सपथ खाँदै बीमा समितिका नवनियुक्त अध्यक्ष सिलवालले भने- फास्ट ट्रयाकमा काम गर्छु

काठमाडौं । बीमा समितिका नवनियुक्त अध्यक्ष सुरेन्द्र सिलवालले अर्थसचिव शिशिरकुमार ढुङ्गानासँग पद तथा गोपनियताको सपथग्रहण लिएका छन् । सोमबार बसेको मन्त्रिपरिषदको बैठकले सिलवाललाई बीमा समितिको अध्यक्ष नियुक्ति गरेको थियो ।

सपथ कार्यक्रममा उपस्थित अर्थमन्त्री विष्णु पौडेलले बीमा क्षेत्रमा भएका समस्या समाधानका लागि खरोरुपमा उत्रन र आफ्नो कार्यकाल बीमा क्षेत्रका लागि कोसेढुङ्गा सावित गर्न निर्देेशन दिए । उनले बीमा क्षेत्रका समस्याहरु केलाउन निर्देशन दिँदै ती समस्या समाधानका लागि अर्थ मन्त्रालयले सहयोग, सहजीकरण र समन्वय गर्ने विश्वास दिलाए ।

व्यापारका जानकारलाई बीमा नियमनको जिम्मा, प्रधानमन्त्रीले सिलवाल रोज्दा निकट भन्नेहरु हिस्स

अर्थ सचिव शिशिरकुमार ढुङ्गानाले बीमा क्षेत्रले विश्वसनियता कायम गर्नु पर्ने आवश्यता औल्याउँदै बीमा क्षेत्रलाई सबल, सक्षम र प्रतिष्पर्धी बनाउनु पर्ने बताए । राजस्व सचिव रामशरण पुडासैनीले बीमाको पहुँच बढाउन र बीमा क्षेत्रको सुशासन कायम गर्ने कार्यमा विशेष जोड दिनुपर्ने बताए ।

समितिका नवनियुक्त अध्यक्ष सूर्यप्रसाद सिलवालले बीमा क्षेत्रको सुधारका लागि खरो रुपमा उत्रने र फास्ट ट्रयाकमा काम गर्ने प्रतिवद्धता व्यक्त गरे । उनले तत्काल देखा परेका समस्या समाधान गर्दै नीतिगत क्षेत्रमा प्रवेश गर्ने बताए ।