बीवाईडीले ल्यायो नयाँ ८ सिरिज ताङ इलेक्ट्रिक एसयूभी, ८०० किलोमिटर रेन्जको दाबी

एजेन्सी । चिनियाँ विद्युतीय सवारीसाधन उत्पादक कम्पनी बीवाईडीले आफ्नो नयाँ ८ सिरिज ताङ इलेक्ट्रिक एसयूभीको उत्पादन डिजाइन सार्वजनिक गरेको छ ।

बीवाईडीको डाइनास्टी लाइनअपमा थपिएको यो ठूलो आकारको पूर्ण–विद्युतीय मोडलले बजारमा नयाँ चर्चा सिर्जना गरेको छ । बीवाईडी डाइनास्टी सिरिजका महाप्रबन्धक लु थ्यानले यस एसयूभीको अन्तिम डिजाइनका तस्बिरहरू सार्वजनिक गरेका हुन् जुन चीनको उद्योग तथा सूचना प्रविधि मन्त्रालयको सूचीमा समावेश भएलगत्तै बाहिर आएका हुन् । यससँगै गाडीको आकार, सिट क्षमता र पावरट्रेनका बारेमा आधिकारिक विवरणहरू पनि पुष्टि भएका छन् ।

बीवाईडीको आन्तरिक बजारमा अहिले ताङ एल, ९ सिरिज दा ताङ र अब यो नयाँ ८ सिरिज ताङ गरी ठूला एसयूभीहरूको परिवार विस्तार भएको छ । अन्तर्राष्ट्रिय बजारमा भने यस्तै मोडलहरूका लागि एट्टो ८ र सीलायन ८ जस्ता नामहरू प्रयोग गरिएको पाइन्छ ।

यस नयाँ एसयूभीले ताङ एललाई विस्थापित गर्ने हो वा छुट्टै मोडलका रूपमा रहने हो भन्नेबारे कम्पनीले अझै स्पष्ट पारेको छैन । एमआईआईटीको रेकर्ड अनुसार यो एसयूभी मध्यमदेखि ठूलो आकारको रहेको छ र यसले विशेषगरी विशाल पाँच–सिटे पारिवारिक संरचनामा ध्यान केन्द्रित गरेको छ ।

तर, नियामक तथ्यांकले यो गाडी पाँच र सात दुवै सिट क्षमतामा उपलब्ध हुन सक्ने देखाएको छ ।

यो नयाँ एसयूभीको लम्बाइ ५ हजार ४५ मिमी, चौडाइ १९ सय ८० मिमी र उचाइ १७ सय ६० मिमी रहेको छ भने यसको ह्विलबेस २९ सय ५० मिमी छ । पावरका लागि यसमा बीवाईडीको ३०० किलोवाट क्षमताको पर्मानेन्ट–म्याग्नेट सिन्क्रोनस मोटर प्रयोग गरिएको छ जसको अधिकतम गति प्रतिघण्टा २५० किलोमिटर रहेको छ । यसमा लिथियम आइरन फस्फेट ब्याट्री प्रयोग गरिएको छ तर ब्याट्रीको कुल क्षमताको विवरण भने सार्वजनिक गरिएको छैन ।

यस ८ सिरिज ताङको सबैभन्दा मुख्य आकर्षण भनेको बीवाईडीले गरेको ८०० किलोमिटरभन्दा बढीको रेन्जको दाबी हो । तर, यो रेन्ज कुन परीक्षण अवस्थामा प्राप्त भएको हो र ब्याट्रीको वास्तविक क्षमता कति हो भन्ने कुरा अझै खुल्न बाँकी छ ।

मिडिया रिपोर्टहरूले यस मोडलमा दोस्रो पुस्ताको ब्लेड ब्याट्री प्रविधि, फ्ल्यास चार्जिङ सुविधा र डि–सस ए इन्टेलिजेन्ट बडी कन्ट्रोल प्रणाली जस्ता अत्याधुनिक विशेषताहरू हुन सक्ने अनुमान गरेका छन् । बीवाईडीले सन् २०२६ को उत्तरार्धमा यो एसयूभी बजारमा ल्याउने अपेक्षा गरिएको छ तर यसको आधिकारिक मूल्य र बिक्री तालिकाको घोषणा हुन बाँकी छ ।

बीवाईडीको एसयूभी रणनीतिमा यी तीनवटा ठूला मोडलहरूलाई कसरी छुट्टाइनेछ भन्ने कुरा यसको बजार प्रवेशसँगै प्रस्ट हुनेछ ।