वान लास्ट डान्स: विश्व फुटबलका लिजेन्डहरूको अन्तिम विश्वकप

एजेन्सी । सन् २०२६ को फिफा विश्वकप नयाँ विश्व च्याम्पियन खोज्ने प्रतियोगिता मात्र होइन, विश्व फुटबलको एउटा स्वर्णिम युगलाई बिदाइ गर्ने प्रतियोगिता पनि बनेको छ ।

झन्डै दुई दशकसम्म विश्व फुटबलमा आफ्नो छाप छोडेका धेरै महान् खेलाडीहरू अन्तिम पटक विश्वकप खेलिरहेका छन् । करोडौँ समर्थकका लागि यो केवल फुटबल प्रतियोगिता होइन, वर्षौँदेखि मन पराएका आफ्ना नायकहरूलाई विश्वकपमा अन्तिम पटक हेर्ने अवसर पनि हो ।

क्रिस्टियानो रोनाल्डो र लियोनेल मेस्सीले आधुनिक फुटबललाई नयाँ उचाइमा पुर्‍याए । उनीहरूसँगै नेयमार जुनियर, लुका मोड्रिच, म्यानुएल नोयर, केभिन डी ब्रुइने, कासेमिरो, भर्जिल भान डाइक, ह्यारी केन, हेउङ मिन सन र मोहम्मद सलाहजस्ता खेलाडीहरूले पनि आफ्नो देश र क्लबका लागि सम्झनलायक प्रदर्शन गरे । कसैले विश्वकप जिते, कसैले त्यो सपना पूरा गर्न सकेनन् । तर सबैले आफ्नो खेल, मेहनत र समर्पणले विश्व फुटबलमा छुट्टै पहिचान बनाए ।

आज यी खेलाडीहरूको करियर अन्तिम चरणमा छ । समयसँगै उनीहरू मैदानबाट बिदा हुँदै छन्, तर उनीहरूले बनाएका कीर्तिमान, जितेका उपाधि र समर्थकलाई दिएका अविस्मरणीय क्षणहरू सधैँ सम्झिइरहनेछन् । त्यसैले २०२६ को विश्वकप केवल अर्को विश्वकप होइन, विश्व फुटबलका यी लिजेन्डहरूको ‘वान लास्ट डान्स’ हो । यो प्रतियोगिता उनीहरूको अन्तिम विश्वकप यात्रा मात्र होइन, आधुनिक फुटबलको एउटा अविस्मरणीय युगको भावुक बिदाइ पनि हो ।

क्रिस्टियानो रोनाल्डो: अधुरो विश्वकप सपना, तर पूर्ण विरासत

क्रिस्टियानो रोनाल्डोले सन् २००६ मा जर्मनीमा भएको विश्वकपबाट पहिलो पटक विश्वकप यात्रा सुरु गरेका थिए । त्यो प्रतियोगितामा युवा रोनाल्डोले पोर्चुगललाई सेमिफाइनलसम्म पुर्‍याउन महत्त्वपूर्ण भूमिका खेले । सन् २०१० को दक्षिण अफ्रिका विश्वकपमा पोर्चुगल अन्तिम १६ सम्म पुग्यो, तर स्पेनसँग पराजित हुँदै बाहिरियो ।

सन् २०१४ को ब्राजिल विश्वकप रोनाल्डोका लागि निराशाजनक रह्यो। चोट र कमजोर टोली प्रदर्शनका कारण पोर्चुगल समूह चरणबाटै बाहिरियो । तर सन् २०१८ को रुस विश्वकपमा उनले स्पेनविरुद्ध अविस्मरणीय ह्याट्रिक गर्दै विश्वलाई आफ्नो क्षमता फेरि एकपटक देखाए । यद्यपि पोर्चुगल अन्तिम १६ बाट अघि बढ्न सकेन ।

सन् २०२२ को कतार विश्वकपमा रोनाल्डोले इतिहास रचे । उनी लगातार पाँच फरक संस्करणको विश्वकपमा गोल गर्ने पहिलो पुरुष खेलाडी बने । तर पोर्चुगल क्वार्टरफाइनलमा मोरक्कोसँग पराजित भयो र विश्वकप जित्ने उनको सपना फेरि अधुरै रह्यो ।

