लेखा समिति सदस्यमा बाँस्कोटालाई नियुक्ती गर्ने निर्णय फिर्ता लिन ट्रान्सपरेन्सी इन्टरनेशनलको माग

क्लिकमान्डु २०७८ वैशाख ३ गते १७:०२ मा प्रकाशित

काठमाडौं । ट्रान्सपरेन्सी इन्टरनेशनले नेपालले सार्वजनिक लेखासमितिको सदस्यमा गोकुल बाँस्कोटालाई तोकिएको भन्दै उक्त निर्णय तत्काल फिर्ता गर्न माग गरेको छ ।

७० करोड रुपैयाँको घुस काण्डमा मुछिएका बाँस्कोटाको मुद्दा अहिले छिनोफानो नभइसकेकाले सदस्यमा सिफारिस गरिनु गलत भएको बताएको छ ।

‘सेक्युरिटी प्रेस खरिद प्रकरणमा मन्त्रीको हैसियतमा बाँस्कोटाले ७० करोड रुपैयाँ घूस मागेको ‘अडियो टेप’ सम्बन्धी प्रकरणको छिनोफानो भइसकेको छैन । लेखासमितिले सेक्युरिटी खरिद प्रक्रिया र अडियो टेपका विषयमा थप छानबिन गरी भ्रष्टाचार मुद्दा लगाउन २०७६ फागुन ३० मा अख्तियार दुरुपयोग अनुसन्धान आयोगलाई फाइल पठाएको थियो । लेखासमितिले छानबिन गरी मुद्दा नचलाएको विषयमा आयोगसँग जानकारी मागिरहेको अवस्था छ । बाँस्कोटालाई लेखासमितिकै सदस्य बनाएपछि यो प्रकरणमा पदीय प्रभाव पर्ने निश्चित भएकाले बाँस्कोटालाई लेखासमितिमा पठाइनु सर्वथा अनुचित छ ।’

ट्रान्सपरेन्सी इन्टरनेशनले जारी गरेको विज्ञप्तिमा भनिएको छ, ‘यो सिफारिस नेपाल सरकारको भ्रष्टाचार विरुद्धको ‘शून्य सहनशिलता’ नीतिको प्रतिकूल छ । बाँस्कोटालाई लेखासमितिको सदस्य बनाइनु संसदीय मान्यता, पद्धति र स्वार्थको द्वन्द्व सिद्धान्त प्रतिकूल भएको हुँदा यो विषयमा संसद् र एमाले संसदीय दल दुवै गम्भीर हुनुपर्छ । एमाले संसदीय दलको नेता प्रधानमन्त्री स्वयम् भएको हुँदा आफ्नै मान्यता विपरीतको यो निर्णय सच्याउनेतर्फ अग्रसर हुन जरुरी छ । मुलुककै ठूलो र जिम्मेवार सत्तारुढ पार्टीले आरोपित व्यक्तिलाई लेखासमितिमा पठाउने कार्य सुशासनविरुद्ध भएको हुँदा त्यो निर्णय तत्काल फिर्ता लिन ट्रान्सपरेन्सी इन्टरनेशनल ९टीआई० नेपाल माग गर्दछ ।’

ट्वीटरमा हामीलाई फलो गर्नुहोस्

तपाईको प्रतिक्रिया

हाम्रो सिफारिस

सम्बन्धित
टिप्स