काठमाडौं । अमेरिकी राष्ट्रपति डोनाल्ड ट्रम्पले रूसी राष्ट्रपति भ्लादिमिर पुटिनप्रति चर्को रोष व्यक्त गरेका छन् । एनबिसी न्यूजलाई दिइएको अन्तर्वार्तामा ट्रम्पले उनी रूसी राष्ट्रपति पुटिनप्रति धेरै रिसिएका र निराश भएको बताए।
आइतवारको अन्तर्वार्तामा ट्रम्पले यदि पुटिन युद्धविराममा सहमत नहुने हो भने उनले रूसबाट तेल किन्ने देशहरूमा ५० प्रतिशत ट्यारिफ लगाउन सक्ने बताए ।
ट्रम्पले भने, ‘यदि रूस र म युक्रेनमा रक्तपात रोक्ने सम्झौतामा पुग्न सकेनौं र यो रूसको गल्ती हो भने म रूसबाट आउने सबै तेलमा अतिरिक्त ट्यारिफ लगाउनेछु ।’
उनले पुटिनले युक्रेनी राष्ट्रपति भोलोदिमिर जेलेन्स्कीको विश्वसनीयतामाथि आक्रमण गरेको आरोप लगाए । गत हप्ता पुटिनले संयुक्त राष्ट्र संघको निगरानीमा युक्रेनमा नयाँ सरकार बनाएर नयाँ निर्वाचन गराउने र शान्ति सम्झौताको कुराकानी सुरु गर्ने सुझाव दिएका थिए ।
तर पछिल्ला ६ हप्तामा ट्रम्पले जेलेन्स्कीप्रति कडा मागहरू राखेका थिए भने पुटिनको पक्षमा पनि धेरै बोलेका थिए ।
आइतवारै ट्रम्पले जेलेन्स्कीमाथि अमेरिकासँगको युक्रेनको दुर्लभ खनिज सम्झौताबाट पछि हट्ने आरोप लगाए र युक्रेनलाई ‘ठूलो संकट’ को चेतावनी दिए ।
युरोपेली नेताहरूलाई चिन्ता थियो कि ट्रम्पले युक्रेनमा युद्धविरामको कुराकानी गर्दा पुटिननजिकै पुगेका छन् ।
ट्रम्पको ताजा बयानपछि युक्रेनी राष्ट्रपति जेलेन्स्कीले प्रतिक्रिया दिँदै भने, ‘पुटिनलाई कूटनीतिको परवाह छैन । युद्ध रोक्न रूसमाथि थप दबाब दिनु आवश्यक छ ।’
ट्रम्पको यो बयान लगभग एक महिना अघि अमेरिकी राष्ट्रपति भवनमा भएको घटनाको विपरीत देखिन्छ । त्यतिबेला ट्रम्प र उपराष्ट्रपति जेडी वान्सको जेलेन्स्कीसँग तीखो वादविवाद भएको थियो जसले दुबै नेताबीच दरार ल्याएको थियो ।
ट्रम्पको भनाइ युक्रेनलाई अमेरिकी समर्थनको दृष्टिले महत्वपूर्ण छ । यो रूसप्रति उनको पहिलेको भन्दा व्यवहार फरक छ । यो पहिलो पटक हो जब अमेरिकाले युद्धविराम असफल भएमा रूसलाई गम्भीर चेतावनी दिएको छ । यसले अमेरिकाले कूटनीतिक चाल चलेर बल रूसको कोर्टमा पारेको देखिन्छ ।
एनबिसी अनुसार, १० मिनेटको फोन अन्तर्वार्तामा पुटिनले जेलेन्स्कीको विश्वसनीयतामाथि हमला गरेकोले उनी रिसाएको बताए । तर ट्रम्पले आफैंले जेलेन्स्कीलाई ‘तानाशाह’ भनेका थिए र निर्वाचन गराउन आग्रह गरेका थिए ।
ट्रम्पले पुटिनसँगको सम्बन्ध प्रस्ट्याउँदै भने, ‘रूसी नेतालाई मेरो रिसको बारेमा थाहा छ । तर उनीसँग मेरो राम्रो सम्बन्ध छ । यदि उनले सही काम गरे मेरो रिस हराउँछ ।’
युक्रेनी राष्ट्रपति जेलेन्स्कीले आइतवार राती देशवासीलाई सम्बोधन गर्दै ट्रम्पको टिप्पणीमा प्रतिक्रिया दिए । उनले भने, ‘रूसले युद्धविरामको प्रस्तावलाई ड्रोन, बम र मिसाइल हमलाले जवाफ दिएको छ । रूसमाथि प्रतिबन्ध बढाउनु पर्छ ताकि युद्ध गर्ने क्षमता नष्ट होस् ।’
यसरी, ट्रम्पको नयाँ व्यवहारले युक्रेन संकटमा अमेरिकी नीतिमा परिवर्तनको संकेत दिएको छ भने पुटिन र जेलेन्स्कीबीचको तनाव कायम छ ।
प्रतिक्रिया