सन् २०२६ को अमेरिका, क्यानडा र मेक्सिकोमा संयुक्त रूपमा आयोजित विश्वकपलाई रोनाल्डोको अन्तिम विश्वकपका रूपमा हेरिएको छ । उपाधि जित्ने उनको अन्तिम प्रयास पनि सफल हुन सकेन ।

प्रतियोगिताबाट बाहिरिएपछि मैदानमै भावुक बनेका रोनाल्डोका आँसु केवल एउटा हारको पीडा थिएन, त्यो दुई दशकभन्दा लामो विश्वकप यात्राको अन्तिम दृश्य थियो ।

विश्वकप ट्रफी कहिल्यै हात नपरे पनि पाँच पटक बालेन डी’ओर, पाँच पटक युइएफए च्याम्पियन्स लिग, अन्तर्राष्ट्रिय फुटबलका सर्वाधिक गोलकर्ता, पोर्चुगललाई युरो २०१६ र युइएफए नेसन्स लिग जिताएको उपलब्धिसहित उनले विश्व फुटबलमा अमिट विरासत छाडेका छन् ।

लियोनेल मेस्सी: फुटबलका अधुरा सपना पूरा गरेका सम्राट

लियोनेल मेस्सीले सन् २००६ को जर्मनी विश्वकपमा सानो उमेरका खेलाडीका रूपमा विश्वकप यात्रा सुरु गरेका थिए ।

अर्जेन्टिना त्यस संस्करणमा क्वार्टरफाइनलसम्म पुग्यो । सन् २०१० को दक्षिण अफ्रिका विश्वकपमा पनि टोली क्वार्टरफाइनलबाटै बाहिरियो।

सन् २०१४ को ब्राजिल विश्वकप मेस्सीको करियरकै सबैभन्दा भावनात्मक यात्रामध्ये एक रह्यो । कप्तानका रूपमा उनले अर्जेन्टिनालाई फाइनलसम्म पुर्‍याए, तर अतिरिक्त समयमा जर्मनीसँग १–० ले पराजित भएपछि विश्वकप ट्रफी हात पार्ने सपना अधुरै रह्यो । उत्कृष्ट प्रदर्शनका लागि उनी प्रतियोगिताको गोल्डेन बल विजेता बने ।

सन् २०१८ को रुस विश्वकपमा अर्जेन्टिना अन्तिम १६ मा फ्रान्ससँग पराजित भयो । त्यसपछि पनि मेस्सीले हार मानेनन् । सन् २०२२ को कतार विश्वकपमा उनले अर्जेन्टिनालाई विश्व च्याम्पियन बनाउँदै आफ्नो जीवनकै सबैभन्दा ठूलो सपना पूरा गरे । फाइनलमा फ्रान्सलाई हराउँदै अर्जेन्टिनाले ३६ वर्षपछि विश्वकप जित्यो र मेस्सी दोस्रो पटक प्रतियोगिताको उत्कृष्ट खेलाडी घोषित भए ।

विश्वकप जितेसँगै मेस्सीमाथि वर्षौंदेखि लाग्दै आएको ‘माराडोना जस्तो सफलता छैन’ भन्ने आलोचना पनि समाप्त भयो । यसअघि उनले अर्जेन्टिनालाई २०२१ को कोपा अमेरिका, २०२२ को फाइनलिसिमा र २०२४ को कोपा अमेरिका पनि जिताएका थिए ।

सन् २०२६ को विश्वकपलाई मेस्सीको सम्भावित अन्तिम विश्वकपका रूपमा हेरिएको छ । विश्व विजेताका रूपमा अन्तिम पटक विश्वकप मैदानमा उत्रिएका मेस्सीले आफ्नो करियरलाई पहिले नै पूर्णता दिइसकेका छन् । आठ पटक बालेन डी’ओर, चार पटक च्याम्पियन्स लिग, बार्सिलोनाका सर्वाधिक गोलकर्ता, विश्वकप, कोपा अमेरिका र हजारभन्दा बढी गोलमा प्रत्यक्ष योगदानसहित उनले फुटबल इतिहासका महानतम खेलाडीमध्ये आफ्नो स्थान सुरक्षित गरिसकेका छन् ।

