एजेन्सी । अर्को साता बेलायतका प्रधानमन्त्री केर स्टार्मरको चीन भ्रमणका क्रममा स्वर्ण युगको व्यावसायिक संवादलाई पुनर्जीवित गर्ने तीन स्रोतहरूले रोयटर्स समाचार संस्थालाई बताएका छन् ।
यसमा दुवै पक्षका शीर्ष कम्पनीका कार्यकारीहरूलाई सहभागी हुन आमन्त्रण गरिएको छ ।
एस्ट्राजेनेका, बीपी, एचएसबीसी, इन्टरकन्टिनेन्टल होटल्स ग्रुप, ज्याग्वार ल्यान्ड रोभर, रोल्स रोयस, स्रोडर्स र स्ट्यान्डर्ड चार्टर्ड परिमार्जित बेलायत–चीन सीईओ काउन्सिलमा सहभागी हुने बेलायती कम्पनीहरूमध्ये रहेको चिनियाँ र बेलायती दुवै स्रोतहरूले बताएका छन् ।
यस काउन्सिलको अवधारणा सुरुमा सन् २०१८ मा तत्कालीन बेलायती प्रधानमन्त्री थेरेसा मे र चीनका तत्कालीन प्रधानमन्त्री ली खछ्याङले अघि सारेका थिए । त्यस समयमा दुवै पक्षले आफ्नो सम्बन्धलाई स्वर्ण युगको नाम दिएका थिए ।
चिनियाँ पक्षबाट बैंक अफ चाइना, चाइना कन्स्ट्रक्सन बैंक, चाइना मोबाइल, इन्डस्ट्रियल एन्ड कमर्सियल बैंक अफ चाइना, चाइना रेलवे रोलिङ स्टक कर्पोरेशन, चाइना नेशनल फर्मासुटिकल ग्रुप र बीवाइडी लगायतका कम्पनीहरूले प्रतिनिधित्व गर्ने अधिकारी र व्यवसायीहरूको मिश्रित स्रोतले थपे ।
यस विषयमा केही समयदेखि वार्ता चलिरहेको थियो । तर, स्टार्मरको भ्रमण मुख्यतया लन्डनमा युरोपको सबैभन्दा ठूलो दूतावास बनाउन चीनलाई अनुमति दिने कुरामा निर्भर थियो । त्यसको अनुमति मंगलबार प्राप्त भएको छ । त्यसपछि मात्र गम्भीर रूपमा वार्ता सुरु भएको उनीहरूले बताए ।
समूहको आधिकारिक अंग्रेजी नाम जस्ता विवरणहरू अझै तय हुन बाँकी रहेको एक व्यक्तिले बताए । बेलायती सरकारले शीर्षकमा सीईओ समावेश गर्न हिचकिचाइरहेको छ भने चिनियाँ पक्षले सन् २०१८ मा प्रयोग गरिएको चिनियाँ अनुवाद नै राख्ने योजना बनाएको छ ।
वार्ता अघि बढ्यो भने चीनको दोस्रो वरियताका अधिकारी प्रिमियर ली छ्याङले बेइजिङको प्रतिनिधित्व गर्नेछन् । बेलायती पक्षले शुक्रबारसम्ममा भ्रमण र स्टार्मरको तालिका सार्वजनिक गर्न सक्ने ती व्यक्तिले बताए ।
यद्यपि, सबै स्रोतहरूले अमेरिकाका राष्ट्रपति डोनल्ड ट्रम्पको ग्रीनल्यान्ड प्राप्त गर्ने धम्कीले स्टार्मरको भ्रमणलाई प्रभावित पार्न सक्ने भन्दै सचेत गराएका छन् । दूतावासको निर्णय हालै मात्र भएकोले भ्रमणका अन्य पक्षहरू अझै अन्तिम चरणमा रहेको उनीहरूले थपे ।
