२० विमानस्थल बन्द गरेर थप नयाँ बनाउँदै सरकार, ६ स्तरोन्नतिसहित तीनवटा नयाँ निर्माण हुँदै

काठमाडौं । सरकारले देशभरका विभिन्न आन्तरिक विमानस्थल स्तरोन्नति गर्ने र नयाँ विमानस्थल निर्माणको कार्यलाई अगाडि बढाइहेको जानकारी दिएको छ ।

देशैभरका ५५ विमानस्थमध्ये २० वटा सञ्चालन गर्न नसकेर बन्द गरेको सरकारले थप नयाँ विमानस्थल बनाउने र स्तरोन्नति गर्ने कार्य कार्यलाई भने निरन्तरता दिइरहको छ ।

नेपाल नागरिक उड्डय प्राधिकरणको तथ्यांकअनुसार हाल देशैभरका विमानस्थमध्ये ५२ आन्तरिक, तीन अन्तर्राष्ट्रिय विमानस्थल छन् ।

अन्तर्राष्ट्रिय विमानस्थल नै काठमाडौंबाहेक सञ्चालन हुन सकेको छैन । भैरहवाको गौतमबुद्ध विमानस्थलमा आक्कलझुक्ल उडान हुने गरेको भए पनि पोखरामा भने सञ्चालनमा आएको दुई वर्षभन्दा लामो समयदेखि अन्तर्राष्ट्रिय उडान ठप्प छ ।

आन्तरिकतर्फ पनि ३५ वटा मात्रै विमानस्थल सञ्चालनमा छन् भने २० वटा अझै बन्द छ । सञ्चालनमा रहेका विमानस्थलमा पनि ३ वटा हव विमानस्थल छन् ।

सरकारले २० वटा विमानस्थल सञ्चालन गर्न नसक्दा समेत थप विमानस्थल बनाउने कार्यलाई रोकेको छैन ।

पर्यटन मन्त्रालयले सार्वजनिक गरेको १ कात्तिकदेखि पुस मसान्तसम्मको विवरणमा तीनवटा नयाँ विमास्थल निर्माणसहित ६ वटाको स्तरान्नति भइरहेको उल्लेख छ ।

पर्यटन मन्त्री बद्रिप्रसाद पाण्डले सार्वजनिक गरेको एक विवरणमा अर्खाखाँची विमानस्थल, दाङको नारायणपुर र तेह्रथुमको चुहानाडाँडा विमास्थनस्थल निर्माणाधीन अवस्थामा छ ।

पर्यटन मन्त्रालयले सार्वजनिक गरेको विवरणअनुसार अर्खाखाँची विमानस्थलको धावनमार्ग, ट्याक्सिवे, एप्रोन कालोपत्रे तथा ड्रेनेजको ठेक्का सम्झौता सम्पन्न भइ निर्माण कार्य सुरु भएको उल्लेख छ ।

विवरणअनुसार दाङको नारायणपुर विमानस्थल निर्माण कार्यका लागि विस्तृत सम्भाव्यता अध्ययन अन्तिम चरणमा पुगेको छ भने चुहानडाँडाको पनि अध्ययन प्रतिवेदन तयार हुँदै गरेको उल्लेख छ ।

चुहानडाँडा विमानस्थलको भने २०७९ जेठमै वातावरणीय प्रभाव मूल्यांकन प्रतिवेदनसमेत तयार भइसकेको छ । करिब १ अर्ब रुपैयाँ लागतमा बन्ने यो विमानस्थल ११ हेक्टर क्षेत्रफलमा बन्ने छ भने विमानस्थलको धावनमार्ग ६४० मिटर लामो र २० मिटर मात्रै चौडाइ हुने छ । यो विमानस्थल साना जहाजको उडान अवतरणको लागि मात्रै उपयुक्त हुने गरी बन्ने छ । यो विमानस्थलबाट सुकेटार ११ नटिकल माइलमै छ भने चन्द्रगढी ४१ र विराटनगर ४७ नटिकल माइलमा पर्छ ।

नेपाल नागरिक उड्डयन प्राधिकरणका प्रवक्ता हंसराज पाण्डेका अनुसार राजविराज विमानस्थल स्तरोन्नति भएर रात्री उडान सुरु भएको र जनकपुरमा सामान्य काम मात्रै भएको बताए । केही विमानस्थलमा अघिल्लो वर्षदेखि भइरहेको काममलाई निरन्तरता दिएको मन्त्रालयले जनाएको छ ।

‘प्राधिकरण अन्तर्गतका यी विमानस्थलको निर्माण, स्तरोन्नति गत वर्षदेखि भइरहेको र यो वर्ष पनि निरन्तरता पाएका आयोजना मात्रै हुन नयाँ नै काम गर्ने गरी अगाडि बढेको होइन,’ पाण्डेले भने ।