नेयमार जुनियर: जोगा बोनिटोको अन्तिम जादु

नेयमार जुनियरले सन् २०१४ को ब्राजिल विश्वकपबाट आफ्नो विश्वकप यात्रालाई नयाँ उचाइमा पुर्‍याए । घरेलु मैदानमा खेलेको उक्त विश्वकपमा उनले उत्कृष्ट प्रदर्शन गर्दै ब्राजिललाई क्वार्टरफाइनलसम्म पुर्‍याए । तर कोलम्बियाविरुद्धको खेलमा मेरुदण्डमा गम्भीर चोट लागेपछि उनी प्रतियोगिताबाट बाहिरिए । त्यसपछि ब्राजिल सेमिफाइनलमा जर्मनीसँग ऐतिहासिक ७–१ को हार बेहोर्दै विश्वकपबाट बाहिरियो । नेयमारका लागि त्यो विश्वकप जीवनकै सबैभन्दा पीडादायी क्षण बन्यो ।

सन् २०१८ को रुस विश्वकपमा चोटबाट फर्किएका नेयमारमाथि ब्राजिललाई पुनः विश्व च्याम्पियन बनाउने ठूलो अपेक्षा थियो। उनले दुई गोल र एक असिस्ट गर्दै टोलीलाई क्वार्टरफाइनलसम्म पुर्‍याए। तर बेल्जियमसँग २–१ ले पराजित भएपछि ब्राजिलको यात्रा टुंगियो।

सन् २०२२ को कतार विश्वकपमा पनि नेयमारले ब्राजिलका लागि निर्णायक भूमिका खेले। दक्षिण कोरियाविरुद्ध गोल गर्दै उनले पेलेको विश्वकप गोल कीर्तिमान बराबरी गरे भने क्रोएसियाविरुद्धको क्वार्टरफाइनलमा उत्कृष्ट गोल गरे। तर पेनाल्टी सुटआउटमा ब्राजिल पराजित भयो र विश्वकप जित्ने अर्को अवसर गुम्यो ।

सन् २०२६ को अमेरिका, क्यानडा र मेक्सिकोमा आयोजित विश्वकपलाई नेयमारको सम्भावित अन्तिम विश्वकपका रूपमा हेरिएको थियो । ब्राजिललाई छैटौँ विश्वकप दिलाउने अन्तिम प्रयास पनि सफल हुन सकेन । विश्वकप ट्रफी जित्ने सपना अधुरै रहे पनि ब्राजिलका सर्वाधिक अन्तर्राष्ट्रिय गोलकर्ता, २०१३ कन्फेडेरेसन कप विजेता, २०१६ ओलम्पिक स्वर्ण पदक विजेता तथा ब्राजिलियन फुटबलको ‘जोगा बोनिटो’ शैलीलाई नयाँ पुस्तासम्म पुर्‍याउने खेलाडीका रूपमा नेयमारले आफ्नो छुट्टै विरासत छाडेका छन् ।

लुका मोड्रिच: सानो देशलाई विश्व फुटबलको शक्तिशाली टोली बनाउने कप्तान

लुका मोड्रिचले सन् २००६ को जर्मनी विश्वकपबाट आफ्नो विश्वकप यात्रा सुरु गरेका थिए । त्यसबेला युवा क्रोएसियाली टोली समूह चरणबाटै बाहिरिएको थियो । सन् २०१४ को ब्राजिल विश्वकपमा पनि क्रोएसिया समूह चरण पार गर्न असफल रह्यो ।

तर सन् २०१८ को रुस विश्वकपले मोड्रिचलाई विश्व फुटबलको इतिहासमा अमर बनायो । कप्तानका रूपमा उनले क्रोएसियालाई पहिलो पटक विश्वकपको फाइनलसम्म पुर्‍याए । फाइनलमा फ्रान्ससँग पराजित भए पनि प्रतियोगिताभर उत्कृष्ट प्रदर्शन गर्दै उनले गोल्डेन बल जिते र विश्वकै उत्कृष्ट खेलाडीका रूपमा स्थापित भए ।

सन् २०२२ को कतार विश्वकपमा पनि मोड्रिचको नेतृत्वमा क्रोएसियाले उत्कृष्ट प्रदर्शन गर्दै तेस्रो स्थान हासिल गर्‍यो । उमेर बढ्दै जाँदा पनि उनले आफ्नो नेतृत्व, खेल बुझेको क्षमता र मिडफिल्डमा नियन्त्रण कायम राखेर विश्व फुटबललाई प्रभावित पारे ।

