पाकिस्तानले अफगानिस्तानमाथि गरेको हवाई आक्रमणमा १८ जनाको मृत्यु

एजेन्सी । पाकिस्तानले अफगानिस्तानमा रातभरि धेरै हवाई आक्रमणहरू गरेको छ जसमा महिला र बालबालिकासहित कम्तीमा १८ जनाको मृत्यु भएको तालिवानले जनाएको छ ।

इस्लामाबादले पाकिस्तान–अफगानिस्तान सीमा नजिकका सातवटा शंकास्पद विद्रोही शिविर र लुक्ने ठाउँहरूलाई लक्षित गरी यी आक्रमणहरू गरिएको र हालै पाकिस्तानमा भएका आत्मघाती बम विस्फोटपछि यो कदम चालिएको बताएको छ ।

अफगानिस्तानले यी आक्रमणको निन्दा गर्दै यसले धेरै सर्वसाधारणका घर र एक धार्मिक विद्यालयलाई लक्षित गरिएको बताएको छ ।

अक्टोबरमा घातक सीमापार झडपपछि दुई देशबीच भएको कमजोर युद्धविरामपछि यो नयाँ हमला भएको हो यद्यपि त्यसपछि पनि छिटपुट लडाइँहरू भइरहेका छन् ।

तालिवानको रक्षा मन्त्रालयले नानगाहार र पक्तिका प्रान्तका सर्वसाधारण क्षेत्रमा आक्रमण गरिएको र यसमा दर्जनौं मानिस मारिएको बताएको छ ।

नानगाहारको बिहसुदमा सहाबुद्दिन नामका एक व्यक्तिले आफ्नो ध्वस्त भएको घरतर्फ औंल्याउँदै पत्रकारहरूलाई बताएअनुसार उनको परिवारका २३ सदस्यमध्ये ५ जना मात्रै जीवित बचेका छन् । स्थानीय तालिवान प्रवक्ता सैयद तैब हम्दले सो परिवारका १८ जना सदस्य मारिएको बताए ।

यसअघि बीबीसीलाई करिब २० जनाको मृत्यु भएको जानकारी दिइएको थियो । अन्य प्रभावित क्षेत्रमा अहिलेसम्म कसैको मृत्यु भएको खबर आएको छैन ।

पाकिस्तानको सूचना तथा प्रसारण मन्त्रालयले गुप्तचरी सूचनाका आधारमा सातवटा आतंकवादी शिविर र लुक्ने ठाउँहरूलाई छनोटपूर्ण रूपमा लक्षित गरिएको बताएको छ ।

लक्षित समूहहरूमा प्रतिबन्धित तहरीक–ए–तालिबान पाकिस्तानका सदस्यहरू सामेल रहेको सामाजिक सञ्जाल एक्समा जारी एक विज्ञप्तिमा भनिएको छ । तिनलाई सरकारले फितना अल ख्वारिज भन्ने गर्छ । यसका साथै उनीहरूका सम्बद्ध समूहहरू र इस्लामिक स्टेट–खोरसान प्रान्तलाई पनि निशाना बनाइएको थियो ।

मन्त्रालयले यी आक्रमणहरूलाई काबुलले शरण दिएका आतंकवादी समूहहरूद्वारा हालै पाकिस्तानमा गरिएका आत्मघाती बम विस्फोटको प्रतिशोधात्मक जवाफ भनेको छ ।

हालै पाकिस्तानमा भएका आक्रमणमा यसै महिनाको सुरुमा राजधानी इस्लामाबादमा शिया मस्जिदमा भएको आक्रमण र यस हप्ता रमजानको पवित्र महिना सुरु भएदेखि उत्तर–पश्चिमी खैबर पख्तुनख्वा प्रान्तमा भएका अन्य आक्रमणहरू समावेश छन् ।

पाकिस्तानले अफगान तालिवानलाई विद्रोहीहरू विरुद्ध कारबाही गर्न असफल भएको आरोप लगाएको छ । साथै, अफगानिस्तानमा रहेका उनीहरूको नेतृत्वको निर्देशनमा विद्रोहीहरूले यी आक्रमणहरू गरेको ठोस प्रमाण आफूसँग भएको दाबी गरेको छ ।

तालिवानको रक्षा मन्त्रालयले पछि एक्समा पोस्ट गर्दै यी आक्रमणहरू अफगानिस्तानको क्षेत्रीय अखण्डताको घोर उल्लंघन र अन्तर्राष्ट्रिय कानुनको स्पष्ट उल्लंघन भएको भन्दै निन्दा गरेको छ ।

उपयुक्त समयमा उचित र सन्तुलित जवाफ दिइने चेतावनी दिँदै सर्वसाधारण र धार्मिक संस्थाहरूमा गरिएका आक्रमणहरूले पाकिस्तानी सेनाको गुप्तचरी र सुरक्षा असफलतालाई संकेत गर्छ भनेको छ ।

अक्टोबरको सीमा झडपका क्रममा काबुलमा पक्राउ परेका तीन पाकिस्तानी सैनिकहरूलाई साउदी अरबको मध्यस्थतामा यसै साताको सुरुमा रिहा गरिएको केही दिनपछि यी हवाई हमलाहरू भएका हुन् । सन् २०२१ मा तालिवान सत्तामा फर्केपछिको सबैभन्दा खराब लडाइँपछि सोही महिनामा ती झडपहरू अस्थायी युद्धविरामका साथ समाप्त भएका थिए ।

पाकिस्तान र अफगानिस्तानबीच २५ सय ७४ किलोमिटर लामो पहाडी सीमा जोडिएको छ ।