युद्ध चलिरहेको बेलामा थाइल्यान्डले किन गर्यो आमचुनावको तयारी ?

एजेन्सी । थाइल्यान्डका प्रधानमन्त्री अनुतिन चार्नविराकुलले बिहीबार आफूले ‘जनतालाई सत्ता फिर्ता गरिरहेको’ घोषणा गर्दै संसद् विघटन गर्ने र पहिले अपेक्षा गरिएको भन्दा अगाडि नै चुनावको बाटो खुला गर्ने कदम चालेका छन् ।

सरकारका प्रवक्ता सिरिपोङ अंक्साकुलकियातले यो कदम संसद्को सबैभन्दा ठूलो दल विपक्षी पिपुल्स पार्टीसँगको असहमतिपछि आएको बताए । ‘हामी संसदमा अगाडि बढ्न नसक्ने भएकाले यस्तो भएको हो,’ उनले रोयटर्सलाई बताए ।

थाइल्यान्डका राजा महा वजिरालोङकर्नले उक्त निर्णयलाई अनुमोदन गरेका छन् । शुक्रबार राजपत्रले घोषणा गरेअनुसार, यसले तत्काल चुनावको बाटो खुला गरेको छ । देशको कानूनअनुसार संसद् भंग भएको ४५ देखि ६० दिनभित्र चुनाव गरिसक्नुपर्छ ।

यो राजनीतिक उथलपुथल थाइल्यान्ड र कम्बोडियाबीचको भीषण सीमा द्वन्द्वको चौथो दिनसँगै भएको छ । उक्त द्वन्द्वमा परी कम्तीमा २० जनाको मृत्यु भएको छ र करिब २०० जना घाइते भएका छन् ।

अनुतिनले बुधबार पत्रकारहरूलाई संसद् विघटनले सीमा क्षेत्रमा भइरहेको थाइल्यान्डको सैन्य कारबाहीलाई असर नगर्ने बताए । त्यहाँ एक दर्जनभन्दा बढी स्थानमा झडपहरू भएका छन् । केही स्थानमा भारी गोलाबारी समेत भएको छ ।

‘म जनतालाई सत्ता फिर्ता गर्दैछु,’ अनुतिनले बिहीबार अबेर सोशल मिडियामा भने ।

सन् २०२३ को अगस्टयता उनी थाइल्यान्डका तेस्रा प्रधानमन्त्री हुन् । राजनीतिक अस्थिरताले दक्षिणपूर्वी एसियाको दोस्रो ठूलो अर्थतन्त्रलाई असर पुर्याइरहेको छ । थाइल्यान्ड अहिले अमेरिकी कर, उच्च घरायसी ऋण र कमजोर उपभोगसँग जुधिरहेको छ ।

सेप्टेम्बर महिनामा अनुतिनले जनवरीको अन्त्यसम्ममा संसद् विघटन गर्ने र मार्च वा अप्रिलको सुरुमा आम चुनाव गर्ने योजना बनाएको बताएका थिए । तर, यस कदमले त्यो समयरेखालाई अघि सारेको छ ।

आफ्नो भुमजाईथाई पार्टीलाई सत्तारूढ गठबन्धनबाट बाहिर निकालेर र पिपुल्स पार्टीको समर्थन हासिल गरेपछि अनुतिन सत्तामा आएका थिए । पिपुल्स पार्टीले उनलाई समर्थन गर्ने सम्झौताको भागका रूपमा संविधान संशोधनमा जनमतसंग्रह सहित धेरै मागहरू अघि सारेको थियो ।

‘पिपुल्स पार्टीले आफूले चाहेको कुरा पाउन नसकेपछि अविश्वासको प्रस्ताव पेस गर्ने बताए र प्रधानमन्त्रीलाई तत्काल संसद् विघटन गर्न भने,’ सिरिपोङले बताए ।

भुमजाईथाई पार्टीले उनीहरूको सम्झौताका शर्तहरू पालना नगरेको पिपुल्स पार्टीका नेता नत्थाफोङ रुएङपान्यावुतले बिहीबार अबेर पत्रकारहरूलाई बताए । ‘हामीले संविधान संशोधनलाई अगाडि बढाउन विपक्षीको आवाज प्रयोग गर्ने प्रयास गरेका छौं,’ उनले भने ।