सन् २०२६ को विश्वकपलाई मोड्रिचको अन्तिम विश्वकपका रूपमा हेरिएको थियो। यस प्रतियोगितासँगै क्रोएसियाको स्वर्णिम पुस्ताको एउटा युग पनि अन्त्यतिर पुग्यो । विश्वकप ट्रफी जित्न नसके पनि एउटा सानो जनसंख्या भएको देशलाई लगातार विश्व फुटबलको महाशक्तिसँग प्रतिस्पर्धा गराउने कप्तानका रूपमा मोड्रिचको नाम सधैँ सम्मानका साथ लिइनेछ ।

म्यानुएल नोयर: गोलरक्षकको अर्थ बदलिदिने खेलाडी

म्यानुएल नोयरले सन् २०१० को दक्षिण अफ्रिका विश्वकपबाट जर्मनीका मुख्य गोलरक्षकका रूपमा विश्वकप यात्रा सुरु गरेका थिए । युवा टोलीसँगै उनले जर्मनीलाई तेस्रो स्थान दिलाउन महत्त्वपूर्ण भूमिका खेले।

सन् २०१४ को ब्राजिल विश्वकप नोयरको करियरको स्वर्णिम क्षण बन्यो। उनले प्रतियोगिताभर असाधारण प्रदर्शन गर्दै जर्मनीलाई चौथो विश्वकप उपाधि दिलाए । ‘स्विपर–किपर’ शैलीलाई विश्वभर लोकप्रिय बनाएका नोयर त्यस विश्वकपका उत्कृष्ट गोलरक्षकमध्ये एक मानिए र गोल्डेन ग्लोभ पुरस्कार जिते ।

सन् २०१८ को रुस विश्वकपमा साविक विजेता जर्मनी समूह चरणबाटै बाहिरिँदा नोयरका लागि त्यो ठूलो निराशा बन्यो । सन् २०२२ को कतार विश्वकपमा पनि जर्मनी फेरि समूह चरण पार गर्न असफल रह्यो ।

सन् २०२६ को अमेरिका, क्यानडा र मेक्सिको विश्वकपमा अनुभवी नोयरले सम्भावित अन्तिम पटक जर्मनीको पोस्ट सम्हाले । उमेर र चोटका कारण उनको खेल्ने समय सीमित भए पनि टोलीका लागि उनको अनुभव, नेतृत्व र आत्मविश्वास अमूल्य रह्यो । क्लब फुटबलमा बायर्न म्युनिखसँग अनेकौँ बुन्डेसलिगा, जर्मन कप, च्याम्पियन्स लिग र क्लब विश्वकप जितेका नोयरले आधुनिक गोलकिपिङको परिभाषा नै परिवर्तन गर्ने खेलाडीका रूपमा आफ्नो नाम इतिहासमा स्थापित गरिसकेका छन् ।

केभिन डी ब्रुइने (बेल्जियम)

केभिन डी ब्रुइनेले सन् २०१४ को ब्राजिल विश्वकपबाट आफ्नो विश्वकप यात्रा सुरु गरेका थिए । त्यस विश्वकपमा उनले बेल्जियमलाई १२ वर्षपछि क्वार्टरफाइनलसम्म पुर्‍याउन महत्त्वपूर्ण भूमिका खेले । टोली अर्जेन्टिनासँग १–० ले पराजित हुँदै बाहिरिएको थियो ।

सन् २०१८ को रुस विश्वकप डी ब्रुइनेको करियरको उत्कृष्ट विश्वकप रह्यो । ब्राजिलविरुद्ध क्वार्टरफाइनलमा गरेको निर्णायक गोलको मद्दतमा बेल्जियम सेमिफाइनल पुग्यो । यद्यपि फ्रान्ससँग हार बेहोरेपछि टोली तेस्रो स्थानमा सीमित रह्यो । यही नतिजा बेल्जियमको विश्वकप इतिहासकै उत्कृष्ट उपलब्धि बन्यो ।

सन् २०२२ को कतार विश्वकपमा बेल्जियमबाट धेरै आशा गरिएको थियो। तर टोलीले अपेक्षाअनुसार प्रदर्शन गर्न सकेन र समूह चरणबाटै बाहिरियो । यससँगै बेल्जियमको ‘गोल्डेन जेनेरेसन’ ले विश्वकप जित्ने सपना पनि लगभग समाप्त भयो ।

