काठमाडौं । नेपाल विद्युत प्राधिकरणको उपकार्यकारी निर्देशक र निर्देशकहरुको सरुवा भएको छ ।
प्राधिकरणका नवनियुक्त प्रबन्ध निर्देशक हितेन्द्रदेव शाक्यले आफू अनुकुलको टिम बनाउन उपकार्यकारी निर्देशक तथा निर्देशकहरुको सरुवा गरेका हुन् ।
१२ औं तहका दीर्घायु कुमार श्रेष्ठलाई वितरण तथा ग्राहक सेवा निर्देशनालय सरुवा गरिएको छ । उनी प्रसारणलाइन निर्देशनालयमा कार्यरत थिए । श्रेष्ठ नेकपा एमाले निकट मानिन्छन् ।
सोही कारण उनलाई प्राधिकरणको ‘ब्याक बोन’ मानिने वितरण तथा ग्राहक सेवा निर्देशनालय सरुवा गरिएको हो । यो निर्देशनालयले गर्ने कामले प्राधिकरणको पर्फर्मेन्स देखिन्छ । मनोज सिलवाल रिटार्यड भएपछि यो निर्देशनालय रिक्त थियो ।
लोड डिस्प्याच सेन्टर (एलडीसी) प्रमुखको जिम्मेवारी रञ्जु पाण्डेललाई दिइएको छ । एलडीसी प्रमुखका रुपमा कार्यरत चन्दन घोष सरुवा भएका छन् ।
चन्दन घोष प्राधिकरणको प्रणाली योजनामा सरुवा भएका छन् । यसअघि कुलमान घिसिङ प्रबन्ध निर्देशक हुँदा उनी प्राधिकरणको प्रवक्ता समेत थिए । हितेन्द्रदेव शाक्य प्रबन्ध निर्देशकमा नियुक्त भएर आएपछि प्रवक्ताको जिम्मेवारी राजाभाई शिल्पकारलाई दिइएको छ ।
बागमती प्रादेशिक कार्यालयका निर्देशक नवराज ओझा ऊर्जा दक्षता तथा चुहावट नियन्त्रण विभाग सरुवा भएका छन् । नवराज ओझा ग्राहक तथा वितरण निर्देशनालयमा निमित्त प्रमुखको रुपमा कार्यरत थिए ।
चुहावट नियन्त्रण महाशाखामा कार्यरत प्राधिकरणका निर्देशक टेकनाथ तिवारी बागमती प्रदेशको प्रमुखमा सरुवा गरिएको छ।
विद्युत प्राधिकरणको सञ्चालक समितिको बैठकले १० औं तह र त्यसमाथिको नियुक्ति, पदस्थापन तथा सरुवाको अधिकार प्रबन्ध निर्देशकबाट खोसेको छ । मंगलबार प्राधिकरणको प्रबन्ध निर्देशकमा हितेन्द्रदेव शाक्य नियुक्त भएपछि बसेको सञ्चालक समितिले यस्तो निर्णय गरेको हो।
यसअघि नै ऊर्जामन्त्री दीपक खड्काले प्रबन्ध निर्देशकको अधिकार कटौती गर्न खोजेको थिए तर तत्कालीन प्रबन्ध निर्देशक कुलमान घिसिङले नमानेपछि रोकिएको थियो ।
मंगलबार बसेको सञ्चालक समितिको बैठकले नेपाल विद्युत प्राधिकरण कर्मचारी सेवा शर्त विनियमावली २०७५ (संशोधनसहित) भएको व्यवस्थामध्ये १० औं तह र माथिल्लो तहका कर्मचारीहरु सरुवा, बढुवादेखि काजमा खटाउनेसम्मका सम्पूर्ण अधिकार सञ्चालक समितिलाई दिने निर्णय गरेको हो ।
प्रतिक्रिया