एजेन्सी । चार वर्षअघि यस्तो लागेको थियो कि लियोनल मेस्सीको कथा अब समाप्त भयो ।
३५ वर्षको उमेरमा उनले अन्ततः विश्वकप जितेका थिए जसलाई उनले आफ्नो अन्तिम विश्वकप खेल भनेका थिए ।
धेरैको नजरमा उनले फुटबल इतिहासकै महान् खेलाडीको रूपमा आफ्नो स्थान सुरक्षित गरिसकेका थिए ।
त्यसको चार वर्षअघि ३१ वर्षको उमेरमा उनी र उनी वरपरका मानिसहरूलाई लागेको थियो कि उनले आफ्नो अन्तिम विश्वकप खेलिसकेका छन् र विश्वकप नजिती नै उनको करियर समाप्त हुनेछ।
तर अहिले ३९ वर्षको उमेरमा उनी यहाँ छन्, जसले इंग्ल्याण्डलाई स्तब्ध पार्दै अर्जेन्टिनालाई लगातार दोस्रो पटक विश्वकपको फाइनलमा पुर्याउन मद्दत गरेका छन् ।
मेस्सीको दुई असिस्ट (गोल सहायता) ले दक्षिण अमेरिकी टोलीलाई २-१ को पुनरागमन जित दिलायो ।
यससँगै २०२६ को विश्वकपमा उनको असिस्ट संख्या ४ र गोल संख्या ८ पुगेको छ । उनी प्रतियोगिताको संयुक्त सर्वाधिक गोलकर्ता र दोस्रो धेरै असिस्ट गर्ने खेलाडी बनेका छन् ।
अर्जेन्टिनाले अब आइतबार न्यु जर्सीमा हुने फाइनलमा स्पेनको सामना गर्नेछ । स्पेन त्यही देश हो जहाँ मेस्सीले बार्सिलोनाका लागि आफ्नो करियरको लामो समय फुटबल खेलेका थिए ।
‘उनी इतिहासकै उत्कृष्ट खेलाडी हुन्, यो प्रमाणित गर्न उनले अब के नै गर्न बाँकी होला र ? अधिकांश स्पेनिसहरू उनलाई माया गर्छन्,’ अर्जेन्टिनाका प्रशिक्षक लियोनल स्कालोनीले भने ।
बीबीसी पण्डित मिका रिचर्ड्सले भने, ‘उनीहरूसँग लियोनल मेस्सी छन्। उनी ‘गोट’ (ग्रेटेस्ट अफ अल टाइम) हुन् । हामीलाई लागेको थियो कि यो जुड बेलिङ्घम वा ह्यारी केनको समय हुन सक्छ, तर मेस्सी किन राजा हुन् भन्ने कुरा उनले फेरि प्रमाणित गरिदिए ।’
मेस्सीले कसरी इंग्ल्याण्डको सपना चकनाचुर पारे
बार्सिलोना र पेरिस सेन्ट-जर्मेनका पूर्व फरवार्ड मेस्सीले आफ्नो करियरमा यसअघि कहिल्यै इंग्ल्याण्डसँग खेलेका थिएनन् ।
इंग्ल्याण्डका प्रशिक्षक थोमस टुचेल र प्रशंसकहरू पक्कै पनि यस्तो नभइदिएको भए हुन्थ्यो भन्ने चाहन्थे ।
खेलको ५५ औं मिनेटमा एन्थोनी गोर्डनले इंग्ल्याण्डलाई अग्रता दिलाएपछि अर्जेन्टिना एकाएक जुर्मुरायो । जब टुचेलले थप डिफेन्डरहरू मैदान पठाए र इंग्ल्याण्ड रक्षात्मक बन्यो, त्यसपछिको ३७ मिनेटसम्म अर्जेन्टिनाले ८८% बलमा कब्जा जमायो ।
मेस्सीले दायाँ विङ्गबाट खेल्दै इंग्ल्याण्डको डिफेन्सलाई निकै सास्ती दिए। गोलकिपर एमिलियानो मार्टिनेजले भने, ‘मेस्सीलाई विङ्गमा लैजानु नै हाम्रो लागि जितको मुख्य आधार बन्यो ।’
मेस्सीले इंग्ल्याण्डविरुद्ध ९ वटा सफल ड्रिबल गरे र दुई गोलमा असिस्ट गरे । सन् १९६६ यता विश्वकपको एउटै नकआउट खेलमा यस्तो गर्ने उनी पहिलो खेलाडी बनेका छन् ।
उनले खेलको ८५ औं मिनेटमा कर्नरमार्फत एन्जो फर्नान्डेजलाई पास दिए, जसले डिबक्स बाहिरबाट उत्कृष्ट गोल गर्दै खेल बराबरीमा ल्याए । त्यसपछि इन्जुरी समयमा उनकै क्रसमा लाउटारो मार्टिनेजले हेडरमार्फत निर्णायक गोल गरे ।
इंग्ल्याण्डका कप्तान ह्यारी केनले भने, ‘धेरै समयसम्म हामीले उनलाई राम्रोसँग रोक्यौँ, तर विश्वका खतरनाक खेलाडीहरूको खुट्टामा बल हुँदा उनीहरूले केही न केही जादु गरिहाल्छन् ।’
के मेस्सीले गोल्डेन बुट जित्लान्?
यो समरमा मेस्सी २१ गोलका साथ विश्वकप इतिहासकै सर्वाधिक गोलकर्ता बनेका छन् । तीमध्ये १५ गोल उनले ३५ वर्षको उमेरपछि गरेका हुन् ।
अहिले मेस्सी र एमबाप्पे दुवै ८-८ गोलका साथ बराबरीमा छन् । यदि दुई खेलाडीको गोल बराबर भएमा असिस्ट संख्या हेरिन्छ, जसमा मेस्सी ४ असिस्टका साथ एमबाप्पे (३ असिस्ट) भन्दा अगाडि छन् ।
के मेस्सी कहिल्यै सुस्त होलान् ?
सन् २०१६ मा उनले अन्तर्राष्ट्रिय फुटबलबाट सन्यास लिएको कुरा बिर्सन सजिलो छ । तर सन्यास फिर्ता लिएपछि उनले दुई पटक कोपा अमेरिका र एक पटक विश्वकप जितिसकेका छन् ।
अहिले उनी इन्टर मियामी र अर्जेन्टिनाका लागि लगातार १३ खेलमा गोल वा असिस्ट गर्न सफल भएका छन् । यदि आइतबारको फाइनलमा पनि उनले गोल वा असिस्ट गरेमा, उनले सन् २०११ मा बनाएको लगातार १४ खेलको आफ्नै कीर्तिमान बराबरी गर्नेछन् ।
के यो उनको अन्तिम विश्वकप खेल होला ? भन्ने प्रश्न यतिबेला उठिरहेको छ ।
सन् २०३० मा उनी ४३ वर्षका हुनेछन् । तर ८ पटकको बालोन डी’ओर विजेता मेस्सीको हकमा केही पनि असम्भव छैन जस्तो देखिन्छ ।
प्रतिक्रिया