एजेन्सी । इंग्ल्याण्डका सुपरस्टार जुड बेलिङ्घमले अर्जेन्टिनाका कप्तान लियोनेल मेस्सीसँग भएको आफ्नो चर्काचर्कीलाई सामान्य रूपमा लिएका छन् ।
विश्वकपको सेमिफाइनल खेलका क्रममा भएको यो घटनाको भिडियो सामाजिक सञ्जालमा भाइरल भएको थियो ।
जर्जियाको एटलान्टास्थित मर्सिडीज-बेन्ज स्टेडियममा बुधबार भएको खेलमा आफ्ना कट्टर प्रतिद्वन्द्वी अर्जेन्टिनासँग २-१ ले पराजित भएपछि ‘थ्री लायन्स’ (इंग्ल्याण्ड) सेमिफाइनलबाट बाहिरिएको छ ।
थोमस टुचेलको टोलीले ५५ औं मिनेटमा एन्थोनी गोर्डनको गोलमार्फत अग्रता लिएको थियो, तर साविक विश्व विजेताले खेलको अन्तिम समयमा एन्जो फर्नान्डेज र लाउटारो मार्टिनेजको गोलको मद्दतले पुनरागमन गर्यो ।
तर पहिलो हाफका क्रममा २३ वर्षीय बेलिङ्घम र ३९ वर्षीय मेस्सीबीच भएको चर्काचर्कीले फ्यानहरूको ध्यान तान्यो ।
रेफ्री इस्माइल एल्फाथले फल दिएपछि यी दुई विश्वकपका दिग्गज खेलाडीहरूबीच भनाभन भएको थियो ।
रियल म्याड्रिडका स्टार बेलिङ्घमले अन्तिममा केही बोलेको जस्तो देखिन्थ्यो, जसका कारण अर्जेन्टिनी लेजेन्ड (मेस्सी) केही बेर अचम्ममा परेका थिए ।
इन्टर मियामीका सुपरस्टार मेस्सीले बेलिङ्घमलाई व्यङ्ग्यात्मक नजरले हेर्दै टाउको हल्लाएर बेवास्ता गर्दै मैदानबाट बाहिरिएका थिए ।
तर, खेलपछि ती बहुमुखी मिडफिल्डर बेलिङ्घमले उनीहरूबीच ‘केही नराम्रो नभएको’ कुरामा जोड दिए । इंग्ल्याण्डका ती स्टारले उनीहरू केवल एउटा फलको बारेमा छलफल गरिरहेको र कुरा त्यहीँ सकिएको दाबी गरे ।
बेलिङ्घमले भने, ‘हामी वास्तवमा एउटा फलको बारेमा छलफल गर्दै थियौं, तर यो कुनै नराम्रो कुरा थिएन । मलाई थाहा छ सबैले यसलाई ठूलो मुद्दा बनाउनेछन्, तर वास्तवमा यो त्यस्तो ठूलो कुरा थिएन ।’
‘मैले अघि फल भएको सोचेको थिएँ र उनले भने, ‘मेरोमा भएको फल नि?’ अनि मैले भनें, ‘तिमी यो सामना गर्न सक्ने बलिया छौ’।’
‘उनको विरुद्ध खेल्न पाउनु एउटा सौभाग्य हो, उनीप्रति मेरो कुनै नराम्रो भावना छैन । स्पष्ट रूपमा म हार्ने टोलीमा छु, यसले धेरै चित्त दुख्छ, तर विश्वकै उत्कृष्ट खेलाडीमध्ये एकसँग खेल्न पाउनु गौरवको कुरा हो।’
प्रतिक्रिया