सामाजिक कोषमा असार मसान्तभित्र आवद्ध हुनेले जागिरबाट अलग हुने बित्तिकै ८०% रकम पाउने

काठमाडौं । सामाजिक सुरक्षा कोषको कार्यालयले असार मसान्तसम्म कोषमा आवद्ध हुने आग्रह गरेको छ ।

कोषको कानूनमा तोकिएअनुसार २०७८ असार मसान्तभित्र सबै निजी तथा संगठित संस्थालाई आवद्धताका लागि कोषले आह्वान गरेको हो ।

कोषले ०७८ असार मसान्तभित्रै कोषमा आवद्ध हुने योगदानकर्तालाई अवकास सुविधा योजनामा जम्मा भएको रकम जागिरबाट अलग भए वा अवकास पाएपछि नै लिन पाउने सुविधा समेत दिने उल्लेख गरेको छ ।

यसअघिसम्म कोषमा आवद्ध भइ योगदान गर्नेले ६० वर्षपछिमात्र अवकाश कोषको रकम उपयोग गर्न पाउने व्यवस्था गरिएको थियो ।

जसलाई कोषले अवकाश हुँदा वा जागिरबाट अलग हुँदा अवकाश कोषमा जम्मा भएको रकमको ८० प्रतिशतसम्म विषेश सापटीको रुपमा प्रदान गर्ने व्यवस्था गरेको हो ।

सो सुविधा ०७८ असार मसान्तभित्र योगदान शुरु गर्ने योगदानकर्ताले मात्र सो सुविधा उपयोग गर्न पाउने कोषले उल्लेख गरेको छ ।

हाल कोषको कार्यविधि, २०७५ को दोस्रो संशोधन लागू भइसेको छ । जसमा कोषबाट सञ्चालनमा ल्याइएको वृद्ध अवस्था सुरक्षा योजनाअन्तरर्गत जम्मा हुने योगदानकर्ताको आधारभूत परिश्रमको २८.३३ प्रतिशत रकम निवृत्तभरण योजनामा २० प्रतिशत जम्मा हुने व्यवस्था गरिएको छ । साथै, अवकाश सुविधा योजनामा ८.३३ प्रतिशत रकम जम्मा हुने प्रवधान गरिएको छ ।