एजेन्सी । बंगलादेशको अन्तरिम सरकारका खेलकुद सल्लाहकार आसिफ नजरुलसँग आज भएको बैठकपछि बंगलादेश क्रिकेट बोर्ड (बीसीबी) का अध्यक्ष अमीनुल इस्लाम बुलबुलले बंगलादेश टी–२० विश्वकपमा सहभागी हुन भारत नजाने बताएका छन् ।
खेलकुद सल्लाहकार आसिफ नजरुलले पत्रकारहरूलाई सरकारको निर्णय स्पष्ट रहेको जानकारी दिँदै बंगलादेशी टोली भारतमा हुने विश्वकपमा नखेल्ने बताएको बीबीसीले उल्लेख गरेको छ ।
‘हामीले आईसीसीबाट न्याय पाएका छैनौं । हामी आशा गर्छौं कि आईसीसीले हाम्रो सुरक्षा सम्बन्धी चिन्ताहरूमाथि विचार गर्नेछ र श्रीलंकामा खेल्ने हाम्रो अनुरोधलाई स्वीकार गर्नेछ,’ उनले भने ।
आसिफ नजरुलले ‘सिर झुकाउनु र देशका जनताको सुरक्षालाई खतरामा पार्नुका परिणामहरूमाथि गम्भीरतापूर्वक विचार गरिनुपर्ने’ बताए ।
नजरुलले यस विषयमा आफूले क्रिकेटरहरूसँग पनि कुरा गरेको जानकारी दिए ।
उता बीसीबी अध्यक्ष अमीनुल इस्लाम बुलबुलले भने, ‘हामी आईसीसीसँग पुनः सम्पर्क गर्नेछौं,’ उनले भने, ‘हामी भारतमा होइन, श्रीलंकामा खेल्न चाहन्छौं ।’
यसअघि अन्तर्राष्ट्रिय क्रिकेट परिषद् (आईसीसी) का तर्फबाट टी–२० विश्वकपमा सहभागी हुने विषयमा दिइएको अल्टिमेटममा बंगलादेश क्रिकेट बोर्डका अध्यक्ष अमीनुल इस्लामले चमत्कार हुने आशा व्यक्त गरेका थिए ।
भारतसँग चलिरहेको तनावका बीच बंगलादेशले सुरक्षाको कारण देखाउँदै विश्वकपका आफ्ना खेलहरू भारतको सट्टा श्रीलंकामा सार्न अनुरोध गरेको थियो ।
यसमा आईसीसीले आफूले सबै सुरक्षा मूल्याङ्कन गराएको र यति छोटो समयमा परिवर्तन गर्न सम्भव नभएको निर्णय सुनाएको थियो ।
बुधबार भएको आईसीसीको बैठकमा बीसीबीलाई यदि उनीहरूको टोली भारत जाँदैन भने, उनीहरूको ठाउँ अर्को टोलीले पाउने जानकारी दिइएको थियो । रिपोर्टका अनुसार अमीनुल इस्लामले बंगलादेश सरकारसँग छलफलका लागि आईसीसीसँग समय मागेका छन् ।
बंगलादेशको भारतमा नखेल्ने निर्णय अगाडि क्रिकइन्फोको रिपोर्टका अनुसार अमीनुल इस्लामले भनेका थिए, ‘मैले आईसीसी बोर्डसँग अन्तिम पटक आफ्नो सरकारसँग कुरा गर्नका लागि समय मागेको छु । उनीहरूले यो जायज कुरा भएको भन्दै मलाई जवाफका लागि २४ देखि ४८ घण्टाको समय दिएका छन् । म सरकारमाथि दबाब दिन चाहन्न । हामीलाई थाहा छ कि भारत हाम्रा लागि सुरक्षित छैन । हामी श्रीलंकामा खेल्नुपर्ने आफ्नो अडानमा कायम छौं । मलाई थाहा छ कि आईसीसीले हाम्रो अनुरोध खारेज गरिदिएको छ, तर हामी सरकारसँग फेरि एक पटक कुरा गर्नेछौं। म आईसीसीलाई सरकारको प्रतिक्रियाबारे जानकारी दिनेछु ।’
एक दिनमा उनले के हासिल गर्न सक्नेछन् भन्ने प्रश्नमा अमीनुल इस्लामले भने, ‘म आईसीसीबाट करिश्माको आशा गरिरहेको छु। विश्वकपमा कसले खेल्न चाहँदैन र? बंगलादेशका खेलाडीहरू विश्वकप खेल्न चाहन्छन्। तर हामीलाई भारत हाम्रा खेलाडीका लागि सुरक्षित छ जस्तो लाग्दैन। जब कुनै सरकारले निर्णय लिन्छ, उसले केवल खेलाडीहरूलाई मात्र ध्यानमा राख्दैन, बरु सबै पक्षहरूमा विचार गर्दछ ।’
फेब्रुअरी ७ बाट सुरु भइरहेको आईसीसी टी–२० विश्वकपको प्रतिस्पर्धामा बंगलादेश समूह ‘सी’ मा थियो। उक्त समूहमा बंगलादेश बाहेक इङ्गल्याण्ड, इटाली, वेस्टइन्डिज र नेपाल रहेका छन् ।
आईसीसीले बंगलादेश नखेलेको खण्डमा विश्वकपमा उसको ठाउँ स्कटल्याण्डले लिने कुरा पहिले नै भनिसकेको छ ।
