शिखर धवनले अर्धशतक हाने पनि काठमाडौंसँग हार्‍यो कर्णाली

काठमाडौं । शिखर धवनको अर्धशतकका बाबजुद कर्णाली याक्स नेपाल प्रिमियर लिग (एनपीएल)मा काठमाडौं गुर्खाजसँग पराजित भएको छ ।

कीर्तिपुरस्थित त्रिवि क्रिकेट मैदानमा भएको खेलमा कर्णाली काठमाडौंसँग तीन विकेटले पराजित भएको हो ।

कर्णालीले दिएको १५० रनको लक्ष्य काठमाडौंले १९ ओभर ३ बलमा सात विकेट गुमाउँदै पूरा गर्‍यो ।

काठमाडौंका लागि सुमित महर्जनले सर्वाधिक ४० रन बनाए । कर्णालीका लागि पाँच खेलाडीले एक एक विकेट लिए ।

काठमाडौंको यो पहिलो जित हो । आजको जितबाट काठमाडौंले दुई अंक जोडेको छ । कर्णालीको यो लगातार दोस्रो हार हो ।

त्यसअघि टस हारेर ब्याटिङ गरेको कर्णालीले निर्धारित २० ओभरमा पाँच विकेट गुमाउँदै १ सय ४९ रन बनाएको थियो ।

कर्णालीका लागि शिखर धवनले ५१ बलमा ४ चौका र ५ छक्काको सहयोगमा ७२ रन बनाएका थिए । धवनको पहिलो अर्धशतक हो ।