सन्दीपविरुद्धको मुद्दामा आज थुनछेक बहस, यस्तो हुन्छ प्रकृया

काठमाडौं । नेपाली राष्ट्रिय क्रिकेट टोलीका निलम्बित कप्तान सन्दीप लामिछानेविरुद्धको मुद्दामा आजदेखि थुनछेक बहस हुने भएको छ ।

लामिछानेविरुद्ध सोमबार जिल्ला सरकारी वकिलको कार्यालले काठमाडौं जिल्ला अदालतमा जबर्जस्ती करणीसम्बन्धी मुद्दा दर्ता भएको थियो । उक्त मुद्दामा आजदेखि थुनछेक बहस हुने भएको हो ।

सन्दीपलाई थुनामा राखेर बाँकी मुद्दाको सुनुवाइ अघि बढाउने कि थुनामुक्त गरेर भन्नेबारे अदालतमा पक्ष विपक्षका कानुन व्यवसायीले बहस गर्ने छन् ।

त्यसकै आधारमा इजलासले उनलाई थुनामा राखेर मुद्दाको सुनुवाइ अघि बढाउने वा बाहिर बसेर मुद्दा लड्न दिने बारे निर्णय गर्ने छ ।

सन्दीपविरुद्ध मुलुकी अपराध संहिता, २०७४ को परिच्छेद १८ को करणीसम्बन्धी कसुरको दफा २१९ को उपदफा (३)को देहाय (घ) अन्तर्गतको कसुर गरेको अभियोग लगाइएको छ ।

सन्दीपको बयान: उनको मन राख्न नगरकोट गएँ, १९ वर्ष भनेकी थिइन्, गफ गर्दागर्दै कुर्सीमै निदाएँ

दफा २१९ को उपदफा (३)को देहाय (घ) मा १६ वर्षभन्दा बढी १८ वर्षभन्दा कम उमेरकी महिलालाई करणी गरेमा १० देखि १२ वर्षसम्म कैद सजाय हुने व्यवस्था छ । आरोपपत्रमा सन्दीपविरुद्ध अधिकतम १२ वर्ष जेल सजायको मागदाबी गरिएको छ ।

१७ वर्षकी एक नाबालिगले आफूमाथि सन्दीपले काठमाडौंको एक होटलमा लगेर जबरजस्ती करणी गरको भन्दै प्रहरीमा जाहेरी दिएकी थिइन् ।

किशोरीको बयान: सन्दीपले दुईपटक करणी गरे, प्रतिरोध गर्दा ढाडमा जोडले हाने

उनको जाहारीपछि सन्दीप विदेशबाट फर्किएकै दिन विमानस्थलबाट पक्राउ परेका थिए ।

प्रहरीमा दिएको वयानका क्रममा सन्दीपले आफूले बलात्कार नगरेको भन्दै इन्कारी बयान दिएका छन् भने किशोरीले दुई पटक आफूमाथि जबरजस्ती करणी भएको आरोप लगाएकी छन् ।