अमेरिकाले भेनेजुएलको तेल आयात गर्ने भनेपछि घट्यो मूल्य

एजेन्सी । अमेरिकाका राष्ट्रपति डोनल्ड ट्रम्पले २ अर्ब डलरसम्मको भेनेजुएलाको कच्चा तेल आयात गर्ने सम्झौता गरिएको बताएपछि बुधबार तेलको मूल्य घटेको छ ।

यस कदमले विश्वको सबैभन्दा ठूलो तेल उपभोक्ताको आपूर्ति बढाउने अपेक्षा गरिएको छ ।

बुधबार ब्रेन्ट कच्चा तेलको फ्युचर्स ११ सेन्टले घटेर प्रतिब्यारल ६०.५९ डलर पुग्यो भने अमेरिकी वेस्ट टेक्सस इन्टरमिडिएट कच्चा तेल २७ सेन्टले घटेर प्रतिब्यारल ५६.८६ डलरमा झर्यो ।

दुवै मानकहरूमा अघिल्लो कारोबार सत्रको तुलनामा १ डलरभन्दा बढीको गिरावट थपियो किनभने बजार सहभागीहरूले यो वर्ष प्रशस्त विश्वव्यापी आपूर्तिको अपेक्षा गरेका थिए ।

वाशिङटन र काराकासबीचको सम्झौताका लागि सुरुमा चीनतर्फ जान लागेका तेलका खेपहरूलाई बाटो परिवर्तन गराउनुपर्ने हुन सक्छ । भेनेजुएलासँग ट्यांकर र भण्डारण ट्यांकहरूमा लाखौं ब्यारल तेल लोड गरिएको छ जुन ट्रम्पले लगाएको निर्यात नाकाबन्दीका कारण डिसेम्बरको मध्यदेखि ढुवानी गर्न सकिएको छैन ।

यो नाकाबन्दी भेनेजुएलाका राष्ट्रपति निकोलस मदुरोको सरकारविरुद्धको अमेरिकी दबाब अभियानको एक हिस्सा थियो । गत शनिबार अमेरिकी सेनाले उनलाई पक्राउ गरेर लगेपछि त्यसको अन्त्य भयो । भेनेजुएलाका शीर्ष अधिकारीहरूले मदुरोको पक्राउलाई अपहरण भनेका छन् र अमेरिकालाई देशको विशाल तेल भण्डार चोर्न खोजेको आरोप लगाएका छन् ।

भेनेजुएलाले ३ करोड देखि ५ करोड ब्यारल प्रतिबन्धित तेल अमेरिकालाई हस्तान्तरण गर्ने ट्रम्पले मंगलबार सामाजिक सञ्जालको एउटा पोस्टमा लेखेका छन् ।

‘भेनेजुएलाको तेल आयातबारे ट्रम्पको पोस्टले आज बिहान कच्चा तेलको मूल्यमा दबाब दियो तर बजार सहभागीहरूले अहिले ती तेलको परिमाण कम हुन सक्ने विश्वास गरेको देखिन्छ । त्यसले गर्दा तेलको मूल्यले सुरुवाती घाटालाई केही हदसम्म पूर्ति गरिरहेको छ,’ यूबीएस विश्लेषक जियोभानी स्टाउनोभोले रोयटर्सलाई बताए ।

मोर्गन स्टेनलीका विश्लेषकहरूले गत वर्ष मागमा भएको कमजोर वृद्धि र ओपेक तथा गैर–ओपेक उत्पादकहरूबाट बढ्दो आपूर्तिका आधारमा सन् २०२६ को पहिलो ६ महिनामा तेल बजारमा प्रतिदिन ३० लाख ब्यारलसम्म तेल बढी हुन सक्ने अनुमान गरेका छन् ।

यद्यपि, सस्तोमा निकालिएको भेनेजुएलाको तेलको निर्यात बढ्ने सम्भावनाले अमेरिका र अन्य ठाउँमा उत्पादन क्षमताको विस्तारलाई रोक्न सक्ने फिच सोलुसनको एकाइ बीएमआईका विश्लेषकहरूले बुधबार एक नोटमा भनेका छन् ।

भेनेजुएलाले प्रमुख कच्चा तेल मेरेलाई आफ्नो बन्दरगाहमा डेलिभरीका लागि ब्रेन्टको तुलनामा प्रतिब्यारल करिब २२ डलर सस्तोमा बेचिरहेको छ ।

‘भेनेजुएलाको शासन टिकिरह्यो भने यसले मध्यम अवधिमा तेलको अपेक्षित मूल्य बढाउँछ,’ बीएमआई विश्लेषकहरूले बताए ।