कोरोना भाइरस विरुद्धको खोपमा महत्वपूर्ण सफलता, अमेरिकी कम्पनीले माग्यो प्रयोगको अनुमति

काठमाडौं । कोरोना कहरबाट जुधिरहेका आम मानिसका लागि खुसीको अर्को खबर छ । अमेरिकी औषधि कम्पनी फाइजर र उसको जर्मनी सहयात्री वायोएनटेकले कोभिड–१९ विरुद्ध बनाएको खोप प्रयोगका लागि अनुमति माग्दै अमेरिकामा स्थानीय समय अनुसार शुक्रवार आवेदन दिइएको छ ।

आफूहरुले तयार पारेको खोप प्रभवकारी र सम्पूर्ण रुपमा राम्रो भएको भन्दै खोप निर्माता कम्पनीले प्रयोगका लागि अनसमति मागेको हो ।

झण्डै १ वर्षदेखि संसारभरका नागरिक कोरोनाको तवाहमा परिरहेका छन् । अमेरिकामा मात्रै सातामा नै १ लाख बढी संक्रमित देखा परेका छन् । यस्तै, भारतमा पनि अवस्था झन बिग्रदै गएको छ ।

यूरोपमा कोरोनाको दोस्रो लहर शुरु भएको छ । यही क्रममा अमेरिकी खोप निर्माता कम्पनीले खोप प्रयोगका लागि अनुमति मागेको विवरण सार्वजनिक भएको हो ।

उक्त खोप प्रयोग गर्न सुरक्षित छ कि छैन भन्ने निर्णय अमेरिकाको खाद्य तथा औषधि प्रशासन (एफडीए) ले गर्नेछ । एफडिएबाट अनुमति प्राप्त गरेमा औषधिको प्रयोगका लागि सुरक्षित मानिने छ ।

उक्त खोपको परीक्षणसम्बन्धी तथ्याङ्क अध्ययनका लागि एफडीएले कति समय लगाउँछ भन्ने स्पष्ट छैन । यद्यपि अमेरिकी सरकारले डिसेम्बर महिनाको मध्यसम्ममा खोपलाई स्वीकृति दिने अपेक्षा गरिएको छ ।

अन्तिम चरणका परीक्षणका तथ्याङ्कले ६५ वर्ष उमेरमाथिका मानिसलाई खोपले ९४ प्रतिशत जोगाउने देखाएको छ । बेलायतले उक्त खोपको ४ करोड मात्रा मगाइसकेको छ ।

जुन महिनायता पहिलोपटक त्यहाँ एकै दिनमा दुई हजारभन्दा बढीको मृत्यु भएको थियो । यदि एफडीएले डिसेम्बरको आधासम्ममा स्वीकृति दियो भने फाइजर र बायोएनटेक ‘केही घण्टाभित्रै खोप वितरण गर्न तयार’ भएको उनीहरूले बताएका छन् ।

विश्वव्यापी महामारी बनेर फैलिएको यो कोरोनाभाइरसको आनुवांशिक संरचना थाहा भएको १० महिनामै खोप विकासको यो कामलाई ठूलो उपलब्धि मानिएको छ ।

फाइजरका प्रमुख कार्यकारी अधिकृत अल्बर्ट बुर्लाले आकस्मिक प्रयोगका लागि दिइएको आवेदन ‘विश्वलाई कोभिड–१९ को खोप दिने यात्रामा यो एउटा कोसेढुङ्गा’ भएको टिप्पणी गरे ।

सुरुमा खोपको मात्रा अपर्याप्त हुने हुँदा सेन्टर्स फर डिजीज कन्ट्रोल एन्ड प्रिभेन्शन (सीडीसीपी) ले कसलाई पहिला दिने भन्ने निधो गर्नेछ । उता चीनमा तयार भएको कोरोनाको खोप समेत १० लाख बढीमा लगाइएको छ । सिनोभ्याक नाम दिइएको उक्त खोपको नजिता समेत सकारात्मक आएको बताइएको छ ।