प्रतियोगिताको पहिलो खेल बंगलादेश र वेस्टइन्डिजबीच नै हुनुपर्ने थियो । बंगलादेशले समूह चरणका तीन खेल कोलकातामा र एउटा मुम्बईमा खेल्नुपर्ने तालिका थियो । यस विश्वकपको आयोजना भारत र श्रीलंकाले संयुक्त रूपमा गरिरहेका छन् ।
भारत र बंगलादेशबीच चलिरहेको तनाव र आरोप–प्रत्यारोपका बीचमा त्यसबेला नयाँ मोड आयो, जब भारतीय क्रिकेट नियन्त्रण बोर्ड (बीसीसीआई) ले आईपीएल फ्रेन्चाइजी कोलकाता नाइट राइडर्सलाई बंगलादेशी तीव्र गतिका बलर मुस्तफिजुर रहमानलाई रिलिज गर्न निर्देशन दियो ।
मुस्तफिजुर रहमानलाई कोलकाता नाइट राइडर्सले आईपीएल २०२६ का लागि ९ करोड भारु भन्दा बढीमा किनेको थियो ।
मुस्तफिजुरलाई टोलीबाट बाहिर निकालेपछि बंगलादेशको अन्तरिम सरकारका युवा तथा खेलकुद मामिला सल्लाहकार आसिफ नजरुलले ‘बंगलादेशी क्रिकेटर र देशको अपमान कुनै पनि हालतमा सह्य नहुने’ बताएका थिए ।
बंगलादेशले अर्को कदम चाल्दै आफ्नो देशमा आईपीएलको प्रसारणमा रोक लगाइदियो।
जनवरी ४ मा बंगलादेश क्रिकेट बोर्ड (बीसीबी) ले सरकारसँगको परामर्शपछि आईसीसीलाई एउटा पत्र लेख्दै सुरक्षाको कारणले बंगलादेशको टोली टी–२० विश्वकपका खेलका लागि भारत नजाने जानकारी दिएको थियो । तर आईसीसीले बीसीबीको उक्त मागलाई खारेज गरिदियो ।
यसैबीच समाचार एजेन्सी पीटीआईले पाकिस्तान क्रिकेट बोर्डको एउटा स्रोतलाई उद्धृत गर्दै पीसीबीले आईसीसी समक्ष बंगलादेशको अडानलाई समर्थन गरेको बताएको छ । यद्यपि, पीसीबीको तर्फबाट यस पूरै मामिलामा कुनै सार्वजनिक बयान आएको छैन ।
पाकिस्तानले बीसीसीआई र आईसीसीसँगको ‘हाइब्रिड मोडल’ सम्झौता अन्तर्गत टी–२० विश्वकपका आफ्ना सबै खेलहरू श्रीलंकामा खेल्नेछ ।
आईसीसीले आफ्नो बयानमा टी–२० विश्वकप २०२६ तय गरिएको तालिका अनुसार नै आयोजना हुने र बंगलादेशका खेलहरू भारतमै हुने पुष्टि गरेको छ ।
आईसीसीका अनुसार, ‘यो निर्णय बुधबार, जनवरी २१ मा भिडियो कन्फरेन्सिङ मार्फत भएको आईसीसी बोर्डको बैठकपछि लिइएको हो । यो बैठक बंगलादेश क्रिकेट बोर्ड (बीसीबी) ले आफ्ना खेलहरू श्रीलंकामा गराउन गरेको अनुरोधपछि थप प्रक्रियामा छलफल गर्न बोलाइएको थियो ।’
आईसीसीले विज्ञप्तिमा भनेको छ, ‘यो निर्णय सबै सुरक्षा मूल्याङ्कनहरूमा विचार गरेपछि लिइएको हो, जसमा स्वतन्त्र समीक्षा पनि समावेश थियो। यसले देशको कुनै पनि खेल स्थलमा बंगलादेशी खेलाडी, मिडियाकर्मी, अधिकारी र प्रशंसकहरूलाई कुनै खतरा नरहेको सङ्केत गरेको छ ।’
‘आईसीसीको बैठकमा यो कुरा अगाडि आयो कि प्रतियोगिताको ठीक अगाडि कुनै परिवर्तन लागू गर्न सम्भव थिएन। साथै, कुनै प्रकारको सुरक्षा खतरा नभएको अवस्थामा खेल तालिका परिवर्तन गर्दा एउटा यस्तो नजिर बस्न सक्छ, जसले भविष्यमा आईसीसीका आयोजनाहरूका लागि जोखिम पैदा गर्न सक्छ।’
आईसीसी प्रवक्ताले थप भने, ‘यी प्रयासहरूका बावजुद बंगलादेश क्रिकेट बोर्ड आफ्नो अडानमा कायम रह्यो र बारम्बार आफ्नो सहभागितालाई एउटा खेलाडीको घरेलु लिगसँग जोडिएको फरक र असम्बन्धित घटनाक्रमसँग जोडिरह्यो । यस मुद्दाले टूर्नामेन्टको सुरक्षा वा त्यसमा सहभागितासँग जोडिएका शर्तहरूमा कुनै असर पार्दैन।’
उनले भने, ‘आईसीसीको भेन्यू (स्थल) र तालिका सम्बन्धी निर्णयहरू खतराको मूल्याङ्कन, आयोजकको आश्वासन र टूर्नामेंटको सहमत सहभागिता शर्तका आधारमा गरिन्छ। यी नियमहरू टूर्नामेंटमा समावेश सबै २० देशमा समान रूपमा लागू हुन्छन्। बंगलादेश टोलीको सुरक्षालाई असर गर्ने कुनै स्वतन्त्र सुरक्षा निष्कर्षको अभावमा आईसीसी खेलहरू स्थानान्तरण गर्न असमर्थ छ।’
प्रतिक्रिया