एजेन्सी । दक्षिण कोरियाले महत्त्वपूर्ण खनिजको आपूर्ति शृंखलामा चीनसँग घनिष्ठ सहयोग खोजिरहेको त्यहाँको वाणिज्य मन्त्रालयले बिहीबार बताएको छ ।
साथै, सौलले अत्याधुनिक प्रविधिका लागि आवश्यक दुर्लभ खनिज पदार्थको स्थिर आपूर्ति सुनिश्चित गर्ने योजना सार्वजनिक गरेको छ ।
यो घोषणा दक्षिण कोरियाले यसै हप्ता अमेरिकाको नेतृत्वमा रहेको महत्त्वपूर्ण खनिजहरूको व्यापारिक समूहमा सहभागी भएपछि आएको हो । त्यसमा उन्नत उत्पादनका लागि रणनीतिक रूपमा महत्त्वपूर्ण सामग्रीहरूका लागि चीनमाथिको भारी निर्भरताबाट बच्ने उद्देश्य राखिएको छ ।
दक्षिण कोरियाली कम्पनीहरूलाई चिनियाँ खनिजहरू अझ छिटो र विश्वसनीय रूपमा आयात गर्न मद्दत गर्न चिनियाँ अधिकारीहरूसँग एउटा हटलाइन र संयुक्त समिति स्थापना गर्ने व्यापार मन्त्रालयले बताएको छ ।
अग्रणी सेमिकन्डक्टर, विद्युतीय कार ब्याट्री र पेट्रोकेमिकल कम्पनीहरू रहेको दक्षिण कोरियासँग रेयर अर्थका लागि पूर्ण आपूर्ति शृंखलाको अभाव रहेको मन्त्रालयले एक विज्ञप्तिमा जनाएको छ ।
अधिकारीहरूले राष्ट्रिय सुरक्षाका लागि आवश्यक १७ वटा महत्त्वपूर्ण खनिजहरूलाई तोक्नेछन् र अप्रत्याशित अभाव हुन नदिन तिनीहरूको आपूर्तिमा अनुगमन र विश्लेषणलाई कडा बनाउने बताइएको छ ।
आपूर्ति स्रोतहरू विविधीकरण गर्न सौलले अमेरिका, भियतनाम र लाओस लगायतका अन्य देशहरूसँग पनि सहयोग गर्ने मन्त्रालयले जनाएको छ । सरकारले विदेशी खानी विकास गर्ने स्थानीय कम्पनीहरूलाई सहयोग गर्न २५० अर्ब वन सरकारी कोष विनियोजन गर्ने योजना बनाएको छ ।
अक्टोबरमा बेइजिङले सेमिकन्डक्टर प्रयोगकर्ताहरूका लागि थप छानबिन सहित आफ्ना रेयर अर्थहरूमाथि नियन्त्रण विस्तार गरेको थियो। त्यस समयमा दक्षिण कोरियाको व्यापार मन्त्रालयले रेयर अर्थमा चीनको एकाधिकारले विश्वव्यापी आपूर्ति शृंखलामा अस्थिरता बढाएको बताएको थियो ।
बुधबार दक्षिण कोरियालाई महत्त्वपूर्ण खनिजका लागि वाशिङटनद्वारा सार्वजनिक गरिएको फोरम अन रिसोर्स जियोस्ट्य्राटेजिक इन्गेजमेन्ट भनिने व्यापारिक समूहको अध्यक्षता गर्न छानिएको छ । यसको उद्देश्य आपूर्ति शृंखलालाई कुनै पनि देशले भूराजनीतिक लाभको औजारको रूपमा प्रयोग गर्नबाट जोगाउनु हो ।
सन् २०२५ बेइजिङले निर्यातमा रोक लगाएर आफ्नो वर्चस्व देखाएपछि अमेरिकाले महत्त्वपूर्ण खनिजहरूको आपूर्ति सुरक्षित गर्ने उपायहरू आक्रामक रूपमा खोजिरहेको बेला दक्षिण कोरियाले भने आफ्नो उत्पादन क्षेत्रका लागि महत्त्वपूर्ण सामग्रीको आपूर्तिको स्थिरता सम्बोधन गर्न चीनसँग बढी कूटनीतिक दृष्टिकोण अपनाएको छ ।
दक्षिण कोरियाली विदेशमन्त्री चो ह्युनले वाशिङटनमा भएको एक बैठकमा आगामी जुनसम्म यस समूहको अध्यक्षता गर्ने सौलले साझेदारहरूसँगको समन्वय बढाउने र आपूर्ति शृंखला सुरक्षित गर्ने आयोजनाहरूमा लगानी प्रवर्धन गर्न मद्दत गर्ने बताएको मन्त्रालयले जनाएको छ ।
प्रतिक्रिया