अमेरिकाको ब्राउन विश्वविद्यालयमा गोलीकाण्ड : २ जनाको मृत्यु, कालो लुगा लगाएको मानिसको खोजी

एजेन्सी । अमेरिकाको रोड आइल्यान्ड राज्यको प्रोभिडेन्सस्थित ब्राउन युनिभर्सिटीमा शनिबार भएको गोलीकाण्डमा कम्तीमा दुईजनाको मृत्यु भएको छ भने नौजना गम्भीर घाइते भएका छन् ।

सुरक्षित स्थानमा बस्ने पहिलो आदेश जारी भएको घण्टौं बितिसक्दा पनि गोलीकाण्ड गराउने व्यक्ति अझै फरार छन् ।
दिउँसो गोली चलेको खबर आएपछि प्रहरीहरू क्याम्पस र ऐतिहासिक तथा भव्य इँटाका घरहरू भएको नजिकैको सम्भ्रान्त बस्तीमा परिचालित भएका थिए । उनीहरूले राति अबेरसम्म शैक्षिक भवनहरू, घरपछाडिका आँगन र बरण्डाहरूमा खोजी कार्य जारी राखे ।

प्रोभिडेन्स प्रहरीका उपप्रमुख टिमोथी ओ’हाराले शंकास्पद व्यक्ति ‘कालो लुगा लगाएको पुरुष’ भएको बताए । शंकास्पद व्यक्ति होप स्ट्रिटमा गोलीबारी भएको क्याम्पस भवनबाट बाहिर निस्केको विश्वास गरिएको छ । अधिकारीहरूले आरोपित व्यक्तिलाई फेला पार्न सम्भव भएसम्मका सबै स्रोतहरू परिचालन गरिरहेको ओ’हाराले बताएका छन् ।

शनिबार राति प्रहरीले गोलीकाण्डमा संलग्न भएको आशंका गरिएको व्यक्तिको फुटेज सार्वजनिक गरेको छ । साथै, ३० वर्षभन्दा माथि उमेरको उक्त व्यक्तिले छद्मभेषी मास्क लगाएको हुन सक्ने केही प्रत्यक्षदर्शीहरूले बताएका छन् ।

विश्वविद्यालयकी अध्यक्ष क्रिस्टिना प्याक्सनले गोली लागेका १० जना नै विद्यार्थी भएको पुष्टि गरेकी छन् । मारिएका दुईजना पनि त्यसमा समावेश छन् । अधिकारीहरूका अनुसार, गोलीबारीका क्रममा उछिट्टिएका टुक्राहरू लागेर अर्का एक व्यक्ति पनि घाइते भएका छन् ।

प्रोभिडेन्सका मेयर ब्रेट स्माइलीले सीएनएनलाई बताएअनुसार, इन्जिनियरिङ र भौतिकशास्त्र भवनका ढोकाहरू खुला थिए किनभने त्यहाँ धेरैजसो अन्तिम परीक्षाहरू चलिरहेका थिए । ‘हामीले ब्राउनका अधिकारीहरूबाट सुनेको आधारमा त्यस समयमा जो कोही पनि भवनमा प्रवेश गर्न सक्थे,’ उनले भने ।

‘हामी क्रिसमस आउनुभन्दा डेढ हप्ता अघि छौं । र आज दुईजनाको मृत्यु भयो अनि अन्य आठजना अस्पतालमा छन्,’ स्माइलीले साँझको समयमा भने, ‘त्यसैले कृपया ती परिवारहरूको लागि प्रार्थना गर्नुहोस् ।’

ब्राउन युनिभर्सिटी रोड आइल्यान्डको राजधानी प्रोभिडेन्सको कलेज हिलमा अवस्थित छ । विश्वविद्यालयमा लेक्चर हल, प्रयोगशाला र छात्रावाससहित सयौं भवनहरू छन् ।

यो आइभी लिग स्कूल एक निजी, गैर–नाफामूलक संस्था हो जहाँ करिब ७३ सय स्नातक र ३ हजारभन्दा बढी स्नातकोत्तर तहका विद्यार्थीहरू अध्ययनरत छन् ।

शनिबार फल सेमेस्टरको अन्तिम परीक्षाको दोस्रो दिन थियो ।