एजेन्सी । अमेरिकी सेनामा सबै कानुनी उद्देश्यका लागि कृत्रिम बुद्धिमत्ता (एआई) समाधानहरू प्रयोग गर्ने विषयमा रक्षा मन्त्रालय पेन्टागन र एन्थ्रोपिकबीचको द्वन्द्व साम्य हुने कुनै संकेत देखिएको छैन ।
त्यसमा अमेरिकी नागरिकहरूको सामूहिक निगरानी र पूर्ण रूपमा स्वायत्त हतियारहरू समावेश भएको बताइएको छ ।
समाचार एजेन्सी रोयटर्सको रिपोर्ट अनुसार, मंगलबार भएको एक तनावपूर्ण बैठकमा रक्षामन्त्री पिट हेगसेथले एन्थ्रोपिकका सीईओ डारियो अमोदेईलाई कडा अल्टिमेटम दिएका छन् । आगामी शुक्रबार (फेब्रुअरी २७) सम्ममा कम्पनीको कडा एआई सुरक्षा नियमहरू हटाउनुहोस्, अन्यथा सरकारको गम्भीर प्रतिशोधको सामना गर्नुहोस् भनी हेगसेथले चेतावनी दिएका छन् ।
एन्थ्रोपिकको आफ्नो प्रयोग सम्बन्धी प्रतिबन्धहरूबाट पछि हट्ने कुनै मनसाय छैन किनभने यस एआई स्टार्टअपले ती सुरक्षाका उपायहरू हटाउन अस्वीकार गरेको छ जसले उसको प्रविधिलाई स्वायत्त रूपमा हतियार लक्षित गर्न र आन्तरिक निगरानी गर्नबाट रोक्छ भनी स्रोतहरूलाई उद्धृत गर्दै रोयटर्सले लेखेको छ ।
सेनासँग काम गर्ने एआई कम्पनीहरूले आफ्नै संस्थागत नैतिक दिशानिर्देशहरू लाद्नुको साटो मानक अमेरिकी कानुन पालना गर्नुपर्ने पेन्टागनले तर्क गरेको छ । हेगसेथले अमोदेईलाई पालना गर्नका लागि शुक्रबार अपराह्न ५ बजेसम्मको समय दिएका छन् । एन्थ्रोपिकले अस्वीकार गरेमा सरकारले दुईवटा ठूला कारबाही गर्ने धम्की दिइरहेको छ ।
पहिलो, शीतयुद्धकालीन कानुन डिफेन्स प्रोडक्सन एक्ट लागू गर्ने जसले एन्थ्रोपिकलाई कानुनी रूपमा आफ्ना नियमहरू परिवर्तन गर्न र अप्रतिबन्धित प्रविधि उपलब्ध गराउन बाध्य पार्छ ।
दोस्रो, एन्थ्रोपिकमा आपूर्ति शृंखला जोखिमको लेबल लगाउने । यो लेबल सामान्यतया विदेशी विरोधीहरूको लागि आरक्षित हुन्छ र यसले अमेरिकी सरकारसँग जोडिएका अन्य कुनै पनि कम्पनीसँग व्यापार गर्ने एन्थ्रोपिकको क्षमतालाई प्रभावकारी रूपमा नष्ट गर्नेछ ।
रिपोर्टका अनुसार, यसै महिनाको सुरुमा एक अन्तर्राष्ट्रिय सैन्य कारबाहीलाई लिएर दुवै पक्षबीचको तनाव विस्फोट भएको थियो । एन्थ्रोपिकले भेनेजुएलामा भएको अमेरिकी सैन्य छापाका क्रममा आफ्नो एआई प्रयोग भएको थियो कि भनेर प्रश्नहरू सोधिरहेको पेन्टागनले विश्वास गरेको थियो । त्यस कारवाहीमा राष्ट्रपति निकोलस मदुरो पक्राउ परेका थिए ।
रिपोर्टका अनुसार, बैठकको क्रममा अमोदेईले जवाफ फर्काउँदै एन्थ्रोपिकले उक्त छापाको बारेमा पेन्टागन वा यसको ठेकेदार पालन्टियरसँग कहिल्यै कुनै प्रश्न नसोधेको हेगसेथलाई भनेका थिए ।
यसैबीच, पेन्टागनले इलोन मस्कको एक्सएआई, गुगल र ओपनएआई जस्ता अन्य प्रमुख प्रविधि कम्पनीहरूसँग वार्ता गरिरहेको बताइएको छ । एक्सएआई र पेन्टागन सबै कानुनी उद्देश्यहरूका लागि प्रविधि उपयोग गर्न सहमत भएको एक्सियोसले रिपोर्ट गरेको छ ।
रोयटर्सका अनुसार, सरकारी ठेक्का सम्बन्धी वकिल फ्य्रांकलिन टर्नरले चेतावनी दिँदै भने, ‘यो विशिष्ट परिदृश्य अभूतपूर्व छ । प्रशासनले यहाँ एन्थ्रोपिक विरुद्ध प्रतिकूल कदम चाल्यो भने यसले निश्चित रूपमा ठूलो संख्यामा मुद्दा मामिलाहरू निम्त्याउनेछ ।’
प्रतिक्रिया