुपैयाँ पुगेको छ ।
आव २०७०/७१ मा स्टयान्डर्ड चार्टर्ड बैंकले सीईओलाई १ रुपैयाँ लगानी गर्दा १ हजार ८१६ रुपैयाँ कर्जा प्रवाह गरेको थियो । गत आव २०८०/८१ को असार मसान्तमा आइपुुग्दा १ हजार ६९.४८ रुपैयाँमा सिमित भएको छ ।
नबिल बैंकले आव २०७०/७१ मा सीईओलाई १ रुपैयाँ लगानी गर्दा ५ हजार ३०१.८९ रुपैयाँ कर्जा प्रवाह गरेको थियो । गत आवको असार मसान्तसम्म १६ हजार ३४०.२४ रुपैयाँ पुगेको छ ।
१० वर्षअघि प्रभु बैंकले सीईओलाई १ रुपैयाँ खर्च गर्दा ८ हजार ३३.८७ रुपैयाँ कर्जा प्रवाह गरेको थियो । गत आवको असार मसान्तसम्म बैंकले सीईओलाई १ रुपैयाँ लगानी गर्दा ५ हजार ९४६.७१ रुपैयाँ मात्रै रहेको छ ।
१० वर्षअघि एभरेष्ट बैंकले सीईओलाई १ रुपैयाँ लगानी गर्दा ६ हजार ६३७.०३ रुपैयाँ कर्जा प्रवाह गरेको थियो । जुन गत आवको असार मसान्तसम्म बैंकले सीईओलाई १ रुपैयाँ लगानी गर्दा २ हजार ५२३.१५ रुपैयाँमा सिमित भएको छ ।
१० वर्षअघि प्राइम बैंकले सीईओलाई १ रुपैयाँ लगानी गर्दा २ हजार ३९९.७१ रुपैयाँ कर्जा प्रवाह गरेको थियो । गत आवको असार मसान्तसम्म बैंकले सीईओलाई १ रुपैयाँ लगानी गर्दा ११ हजार ८२७.११ रुपैयाँमा कर्जा परिचालन गरेको थियो ।
१० वर्षअघि नेपाल इन्भेष्टमेन्ट मेगा बैंकले सीईओलाई १ रुपैयाँ लगानी गर्दा ३ हजार ४०४.९७ रुपैयाँ कर्जा प्रवाह गरेको बैंकले गत आवको असार मसान्तसम्म सीईओलाई १ रुपैयाँ लगानी गर्दा १० हजार ३७१.४८ रुपैयाँ कर्जा प्रवाह गरेको छ ।
प्रतिक्रिया