सन् २०२६ को अमेरिका, क्यानडा र मेक्सिकोमा आयोजित विश्वकपलाई डी ब्रुइनेको सम्भावित अन्तिम विश्वकपका रूपमा हेरिएको थियो । बेल्जियमलाई पहिलो पटक विश्व च्याम्पियन बनाउने अन्तिम प्रयास पनि सफल हुन सकेन । विश्वकप ट्रफी जित्न नसके पनि उनी आफ्नो पुस्ताकै उत्कृष्ट प्लेमेकर र पासिङका बादशाहका रूपमा सधैँ सम्झिनेछन् ।

भर्जिल भान डाइक (नेदरल्यान्ड्स)

भर्जिल भान डाइकले सन् २०१८ को रुस विश्वकप खेल्न पाएनन्, किनभने नेदरल्यान्ड्स नै छनोट हुन असफल भएको थियो । उनले पहिलो पटक सन् २०२२ को कतार विश्वकपमा कप्तानका रूपमा विश्वकप खेले । उत्कृष्ट नेतृत्व गर्दै उनले नेदरल्यान्ड्सलाई क्वार्टरफाइनलसम्म पुर्‍याए । अर्जेन्टिनाविरुद्ध रोमाञ्चक खेलमा निर्धारित र अतिरिक्त समय २–२ को बराबरी भएपछि पेनाल्टी सुटआउटमा डच टोली पराजित भयो र विश्वकप यात्रा टुंगियो।

सन् २०२६ को विश्वकप भान डाइकका लागि सम्भावित अन्तिम विश्वकप थियो। सन् १९७४, १९७८ र २०१० मा उपविजेतामा सीमित रहेको नेदरल्यान्ड्सलाई पहिलो विश्वकप उपाधि दिलाउने सपना लिएर मैदानमा उत्रिएका उनी अन्ततः त्यो सपना पूरा गर्न सफल भएनन् । तर आधुनिक फुटबलका उत्कृष्ट रक्षक र डच टोलीका महान् कप्तानमध्ये एकका रूपमा उनको योगदान सदैव स्मरणीय रहनेछ ।

हेउङ मिन सन (दक्षिण कोरिया)

हेउङ मिन सनले सन् २०१४ को ब्राजिल विश्वकपबाट आफ्नो विश्वकप यात्रा सुरु गरेका थिए । पहिलो विश्वकपमै उनले अल्जेरियाविरुद्ध गोल गरे, यद्यपि दक्षिण कोरिया समूह चरणबाटै बाहिरियो ।

सन् २०१८ को रुस विश्वकपमा उनले साविक विश्व विजेता जर्मनीविरुद्ध ऐतिहासिक जितमा दोस्रो गोल गर्दै दक्षिण कोरियालाई विश्व फुटबलको सबैभन्दा ठूलो उलटफेरमध्ये एक दिलाए। त्यस जितले जर्मनीलाई समूह चरणबाटै बाहिरिन बाध्य बनाएको थियो ।

सन् २०२२ को कतार विश्वकपमा कप्तानका रूपमा उनले दक्षिण कोरियालाई अन्तिम १६ सम्म पुर्‍याए । पोर्चुगलविरुद्धको निर्णायक खेलमा अन्तिम समयमा दिएको उत्कृष्ट असिस्ट दक्षिण कोरियाको ऐतिहासिक जितको आधार बन्यो ।

सन् २०२६ को अमेरिका, क्यानडा र मेक्सिकोमा आयोजित विश्वकपलाई सनको सम्भावित अन्तिम विश्वकपका रूपमा हेरिएको थियो । एसियाली टोलीलाई विश्वकपको अझ गहिरो चरणसम्म पुर्‍याउने सपना बोकेर मैदानमा उत्रिएका उनले आफ्नो सम्पूर्ण अनुभव टोलीका लागि समर्पित गरे। विश्वकप ट्रफी जित्न नसके पनि उनले एसियाली खेलाडी पनि विश्व फुटबलको सर्वोच्च स्तरमा सफल हुन सक्छन् भन्ने विश्वास स्थापित गर्दै सम्पूर्ण एसियाका लागि प्रेरणाको स्रोत बने।

मोहम्मद सलाह: अफ्रिकी फुटबलको विश्वव्यापी अनुहार

आधुनिक अफ्रिकी फुटबलको सबैभन्दा प्रभावशाली खेलाडीको नाम लिनुपर्दा मोहम्मद सलाह अग्रस्थानमा पर्छन् । गति, उत्कृष्ट फिनिसिङ, बायाँ खुट्टाको सटिक प्रहार र निर्णायक क्षणमा खेल बदल्ने क्षमताले उनलाई आफ्नो पुस्ताकै उत्कृष्ट फरवार्डमध्ये एक बनाएको छ ।

