एजेन्सी । विश्वकपको आफ्नो पहिलो खेलमा पोर्चुगललाई तुलनात्मक रूपमा कमजोर मानिएको डिआर कङ्गोले १-१ को बराबरीमा रोकेको छ ।
जोआओ नेभिसले सुरुवाती अग्रता दिलाए पनि योआने विसाको गोलले खेल बराबरीमा ल्यायो। क्रिस्टियानो रोनाल्डो मैदानमा निकै निराश देखिए भने बर्नार्डो सिल्भाले पनि बिर्सनलायक प्रदर्शन गरे। रोबर्टो मार्टिनेजको टोली, जसलाई प्रतियोगिताको दाबेदार मानिएको थियो, सोही अनुसारको प्रदर्शन गर्न असफल रह्यो ।
खेलको छैटौं मिनेटमै पेड्रो नेटोको सटिक क्रसमा जोआओ नेभिसले उत्कृष्ट हेडरमार्फत गोल गर्दै पोर्चुगललाई अग्रता दिलाएका थिए। डिआर कङ्गो स्तब्ध भयो, तर पोर्चुगलले दबाब बढाउनुको सट्टा खेलको गति कम गर्यो र तालिम खेल जस्तै बिना लक्ष्य पास मात्र खेलिरह्यो ।
डिआर कङ्गोले काउन्टर अट्याकमार्फत केही मौका सिर्जना गर्यो। पहिलो हाफको इन्जुरी समयमा आर्थर मासुअकुको क्रसमा न्युकासलका विसाले हेडरमार्फत गोल गर्दै खेललाई बराबरीमा ल्याए ।
दोस्रो हाफको सुरुवातमै जोआओ कान्सेलोले एक उत्कृष्ट गोल गरे पनि त्यसलाई अफसाइड भन्दै मान्यता दिइएन । अर्कोतर्फ डिआर कङ्गोका सेड्रिक बाकाम्बुको प्रहार पोस्टमा ठोक्कियो। विकल्पका रूपमा आएका फ्रान्सिस्को कोन्सेसाओले केही राम्रा मुभहरू बनाएर रोनाल्डोलाई पास दिए पनि ४१ वर्षीय स्ट्राइकरले त्यसलाई सदुपयोग गर्न सकेनन् । अन्ततः सन् १९७४ पछि पहिलो पटक विश्वकप खेलिरहेको डिआर कङ्गोले पोर्चुगलसँग अंक खोस्न सफल भयो।
गोलकिपर र रक्षापङ्क्ति
डिओगो कोस्टा (५/१०):
उनको प्रदर्शनमा आत्मविश्वासको कमी देखियो। विपक्षीको गोलमा उनले क्रस रोक्ने प्रयाससम्म गरेनन्।
जोआओ कान्सेलो (६/१०):
रक्षात्मक रूपमा स्थिर र अगाडि बढ्न जाँगरिलो देखिए पनि दाहिने तर्फबाट खासै प्रभावकारी आक्रमण बुन्न सकेनन्। उनको एउटा सुन्दर ओभरहेड किक गोललाई अफसाइड घोषणा गरियो।
टोमस अराउजो (५/१०):
प्रायः समय राम्रो खेले पनि विपक्षीले गोल गर्दा उनको ध्यान भड्किएको देखियो, जसले गर्दा विपक्षी खेलाडी विसा खुल्ला रहे।
रेनाटो भेइगा (६/१०):
घाइते रुबेन डियासको अभाव हुन दिएनन्। उनको शारीरिक बल र खेल बुझ्ने क्षमता राम्रो देखियो। उनले दिएका केही लामा पासहरूलाई अग्रपंक्तिले सदुपयोग गर्न सकेन।
नुनो मेन्डेस (५/१०):
विपक्षीको क्षेत्रमा दौडधुप धेरै गरे पनि उनको अन्तिम पास (final ball) कमजोर रह्यो। ग्राउन्ड ड्युएलमा पनि उनले खासै राम्रो गर्न सकेनन्।
मध्यपङ्क्ति (मिडफिल्ड)
भिटिन्हा (६/१०):
आफ्नो सटिक पासिङको माध्यमबाट पोर्चुगलको खेललाई नियन्त्रणमा राखे। तर, विपक्षीको रक्षापंक्ति चिर्ने खालका पासहरू भन्दा पनि सुरक्षित पासमै केन्द्रित देखिए।
जोआओ नेभिस (७/१०):
उत्कृष्ट हेडरमार्फत गोल गर्दै आफ्नो क्षमता पुनः प्रमाणित गरे। मैदानभरि दौडिएर उनले खेलमा उर्जा थपेका थिए।
ब्रुनो फर्नान्डेस (५/१०):
म्यानचेस्टर युनाइटेडका कप्तानको प्रदर्शन फिक्का रह्यो। उनले बल नियन्त्रणमा राख्न खोजे पनि अन्तिम डिब्बामा आफ्नो सिर्जनशीलता देखाउन सकेनन्।
अग्रपङ्क्ति
बर्नार्डो सिल्भा (३/१०):
रियल मड्रिडमा भएको उनको आश्चर्यजनक सरुवालाई न्याय गर्न उनी पूर्णतया असफल भए। मैदानमा उनको उपस्थिति नै थाहा भएन र पहिलो हाफमै उनलाई परिवर्तन गरियो।
क्रिस्टियानो रोनाल्डो (३/१०):
क्वालिफाइङको प्रतिबन्ध फिफाले फुकुवा गरिदिए पनि रोनाल्डोले त्यसको कुनै फाइदा उठाउन सकेनन्। ९९ प्रतिशत खेलमा उनी हराए जस्तै देखिए र पोर्चुगलले पाएका दुई उत्कृष्ट मौकाहरू खेर फाले। अब उनी लगातार ९ वटा ठूला अन्तर्राष्ट्रिय खेलमा गोलविहीन बनेका छन्।
पेड्रो नेटो (६/१०):
नेभिसको गोलका लागि राम्रो असिस्ट गरे पनि त्यसपछि उनले खासै प्रभाव जमाउन सकेनन्। टोलीमा स्थान पक्का गर्न उनले अझै आक्रामक खेल्न आवश्यक छ।
विकल्प र म्यानेजर
फ्रान्सिस्को कोन्सेसाओ (७/१०):
दोस्रो हाफमा मैदान छिरेका उनले खेलमा नयाँ उर्जा र गति थपे। उनी नै पोर्चुगलका लागि सबैभन्दा खतरनाक देखिए।
राफायल लियो (५/१०):
७१ औं मिनेटमा मैदान छिरे पनि उनले खेलको नतिजामा कुनै प्रभाव पार्न सकेनन्।
नेल्सन सेमेडो
अन्तिम २० मिनेट मेन्डेसको ठाउँमा आए पनि उनले आक्रमणमा कुनै खास योगदान दिन सकेनन्।
गोन्कालो रामोस
८३ औं मिनेटमा मैदान छिरेकाले उनको मूल्यांकन गरिएन।
रोबर्टो मार्टिनेज (३/१०):
उनको रणनीतिक ढाँचा पुरानै शैलीको र अनुमान लगाउन सकिने खालको थियो। उमेर ढल्किसकेका रोनाल्डोमाथिको उनको अन्धविश्वास टोलीका लागि घातक साबित भयो। यदि अर्को खेलमा उज्वेकिस्तानसँग टोलीले राम्रो नगरे उनी ठूलो दबाबमा पर्नेछन्।
एजेन्सीहरूको सहयोगमा
प्रतिक्रिया