कुन–कुन कम्पनीका सीईओहरू सहभागी हुनेछन् भन्ने कुरा कसैले पनि पुष्टि गर्न सकेनन् । एक व्यवसायीले आफ्नो कम्पनीका प्रमुख कार्यकारीले भ्रमण हुनेमा निश्चित नभएकाले आउन अस्वीकार गरेको जानकारी दिए ।
रोयटर्सले सहभागी हुने अपेक्षा गरिएका सबै कम्पनीहरूलाई प्रतिक्रियाका लागि सम्पर्क गरेको थियो तर कसैले पनि तुरुन्तै जवाफ दिएनन् ।
स्टार्मर बेइजिङ गएमा सन् २०१८ पछि कुनै पनि बेलायती नेताको पहिलो चीन भ्रमण हुनेछ । अघिल्ला कन्जर्भेटिभ सरकारहरूले बेलायतलाई बेइजिङको सबैभन्दा बलियो समर्थकबाट कडा आलोचकमा बदलेको भए पनि स्टार्मर सरकारले विश्वको दोस्रो ठूलो अर्थतन्त्रसँग सम्बन्ध सुधार गर्ने लक्ष्य राखेको छ ।
गत वर्षको अन्त्यमा दिएको एक भाषणमा लेबर पार्टीका प्रधानमन्त्रीले अघिल्ला कन्जर्भेटिभ सरकारहरूलाई बेइजिङसँगको सम्बन्ध बिग्रन दिएर कर्तव्यको लापरवाही गरेको आरोप लगाएका थिए । फ्रान्सका राष्ट्रपति इमानुएल म्याक्रोनले सन् २०१८ यता दुईपटक र जर्मन नेताहरूले चारपटक चीन भ्रमण गरिसकेको उनले उल्लेख गरे ।
चीन वा बेलायत कसैले पनि आधिकारिक रूपमा स्टार्मरको भ्रमणको घोषणा गरेका छैनन् । बेइजिङस्थित बेलायती दूतावासले प्रधानमन्त्रीको भ्रमणको जानकारी सामान्य प्रक्रिया अनुसार नै दिइने बताएको छ । चीनको विदेश मन्त्रालयले प्रतिक्रियाका लागि गरिएको अनुरोधको जवाफ दिएन ।
सन् २०२० मा बेलायतले चीनको ह्वावेलाई आफ्नो ५जी नेटवर्कबाट प्रतिबन्ध लगाएपछि व्यावसायिक सम्बन्ध चिसिएको थियो । सन् २०२२ मा बेलायती सांसदहरूले फ्रान्सको ईडीएफद्वारा विकसित भइरहेको आणविक संयन्त्रमा चाइना जनरल न्युक्लियर पावर कर्पोरेसनको हिस्सा खरिद गर्न करदाताको पैसा प्रयोग गरेका थिए ।
सीजीएन सुरुको सीईओ काउन्सिलको हिस्सा थियो तर ह्वावेसँगै यसलाई पनि परिमार्जित समूहमा सहभागी गराइने सम्भावना कम छ । बेलायतको महत्त्वपूर्ण पूर्वाधारमा चिनियाँ कम्पनीहरूको भूमिकालाई लिएर देखिएका राजनीतिक संवेदनशीलताका कारण यसो गरिएको एक स्रोतले बतायो ।
सन् २०१८ मा भएको काउन्सिलको पहिलो बैठकमा चीनका लीले दुईतर्फी लगानीलाई तीव्रता दिने र द्विपक्षीय व्यापारलाई अझ स्वस्थ र सन्तुलित दिशामा विस्तार गर्ने यसको उद्देश्य रहेको बताएका थिए । त्यो कुरा यस पहलका आयोजकहरूमध्ये एक चाइना इन्टरनेशनल कन्ट्य्राक्टर एसोसिएसनले प्रकाशित गरेको विवरणमा उल्लेख छ ।
प्रतिक्रिया