अर्थमन्त्रीले बजेट भाषण गरेको पैसा पाउँछन् कि पाउँदैनन् ?

काठमाडौं । अर्थमन्त्री जनार्दशन शर्माले आगामी आर्थिक वर्षका लागि बजेट सार्वजनिक गर्दैछन् ।

नेपालको संविधानले बजेट सार्वजनिक गर्ने दिन नै जेठ १५ का लागि तोकेको छ ।

बजेट भाषण गरेपछि धेरैको बुझाई अर्थमन्त्रीले पैसा पाउँछन् भन्ने रहेको छ । तर,वास्तविकता यस्तो होइन ।

अर्थमन्त्रीले बजेट भाषण गर्दा केहीपनि पैसा पाउँदैनन् । नेपाल सरकारको मन्त्रीको हैसियतले पाउने तलब भत्ताबाहेक बजेट भाषण गर्दा केहीपनि पाइंदैन ।

यसअघि बजेट पेश गरेका पूर्वअर्थमन्त्रीहरु भन्छन् यो हल्ला अहिलेसम्म रोकिएको छैन ।

पूर्वअर्थमन्त्री शंकर कोइरालाले भने, ‘नेपालमा बजेट भाषण गर्ने अर्थमन्त्रीले पैसा पाउने हल्ला छ, यो हल्ला मैले पनि सुनेको थिएँ । तर, अहिलेसम्म नेपालका कुनैपनि अर्थमन्त्रीले बजेट भाषण गरेको पैसा पाएको मेरो जानकारीमा छैन ।’

अहिलेसम्म धेरै पटक बजेट प्रस्तुत गरेका पूर्वअर्थमन्त्री डा रामशरण महतले भने, ‘मैले पटकपटक भन्दै आएको छु कि बजेट भाषण गरेको पैसा अर्थमन्त्रीले पाउँदैनन् । बजेट भाषण गर्नु अर्थमन्त्रीको कर्तव्य हो । मन्त्री भएबापत तलब र भत्तामात्रै हुन्छ ।’

दुईपटक बजेट ल्याएका पूर्वअर्थमन्त्री सुरेन्द्र पाण्डेले भने,‘अर्थमन्त्रीले बजेट भाषण गरेर पैसा पाउने हल्ला निराधार हो, यो निराधार हल्ला हो । यस्तो हल्लाका पछि नलाग्नुस् ।’