गौशालामा मृत भेटिइन् युवती: नयाँ वर्षको दिन सँगै बसेका युवक ढोकामा ताला लगाएर फरार

काठमाडौं । काठमाडौंको गौशालास्थित बागमती होटलमा एक युवती मृत फेला परेकी छन् । होटलको कोठा नम्बर ३०८ मा बसेकी उनले बुधवार दिउँसो साढे २ बजेसम्म ढोका नखोलेपछि प्रहरीलाई खबर गरिएको थियो ।

मृतक युवती कागेश्वरी मनोहरा नगरपालिका निवासी अन्दाजी २३ वर्षीया रहेको जनाइएको छ ।

प्रहरीका अनुसार घटनामा शंकास्पद रहेको छ ।

युवती एक युवकसँग सो होटलमा आएको प्रारम्भिक अनुसन्धानमा खुलेको छ ।

नयाँ वर्षको अघिल्लो दिन ती युवक र युवती होटलमा बसेका थिए । भोलिपल्ट युवक बाहिरबाट होटलको ताला लगाएर ‘केहीबेरमा आउँछु’ भनेर निस्केका थिए ।

युवक नफर्किए पछि होटल सञ्चालकले प्रहरीलाई खबर गरे । प्रहरीका अनुसार, युवतीको शव बेडमा पाइएको छ । फरार युवकलाई लोकेट गरिएको प्रहरीको भनाइ छ ।

घटनाबारे अनुसन्धान जिल्ला प्रहरी परिसर, काठमाडौं, काठमाडौँ उपत्यका अपराध अनुसन्धान कार्यालय र प्रहरी वृत्त गौशालाबाट भइरहेको छ ।