एजेन्सी । दक्षिण कोरियाको एक अदालतले शुक्रबार पूर्व राष्ट्रपति यून सुक योललाई डिसेम्बर २०२४ को आफ्नो असफल सैन्य शासन (मार्शल ल) घोषणाका लागि बहाना बनाउन उत्तर कोरियामा सैन्य ड्रोन घुसपैठ गराउन आदेश दिएको आरोपमा ३० वर्षको जेल सजाय सुनाएको छ ।
अदालतको विज्ञप्ति अनुसार, सियोल केन्द्रीय जिल्ला अदालतले शत्रुलाई सहयोग गरेको र सत्ताको दुरुपयोग गरेकोमा युनलाई दोषी ठहर गरेको छ । अदालतले यूनले सुरुदेखि नै अक्टोबर २०२४ मा प्योङयाङमाथि भएको ड्रोन घुसपैठको षड्यन्त्र गरेको बताएको छ ।
यो फैसला पदच्युत अनुदारवादी नेताविरुद्धका शृंखलाबद्ध फैसलाहरूमध्येको एक हो । कुनै समय दक्षिण कोरियाको शीर्ष अभियोजक रहेका युनको सैन्य शासन लगाउने आदेशले एसियाको चौथो ठूलो अर्थतन्त्रलाई दशकौंपछिको सबैभन्दा गहिरो राजनीतिक संकटमा धकेलेको थियो ।
यूनले ड्रोन घुसपैठको सम्बन्धमा कुनै पनि गलत कार्य गरेको कुरा अस्वीकार गर्दै आएका थिए ।
उनका वकिलहरूले उनले उक्त अभियानको न त आदेश दिएका थिए न त पछि स्वीकृत नै गरेका थिए भनेका छन् । उनीहरूका अनुसार, यो कार्य सैन्य शासनसँग सम्बन्धित नभई उत्तर कोरियाले सीमा क्षेत्रमा महिनौंदेखि फोहर भरिएका बेलुनहरू पठाएको विरुद्धको प्रतिक्रिया मात्र थियो ।
अभियोजकहरूले अप्रिलमा यूनका लागि ३० वर्षको जेल सजाय माग गरेका थिए ।
फेब्रुअरीमा दक्षिण कोरियाको एक अदालतले सैन्य शासनको प्रयाससँग सम्बन्धित विद्रोहको नेतृत्व गरेकोमा यूनलाई दोषी ठहर गर्दै आजीवन कारावासको सजाय सुनाएको थियो ।
संवैधानिक अदालतले उनीविरुद्धको महाभियोगलाई सदर गरेपछि उनलाई गत वर्ष पदबाट हटाइएको थियो जसले मध्यावधि निर्वाचन निम्त्यायो र उक्त निर्वाचन उदारवादी राष्ट्रपति ली जे म्योङले जिते ।
पहिले नै हिरासतमा रहेका यूनले शुक्रबारको तल्लो अदालतको फैसला विरुद्ध पुनरावेदन गर्न सक्छन् । संकटमा परेका यी पूर्व राष्ट्रपतिले यसअघिका फैसलाहरू विरुद्ध पनि पुनरावेदन गरिसकेका छन् ।
प्रतिक्रिया