नेटफ्लिक्ससँग १ करोड डलर ठगेर मोजमस्ती गर्ने निर्देशक दोषी ठहर

एजेन्सी । नेटफ्लिक्सलाई १ करोड १० लाख डलर ठगी गरेको आरोपमा हलिउडका एक निर्देशकलाई बिहीबार दोषी ठहर गरिएको छ ।

उनले कहिल्यै नबनेको एक शोका लागि उक्त रकम लिएका थिए । तर, त्यो पैसा उनले विलासी सामान किनेर खर्च गरे । तिनमा रोल्स–रोयस गाडी, एउटा फरारी र करिब १० लाख डलर बराबरका डस्ना तथा विलासी ओछ्यानका सामानहरू समावेश छन् ।

अमेरिकाको न्युयोर्क राज्यका संघीय अभियोजनकर्ताका प्रवक्ता र अदालतका अभिलेखहरूका अनुसार, ‘४७ रोनिन’ चलचित्रको निर्देशन गरेर चिनिएका कार्ल एरिक रिन्स्चलाई विद्युतीय ठगी, सम्पत्ति शुद्धीकरण र अन्य आरोपमा दोषी ठहर गरिएको छ ।

रिन्स्चका वकिल बेन्जामिन जेम्यानले एक विज्ञप्ति प्रकाशन गरी यो फैसला गलत भएको बताए । उनले भने, ‘यसले आफ्ना लगानीकर्ताहरूसँग (यस सन्दर्भमा विश्वको सबैभन्दा ठूलो मिडिया कम्पनीहरू मध्ये एक) सम्झौता र रचनात्मक विवादमा फसेका कलाकारहरूका लागि खतरनाक नजिर बसाल्न सक्छ जहाँ उनीहरूले आफूलाई संघीय सरकारद्वारा ठगीको आरोप लागेको अवस्थामा पाउँछन् ।’

अभियोजनकर्ताहरूका अनुसार, नेटफ्लिक्सले सुरुमा रिन्स्चलाई ‘ह्वाइट हर्स’ नामक अधुरो साइ–फाई शोका लागि करिब ४ करोड ४० लाख डलर तिरेको थियो । पछि उनले उत्पादन पूरा गर्न थप रकम आवश्यक भएको बताएपछि कम्पनीले थप १ करोड १० लाख डलर पठाएको थियो ।

तर, त्यो पैसा शोमा लगाउनुको सट्टा रिन्स्चले व्यक्तिगत खातामा सारे जहाँ उनले असफल लगानीहरूको श्रृंखला सुरु गरे । अभियोजकहरूका अनुसार, केही महिनामै उनले १ करोड १० लाख डलरमध्ये करिब आधा रकम गुमाए ।

त्यसपछि उनले बाँकी रकम क्रिप्टोकरेन्सी बजारमा लगाए र केही नाफा पनि कमाए । तर, रिन्स्चले त्यो पैसा आफ्नै बैंक खातामा जम्मा गरे ।

त्यसपछि उनले विलासी खरिदहरू सुरु गरे । अभियोजनकर्ताहरूका अनुसार, रिन्स्चले पाँचवटा रोल्स–रोयस र एउटा फरारी किने । साथै, ६ लाख ५२ हजार डलर घडी र कपडामा खर्च गरे ।

उनले करिब ६ लाख ३८ हजार डलरमा दुईवटा डस्ना पनि किने र थप २ लाख ९५ हजार डलर विलासी ओछ्यान र तन्नाहरूमा खर्च गरे । यसका साथै, उनले क्रेडिट कार्डको बिल तिर्न करिब १८ लाख डलर प्रयोग गरेको अभियोजनकर्ताहरूले बताए ।

रिन्स्चले उक्त शो कहिल्यै पूरा गरेनन् । उनको सजाय निर्धारण अप्रिल महिनाका लागि तय गरिएको छ ।

नेटफ्लिक्सले यस विषयमा टिप्पणी गर्न अस्वीकार गरेको छ ।