१० अर्ब रूपैयाँ बराबरको आन्तरिक ऋण लिँदै सरकार, ऋण दिन चाहनेले आज कबोल पेश गर्नुपर्ने

काठमाडौं । सरकारले १० अर्ब रूपैयाँ आन्तरिक ऋण उठाउने भएको छ । सार्वजनिक ऋण व्यवस्थापन कार्यालयका अनुसार विकास ऋणपत्रको बोलकबोल हुने भएको छ । विकास ऋणपत्र बोलकबोल मार्फत १० वर्षको लागि आन्तरिक ऋण उठाउन लागिएको हो ।

ऋणपत्र बोलबोल प्रक्रियाबाट निष्कासन हुने भएकोले बैंक तथा वित्तीय संस्था, गैर बैंक वित्तीय संस्था, बीमा कम्पनी, संगठित संस्था र नेपाली नागरिकलाई कबोल पेश गर्न आह्वान गरिएको छ । विकास ऋणपत्र २०९१ नाम दिइएको उक्त ऋणपत्रमा मंगलबार बोलकबोल भएर १८ माघ शुक्रबार निष्कासन हुनेछ ।

ऋणपत्रको ब्याजदर अर्धवार्षिक रुपमा भुक्तानी हुने र ब्याजमा कर लाग्नेछ । १८ माघ २०९१ मा ऋणपत्र परिपक्व हुनेछ । ऋणपत्र धितोमा राखेर कर्जा लिनदिन सक्ने सार्वजनिक ऋण व्यवस्थापन कार्यालयले जनाएको छ ।

ऋणपत्रको ब्याजदर बोलकबोलबाट तय हुनेछ । निष्कासन हुने ऋणपत्रको ८५ प्रतिशतले हुने ८ अर्ब ५० करोड प्रतिस्पर्धी रुपमा र १५ प्रतिशतले हुने १ अर्ब ५० करोड अप्रतिस्पर्धी रुपमा बिक्री हुनेछ ।