फाइनल खेलको टिकट केही बेरमै ‘सोल्ड आउट’ हुँदा क्यानले कमायो ५९ लाख

काठमाडौं । जारी नेपाल प्रिमियर लिग (एनपीएल) अन्तर्गत ४ दिनको खेलहरुमा टिकट सोल्ड आउट भयो । नेपाल क्रिकेट संघ (क्यान)ले आयोजना गरेको फ्रेन्चाइजी लिगको उद्घाटन खेल, गत २२ गते (शनिबार), पहिलो क्वालिफायर र फाइनल खेलमा टिक सोल्ड आउट भए ।

कूल १२ हजार दर्शक क्षमता भएको त्रिवि क्रिकेट मैदानमा क्यानले ११ हजार टिकट खल्तीमार्फत बेच्ने गर्छ । भीआईपीतर्फ ८०० र साधारणतर्फ १० हजार २०० टिकट क्यानले बेच्ने गरेको छ । अन्य केही पास भने क्यानले टिमका लगानीकर्ता, स्पोन्सर, सिद्धार्थ बैंक र एनसेलका लागि राख्ने गरेको छ ।

क्यानले फाइनल खेलका लागि भीआईपीतर्फको टिकट १००० रुपैयाँको दरले बेचेको छ। क्यानले भीआईपीर्फको ८०० टिकट बेच्दा ८ लाख रुपैयाँ आम्दानी गर्छ । त्यस्तै सधारणतर्फको १० हजार २०० टिकट ५०० रुपैयाँका दरले बेच्दा ५१ लाख आम्दानी गरेको छ ।

समग्रमा क्यानले फाइनल खेलमा टिकटबाट मात्र ५९ लाख आम्दानी गरेको छ।

फाइनल खेलको टिकट खुलेको डेढ घण्टामै बिक्री भएको थियो । भीआईपी तर्फको टिकट भने १ मिनेटमै सोल्ड आउट भएको थियो ।

क्यानका प्रवक्ता छुम्बी लामाले पूरै टिकट बिक्रीको हिसाब अहिले नै गर्न नसकिने भए पनि खल्तीले हरेक दिन ११ हजार टिकट बिक्रीका लागि राखेको बताए ।

‘हामीले पूरै टिकट सोल्ड आउट हुने दिन कति आम्दानी हुन्छ भन्ने कुरा अहिले नै भन्न सक्दैनौं । तर, खल्तीले हरेक दिन ११ हजार टिकट बिक्रीका लागि राखेको हुन्छ । एकिन हिसाब आउन समय लाग्छ,’ लामाले क्लिकमान्डुसँगको कुराकानीमा भने ।

क्यानले एनपीएलको टिमहरु बिक्री गरेर मात्र करिब १७ करोड आम्दानी गरिसकेको छ । क्यानले खुला बिडिङ गर्दै आठ फ्रेन्चाइजीबाट १६ करोड ८८ लाख ९३ हजार २३१ रुपैयाँ आम्दानी गरेको थियो । त्यस्तै ब्रान्ड डिजिटल लजिक प्रालिलाई एनपीएलको कमर्सियल राइट्सको अधिकार बेच्दा क्यानले झण्डै ६ करोड प्राप्त गरेको छ ।

एनपीएल नेपाल क्रिकेट एशोसिएसन क्यानले आयोजना गरेको हो । झण्डै १ अर्ब रुपैयाँको बजेट लाग्ने आकलन गरिएको प्रतियोगिताका विजेताले नेपाली खेल इतिहासमै सबैभन्दा ठूलो रकमको पुरस्कार राशी पाउने छन् । विजेताले १ करोड ११ लाख पाउने छन् । उपविजेताले ५५ लाख पाउँदा तेस्रोले ३० लाख र चौथोले २० लाख पाउने छन् ।

क्यान आफैंले आयोजना गरेकाले त्यसको प्रत्यक्ष फाइदा भने उसलाई हुने छ र त्यो रकम क्रिकेटको विकासका लागि खर्च गरिने क्यान सचिव पारस खड्का बताउँछन् ।

आम्दानीको ५० प्रतिशत रकम भने क्यानले ८ वटा फ्रेञ्चाइज टोलीलाई बाँड्नेछ । टीम किन्नका लागि ८ फेन्चाइजले १ करोडदेखि साढे ३ करोड रुपैयाँसम्म खर्च गरेका छन् । ८ वटामध्ये सबैभन्दा सस्तोमा खरिद भएको टीम कर्णाली याक्स हो । जसले १ करोड ११ लाख लगानी गरेको छ भने महँगोमा किनिएको टीम पोखरा एभेन्जर्स हो । जसलाई किन्न ३ करोड ५७ लाख रुपैयाँ खर्च भएको थियो ।