अफ्रिकी मुलुक नाइजरको विमानस्थलमा चल्यो गोली, सुनियो विस्फोटको आवाज

एजेन्सी । नाइजरको राजधानी नियामेको मुख्य विमानस्थलमा गोलीबारी र ठूला विस्फोटका आवाजहरू सुनिएको रोयटर्स समाचार एजेन्सीले खबर दिएको छ ।

एक प्रत्यक्षदर्शीले रोयटर्सलाई बताएअनुसार, मध्यरातको लगत्तै विस्फोटका आवाजहरू सुनिएको थियो । उक्त विमानस्थल बेस एरियने १०१ को छेउमा अवस्थित छ । त्यो सैन्य आधार शिविर पहिले अमेरिकी र त्यसपछि रुसी सेनाले प्रयोग गरेका थिए ।

टोगोको एयरलाइन आस्की सम्बद्ध एक स्रोतले द गार्डियनलाई बताएअनुसार, नियामे विमानस्थलको टार्माकमा रहेका त्यसका दुईवटा विमानको फ्युजलेज (विमानको मुख्य भाग) मा गोलीबारीका कारण धेरै प्वालहरू परेका छन् । कर्मचारीहरू त्यस समयमा आफ्नो होटलमा थिए तर उनीहरू देशमै अलपत्र परेका छन् ।

‘उनीहरूले दुवै विमान नष्ट गरे… उनीहरूले घटनास्थलमा प्रमाणहरू छोडेका छन्,’ स्रोतले भन्यो ।

गोली कसले चलाएको हो वा कुनै हताहती भएको छ कि छैन भन्ने कुरा अझै स्पष्ट हुन सकेको छैन । नाइजरका अधिकारीहरूले यस परिस्थितिको बारेमा अहिलेसम्म कुनै टिप्पणी गरेका छैनन् ।

जुलाई २०२३ मा, जनरल अब्दुरहमान टियानीको नेतृत्वमा रहेको नाइजरको राष्ट्रपतीय गार्डले लोकतान्त्रिक रूपमा निर्वाचित राष्ट्रपति मोहम्मद बाजुमलाई सत्ताच्युत गरेको थियो । त्यो विगत तीन वर्षभित्र पश्चिम र मध्य अफ्रिकामा भएको सातौं सफल कू थियो । त्यसयता यस क्षेत्रमा कम्तीमा एउटा सफल कू र दुईवटा असफल प्रयासहरू भएका छन् ।

सैनिक शासन (जुन्टा) ले संविधान निलम्बन गरेको छ र अन्तर्राष्ट्रिय निन्दा तथा सहायता कटौतीको सामना पनि गरेको छ ।

पश्चिम अफ्रिकी राज्यहरूको आर्थिक समुदाय (इकोवाश) ले प्रतिबन्धहरू लगाएपछि र सैन्य हस्तक्षेपको धम्की दिएपछि नाइजरले माली र बुर्किना फासोसँगै यस क्षेत्रीय समूहबाट आफूलाई अलग गरेको छ ।

ती दुवै देशमा पनि सैन्य शासन छ । सेप्टेम्बर २०२३ मा उनीहरूले एलायन्स अफ साहेल स्टेट्स गठन गरे । नाइजरले फ्रान्सेली र अमेरिकी सेनालाई पनि देश निकाला गरेको छ । यसले आफ्ना पूर्व परम्परागत सहयोगीहरूबाट टाढिँदै नयाँ भूराजनीतिक समीकरणको संकेत गर्छ ।

यस देशले अझै पनि जिहादीहरूको सामना गरिरहेको छ किनकि इस्लामिक स्टेट र अल–कायदासँग आबद्ध सशस्त्र समूहहरूले विशेषगरी माली र बुर्किना फासोसँगको त्रिदेशीय सीमा क्षेत्रमा आक्रमण जारी राखेका छन् । स्थिरता कायम गर्ने सैनिक शासनको वाचाका बाबजुद कू पछिको सुरक्षा अवस्था उल्लेखनीय रूपमा बिग्रिएको छ ।

नाइजरमा २०२४ मा विश्वव्यापी रूपमा आतंकवादबाट हुने मृत्युमा सबैभन्दा ठूलो वृद्धि रेकर्ड गरिएको छ जुन ९४ प्रतिशतले बढेर कुल ९३० पुगेको र यो इन्डेक्स सुरु भएदेखिकै देशको सबैभन्दा खराब स्थिति भएको ग्लोबल टेररिज्म इन्डेक्स २०२५ ले रिपोर्ट गरेको छ ।