एजेन्सी । विभिन्न सञ्चारमाध्यमका रिपोर्टहरूका अनुसार, वाशिङटनले दक्षिण कोरियामा आधारित मिसाइल रक्षा प्रणालीको पुनः परिचालन सुरु गरेको केही समयपछि नै अमेरिकाले जापानी टापु ओकिनावाबाट २ हजारभन्दा बढी मरिन सैनिकहरूलाई पश्चिम एसियामा सार्न सुरु गरेको छ ।
ती मरिन सैनिकहरू त्रिपोली नामक उभयचर आक्रमण जहाजमा सवार रहेको बताइएको छ जसको गृह बन्दरगाह दक्षिण–पश्चिमी जापानको सासेबोमा रहेको छ ।
ती सैनिक टोली ओकिनावाको ३१औं मरिन एक्सपेडिसनरी युनिटका हुन् । ओकिनावामा जापानमा रहेका कुल ५० हजार अमेरिकी सैन्य कर्मचारीमध्ये आधाभन्दा बढी बसोबास गर्छन् ।
एफ–३५ लडाकु विमानहरूले सुसज्जित त्रिपोली जहाज मध्यपूर्व पुग्न एकदेखि दुई हप्ता लाग्ने अपेक्षा गरिएको छ ।
ती सैनिकहरूलाई इरानमा स्थल आक्रमणका लागि उपयोग गर्न सकिने सैन्य विश्लेषकहरूले बताएका छन् ।
उत्तरपूर्वी एसियाबाट अमेरिकी सैन्य शक्तिको यो पुनः परिचालनले जापान र दक्षिण कोरियाको सुरक्षाप्रति वाशिङटनको प्रतिबद्धतामाथि चिन्ता बढाएको छ । यो चिन्ता पूर्वी र दक्षिण चीन सागरमा बढ्दो चिनियाँ जलसैनिक गतिविधि र उत्तर कोरियाको ब्यालिस्टिक मिसाइल तथा आणविक हतियार विकासका बीच उत्पन्न भएको हो ।
अमेरिका र दक्षिण कोरियाको संयुक्त सैन्य अभ्यास सुरु भएको विरोधमा उत्तर कोरियाले यस सप्ताहान्तमा करिब १० वटा ब्यालिस्टिक मिसाइलहरूको परीक्षण प्रहार गरेको छ ।
प्रतिक्रिया