निर्माण व्यवसायीहरूले गरे चरणबद्ध आन्दोलनको घोषणा

काठमाडौं । निर्माण व्यवसायीहरूले आन्दोलनको घोषणा गरेका छन् ।

माघ ३ गते (भोलि) देखि चरणबद्ध आन्दोलनमा जाने तयारी भएको नेपाल निर्माण व्यवसायी महासंघले जनाएको छ ।

निर्माण व्यवसायी महासंघका महासचिव रोशन दाहालले लामो समयदेखि आफूहरुले सरकारसँग विभिन्न माग राख्दै आएको भए पनि सुनुवाइ नभएकाले आन्दोलनमा उत्रिनुपर्ने बाध्यता आएको बताए ।

महासंघले माघ ३ गतेदेखि ७ गतेसम्म १४ बुँदे मागसहित प्रधानमन्त्री र विकासे मन्त्रीलाई ज्ञापनपत्र बुझाउने छ । साथै १८ गते माइतीघर मण्डलामा धर्ना दिने, २० गते प्रधानमन्त्री निवास बालुवाटारमा धर्ना दिने र २१ गतेदेखि राजधानी प्रवेश गरेर पूर्वपश्चिमका नाका ठप्प पार्ने कार्यक्रम तय भएको महासंघले जनाएको छ ।

पहिलो चरणको आन्दोलनबाट पनि माग पूरा नभए राष्ट्रिय गौरवका आयोजनासहित सबै खालका निर्माण कार्य ठप्प पार्ने महासंघले जनाएको छ ।

निर्माण सामग्रीको मूल्य वृद्धि, लामो समयदेखि सरकारले बक्यौता भुक्तानी नगरेको, राष्ट्र बैंकले दिएको सुविधा कटौती लगायतका कारण निर्माण उद्योग संकटमा परेको उनको भनाइ छ ।

सिमन्ट उत्पादकहरुले उत्पादन कटौती गरेर त्यसको कृतिक अभाव गरेको, कालोबजारी गरेर मूल्य बढाएको निर्माण व्यवसायी महासंघका अध्यक्ष रवि सिंहले बताए ।