६ स्वास्थ्य विज्ञान प्रतिष्ठानमा उपकुलपतिका लागि दरखास्त आह्वान

काठमाडौं । सरकारले ६ स्वास्थ्य विज्ञान प्रतिष्ठानमा रिक्त रहेको उपकुलपति पदमा दरखास्त आह्वान गरेको छ ।

स्वास्थ्य तथा खाद्य स्वच्छता मन्त्रालय मातहतमा रहेको कर्णाली स्वास्थ्य विज्ञान प्रतिष्ठान, चिकित्सा विज्ञान राष्ट्रिय प्रतिष्ठान, पाटन स्वास्थ्य विज्ञान प्रतिष्ठान, पोखरा स्वास्थ्य विज्ञान प्रतिष्ठान, राप्ती स्वास्थ्य विज्ञान प्रतिष्ठान तथा बीपी कोइराला स्वास्थ्य विज्ञान प्रतिष्ठानका लागि उपकुलपति पदमा नियुक्ति प्रक्रिया अघि बढेको हो ।

रिक्त उपकुलपति पदका लागि नाम सिफारिस गर्न गठित छनोट तथा सिफारिस समितिले सूचना जारी गर्दै योग्यता पुगेका इच्छुक व्यक्तिसँग दरखास्त आह्वान गरेको हो ।

समितिले ३१ वैशाख २०८३ मा स्वीकृत ‘स्वास्थ्य विज्ञान प्रतिष्ठानहरूको उपकुलपति छनोट तथा सिफारिस सम्बन्धी एकीकृत कार्यविधि, २०८३’ बमोजिम दरखास्त आह्वान गरेको जनाएको छ।

इच्छुक तथा योग्य व्यक्तिले सूचना पहिलो पटक प्रकाशित भएको मितिले १० दिनभित्र स्वास्थ्य मन्त्रालयको वेबसाइटमा उपलब्ध लिंकमार्फत आवेदन दिन सक्ने मन्त्रालयले जनाएको छ ।