इजिप्टको एउटा सामान्य परिवारमा जन्मिएका सलाहले सानो उमेरदेखि नै ठूलो सपना देखेका थिए । प्रशिक्षणका लागि हरेक दिन घण्टौँ यात्रा गर्ने उनी स्विट्जरल्यान्डको बासेलबाट युरोपेली फुटबलमा परिचित बने । त्यसपछि चेल्सी पुगे पनि अपेक्षाअनुसार अवसर पाएनन् । इटालीका फियोरेन्टिना र रोमा हुँदै उनी इंग्लिस क्लब लिभरपुल पुगेपछि भने उनको करियरले नयाँ उचाइ लियो ।

लिभरपुलमा प्रशिक्षक जुर्गेन क्लोपको नेतृत्वमा उनले आफूलाई विश्व फुटबलकै उत्कृष्ट फरवार्डमध्ये एकका रूपमा स्थापित गरे। प्रिमियर लिग, एफए कप, लिग कप, युइएफए च्याम्पियन्स लिग, फिफा क्लब विश्वकप र युइएफए सुपर कप जित्दै उनले क्लब इतिहासका महान् खेलाडीमध्ये आफ्नो नाम लेखाए । प्रिमियर लिग गोल्डेन बुटसहित अनेक व्यक्तिगत पुरस्कार जितेका सलाह लिभरपुलका सर्वकालीन महान् खेलाडीमध्ये पनि गनिन्छन् ।

राष्ट्रिय टोलीमा पनि उनी इजिप्टका सबैभन्दा भरोसायोग्य खेलाडी बने। उनले इजिप्टलाई दुई पटक अफ्रिका कप अफ नेसन्सको फाइनलसम्म पुर्‍याए, यद्यपि दुवै पटक उपाधिबाट वञ्चित भए। अफ्रिकी फुटबलमा उनको योगदानले उनलाई सम्पूर्ण महादेशकै प्रेरणादायी खेलाडी बनाएको छ ।

विश्वकपमा भने सलाहको यात्रा अपेक्षाअनुसार सफल हुन सकेन। उनले २०१८ को रुस विश्वकपमा पहिलो पटक विश्वकप खेले, तर चोटका कारण आफ्नो उत्कृष्ट प्रदर्शन दिन सकेनन् र इजिप्ट समूह चरणबाटै बाहिरियो ।

२०२२ को विश्वकपमा इजिप्ट छनोट हुन असफल रह्यो। २०२६ को विश्वकपलाई उनको सम्भावित अन्तिम विश्वकपका रूपमा हेरिएको छ, जहाँ इजिप्टलाई विश्वमञ्चमा नयाँ सफलता दिलाउने सपना र मौका छ ।

विश्वकप ट्रफी जित्ने सपना बोकेका मोहम्मद सलाहले अफ्रिकी फुटबललाई विश्वव्यापी पहिचान दिलाउने, इजिप्टका महानतम खेलाडीमध्ये एकका रूपमा स्थापित हुने र आफ्नो पुस्ताका उत्कृष्ट फरवार्डमध्ये एकका रूपमा विश्व फुटबलमा अमिट छाप छोडेका छन्। उनी केवल इजिप्टका नायक मात्र होइनन्, सम्पूर्ण अफ्रिकाका करोडौँ युवा खेलाडीका प्रेरणाका स्रोत पनि हुन्।

कासेमिरो: ब्राजिलको अदृश्य योद्धा

यदि आधुनिक फुटबलमा टोलीको सन्तुलन कायम राख्ने, विपक्षीको आक्रमण रोक्ने र निर्णायक क्षणमा टोलीलाई बचाउने मिडफिल्डरको नाम लिनुपर्दा कासेमिरो अग्रपङ्क्तिमा पर्छन् । मैदानमा उनको भूमिका प्रायः चर्चाभन्दा पर रहन्छ, तर सफल टोली निर्माणमा उनको योगदान अमूल्य मानिन्छ ।

