२०८२ लाई फर्केर हेर्दा (तस्बिरहरू)

क्लिकमान्डु

प्रकाशित मिति : १ बैशाख २०८३, मंगलबार १० : २९ बजे

काठमाडौं । आजदेखि नेपाली नयाँ वर्ष अर्थात् २०८३ सुरु भएको छ । २०८२ अरू वर्षहरूझैं सामान्य बितेको वर्ष पक्कै होइन।

सामाजिक, राजनीतिक, आर्थिक तथा नेपाली स्वाभिमानको कदरका हिसाबले पनि यस वर्षले धेरै कुराहरू हामीलाई उपहार दिँदै, ती उपहारसँगैका अनुभवहरू पनि छाडेर गएको छ ।

नेपाल फोटो लाइब्रेरीद्वारा खिचिएका केही तस्बिरहरू मार्फत २०८२ सालमा नेपाली जनताले सम्झनुपर्ने र बिर्सनुपर्ने अनेक राजनीतिक, सामाजिक, सांस्कृतिक तथा अन्य घटनाहरूको चर्चा गरौँ ।

२०८२ साल राजनीतिक हिसाबले उतारचढावपूर्ण वर्ष रह्यो ।

अन्य क्षेत्रमा पनि सम्झन र बिर्सन लायक थुप्रै घटना र दुर्घटनाहरू भए । जेनजी आन्दोलनले राजनीति परिवर्तन गर्‍यो तर आर्थिक क्षेत्रमा ठूलो क्षति पनि पुर्‍यायो । निजी क्षेत्रका कयौं उद्योग–व्यवसाय ध्वस्त पारिए । निजी सम्पत्तिमा आक्रमण भयो ।

भदौ २४ को विध्वंसले सबैभन्दा बढी प्रभावित भाटभटेनी सबैभन्दा छिटो उठ्न पनि सफल भयो । आगलागीमा पूर्ण क्षति भएका धेरै आउटलेटहरू पुनः सञ्चालनमा आइसकेका छन् ।

यो वर्ष विगतका वर्षहरूजस्तै सडक दुर्घटनाको नियति पनि बेहोर्नुपर्‍यो । खासगरी धादिङ बस दुर्घटना बिर्सन नसकिने घटना बन्यो। चरौंदीमा भएको दुर्घटनामा ३ विदेशीसहित १९ जनाले ज्यान गुमाए ।

खेल क्षेत्रको कुरा गर्ने हो भने त्रिवि क्रिकेट रंगशाला फ्लडलाइटले सजियो र पहिलो पटक नेपालीहरूले रात्रिकालीन क्रिकेटको मजा लिन पाए। ख्यातिप्राप्त अन्तर्राष्ट्रिय खेलाडीहरूको आगमनले थप रौनक ल्यायो ।

ब्राजिलका प्रख्यात फुटबल खेलाडी रोबर्टो कार्लोसको आगमनले नेपालको प्रचार अन्तर्राष्ट्रिय स्तरसम्म पुग्न सहयोग गर्‍यो। नेपाल सुपर लिगका लागि उनलाई नेपाल ल्याइएको थियो ।

आर्थिक क्षेत्रमा भने यो वर्ष उल्लेख्य रहेन। यसै पनि शिथिल निजी क्षेत्र जेनजी आन्दोलनका कारण झन् थलियो। यही वर्ष राष्ट्र बैंकको नयाँ गभर्नरमा विश्व पौडेल नियुक्त भए ।