काठमाडौं । प्रधानमन्त्री वालेन्द्र शाह (बालेन)ले आज महिला उद्यमी महासंघका पदाधिकारीहरूसँग प्रधानमन्त्री तथा मन्त्रिपरिषद्को कार्यालयमा विशेष छलफल गर्दै छन् ।
अबको केही बेरमा सुरू हुने उक्त बैठकमा प्रधानमन्त्री शाह र महासंघका प्रतिनिधिहरूबीच महिला उद्यमशीलता प्रवर्द्धन, नीतिगत सुधार तथा उद्योग क्षेत्रमा महिलाहरूको सहभागिता वृद्धिका विषयमा संवाद हुने प्रधानमन्त्रीको सचिवालयले जनाएको छ।
छलफलमा महिला उद्यमी महासंघका तर्फबाट अध्यक्ष दर्शना श्रेष्ठ, तृतीय उपाध्यक्ष महालक्ष्मी श्रेष्ठ, महासचिव सविता सुवेदी, सचिव डिकिला शेर्पा लामा र कार्यकारिणी सदस्य अनुजा राजभण्डारी श्रेष्ठ सहभागी हुँदैछन् ।
सरकारको सय दिन पूरा भएपछि प्रधानमन्त्री बालेनले निजी क्षेत्रका उद्यमी व्यवसायीसँग छलफललाई तीव्रता दिएका छन् । नेपाल उद्योग वाणिज्य महासंघ, नेपाल उद्योग परिसंघ, चेम्बर्स अफ कमर्श नेपालका पदाधिकारी, निर्माण व्यवसायी, होटल तथा पर्यटन व्यवसायी लगायतसँग उनले छलफल गरिसकेका छन् ।
सरकार निजी क्षेत्रमैत्री रहेको र ढुक्कले लगानी गर्ने वातावरण सिर्जना गर्न लागिएकाले अगाडि बढ्न निजी क्षेत्रलाई उनले ढाडस दिँदै आएका छन् ।
प्रतिक्रिया