ब्राजिलको साओ पाउलो क्लबबाट व्यावसायिक फुटबल सुरु गरेका कासेमिरो रियल म्याड्रिड पुगेपछि विश्व फुटबलका उत्कृष्ट डिफेन्सिभ मिडफिल्डरमध्ये एक बने। टोनी क्रुस र लुका मोड्रिचसँग मिलेर उनले रियलको ऐतिहासिक मध्यपङ्क्ति निर्माण गरे। पाँच पटक युइएफए च्याम्पियन्स लिग, ला लिगा, क्लब विश्वकप र अन्य थुप्रै उपाधि जितेपछि उनी म्यानचेस्टर युनाइटेड पुगे र त्यहाँ पनि आफ्नो नेतृत्व क्षमता देखाए।

राष्ट्रिय टोलीमा कासेमिरो ब्राजिलका सबैभन्दा भरपर्दा खेलाडीमध्ये एक बने। उनले ब्राजिललाई २०१९ को कोपा अमेरिका जिताउन महत्त्वपूर्ण भूमिका खेले र लामो समयसम्म टोलीको मध्यपङ्क्तिको मुख्य आधार बने।

विश्वकपमा कासेमिरोले २०१८ को रुस विश्वकप, २०२२ को कतार विश्वकप र २०२६ को विश्वकप खेले। २०१८ मा ब्राजिल क्वार्टरफाइनलमा बेल्जियमसँग पराजित भयो भने २०२२ मा उनले स्विट्जरल्यान्डविरुद्ध निर्णायक गोल गरे पनि टोली क्रोएसियासँग पेनाल्टी सुटआउटमा हार्दै बाहिरियो। २०२६ को विश्वकपलाई उनको सम्भावित अन्तिम विश्वकपका रूपमा हेरिएको थियो, जहाँ ब्राजिललाई पुनः विश्व च्याम्पियन बनाउने सपना पूरा हुन सकेन। तर कासेमिरो आधुनिक फुटबलका सर्वश्रेष्ठ डिफेन्सिभ मिडफिल्डरमध्ये एकका रूपमा इतिहासमा सदैव सम्झिनेछन्।

ह्यारी केन: गोलको भोक कहिल्यै नमर्ने कप्तान

यदि आधुनिक इङ्लिस फुटबलको सबैभन्दा भरपर्दो स्ट्राइकरको नाम लिनुपर्दा ह्यारी केन पहिलो रोजाइमा पर्छन्। उत्कृष्ट फिनिसिङ, खेल पढ्ने क्षमता र टोलीका लागि अवसर सिर्जना गर्ने कलाले उनलाई आफ्नो पुस्ताकै उत्कृष्ट फरवार्डमध्ये एक बनाएको छ।

टोटेनहम हटस्परबाट व्यावसायिक करियरलाई उचाइ दिएका केन क्लब इतिहासकै सर्वाधिक गोलकर्ता बने। प्रिमियर लिगमा तीन पटक गोल्डेन बुट जितेका उनले सन् २०२३ मा जर्मन क्लब बायर्न म्युनिखमा आबद्ध भएपछि पनि गोल गर्ने लय कायम राखे। बुन्डेसलिगा, घरेलु प्रतियोगिता र युरोपेली फुटबलमा निरन्तर उत्कृष्ट प्रदर्शन गर्दै उनले विश्वका उत्कृष्ट नम्बर–९ मध्ये आफ्नो स्थान सुरक्षित गरे।

राष्ट्रिय टोलीमा केन इङ्ल्यान्डका कप्तान र सर्वाधिक अन्तर्राष्ट्रिय गोलकर्ता बने। उनले इङ्ल्यान्डलाई लगातार ठूला अन्तर्राष्ट्रिय प्रतियोगितामा उपाधिको दाबेदार टोलीका रूपमा स्थापित गर्न महत्त्वपूर्ण भूमिका खेले।

विश्वकपमा केनले २०१८ को रुस विश्वकपमा ६ गोल गर्दै गोल्डेन बुट जिते र इङ्ल्यान्डलाई २८ वर्षपछि सेमिफाइनलसम्म पुर्‍याए। २०२२ को कतार विश्वकपमा टोली क्वार्टरफाइनलसम्म पुग्यो, तर फ्रान्ससँग पराजित हुँदा उनले निर्णायक पेनाल्टी गोल गर्न सकेनन् । २०२६ को विश्वकपलाई उनको सम्भावित अन्तिम विश्वकपका रूपमा हेरिएको छ, जहाँ सन् १९६६ यता पहिलो विश्वकप उपाधि जित्ने इङ्ल्यान्डको सपना पूरा गर्ने अन्तिम अवसर छ ।